ភ្នំពេញ៖ ករណីជនខិលខូចបោកតាមអ៊ីនធឺណិត ឬ តាមប្រព័ន្ធទូរស័ព្ទ ដោយអះអាងថាជនរងគ្រោះឈ្នះរង្វាន់ធំ នោះគេតែងប្រទះឃើញជាពិសេសបងប្អូនដែលមានភាពវ័យឆ្លាត (មិនទាន់ចាញ់បោក) បានបញ្ចេញពីករណីនេះ តាមរយៈវីដេអូកត់ត្រាសំឡេងឆ្លើយឆ្លងតាមរយៈទូរស័ព្ទ ជាមួយជនដែលគេសង្ស័យថាជាមនុស្សដដែលៗ បង្ហោះតាមបណ្តាញសង្គមហ្វេសប៊ុកជារឿយៗ ដើម្បីឲ្យបងប្អូនដែលពុំទាន់ចាញ់បោកបានដឹង។
ទោះយ៉ាងណា ករណីនេះហាក់នៅតែកើតមានឡើង ព្រោះថាជនខិលខូចទាំងនេះ នៅតែអាចបោកបងប្អូនជាប្រពលរដ្ឋ ដែលពួកគាត់មានការលោភលន់ពុំបានធ្វើការពិចារណាឲ្យបានវែងឆ្ងាយ ដែលមិនមែននៅសុខៗ គេមកប្រាប់ឈ្នះលុយច្រើនសន្ធឹកសន្ធាប់ ក្នុងលក្ខខណ្ឌវេរលុយឲ្យមុន ដើម្បីរត់ការបោកប្រាស់បែបនេះនោះទេ។
ជាក់ស្តែង នៅមុនថ្ងៃភ្ជុំបិណ្ឌប៉ុន្មានថ្ងៃ ជនបោកប្រាស់ម្នាក់ បានធ្វើឲ្យគ្រប់គ្នាហួសចិត្ត និងសើចចុកពោះតែម្តង ខណៈបោកប៉ះចំបងប្រុសម្នាក់ដែលបានដឹងពីល្បិចនេះ ហើយពេលនោះ គាត់ក៏បង្វែរបរិយាកាសរម្ងាប់កំហឹង ដោយធ្វើការសម្ភាសន៍ចោរត្រង់ៗពីទេពកោសល្យរបៀបបោកនេះថា តើរៀនជំនាញចេញសាលាណាឯដែរ។
ឆ្លើយតបមកវិញដោយចិត្តត្រជាក់ និងសើចសប្បាយជាមួយគ្នា ជនរូបនោះក៏បានប្រាប់ថា គាត់រៀនបោកនេះចេញពីសាលាវិមានទិព្វ ហើយមុខរបរមួយនេះនៅតែកាក់កបដដែល ដោយនៅតែមានប្រជាពលរដ្ឋជាច្រើនជឿយ៉ាងស្លុងតែម្តង។ រូបគេក៏បានប្រាប់ឲ្យដឹងទៀតថា រហូតមកទល់ពេលនេះបោកបានរាប់ម៉ឺនដុល្លារហើយ…៕ ដោយ៖ លឹម ហុង
