បាត់ដំបង៖ យោងតាមសាច់ញាតលរបស់សពព្រះសង្ឃដែលបានសុគង្គតបានបង្ហាញ ពីមូលហេតុដែលបង្ខំឲ្យព្រះ សង្ឃមួយអង្គគង់នៅវត្តកណ្តាលធ្វើអត្តឃាតដុតព្រះកាយខ្លួនឯង ដោយសារតូចព្រះទ័យនិងវាសនា។
យោងតាមការបញ្ជាក់ពីបងប្រុសរបស់ កាន់ ហេង ព្រះជន្ម២៥វស្សាត្រូវជាបងបង្កើត របស់ព្រះសពជនរងគ្រោះ ដែលភ្នាក់ងារយើងទទួលបាននៅថ្ងៃទី២៣ ខែកញ្ញានេះបញ្ជាក់ថា មូលដែលនាំឲ្យប្អូនរបស់ព្រះអង្គព្រះនាម ហ៊ាត ហ៊ាក់ ធ្វើអត្តឃាតដោយខ្លួនឯង រហូតសុគតនៅលើកុដិ វត្តកណ្តាល ក្រុងបាត់ដំបង ដោយសារតូចព្រះទ័យចំណុចចំនួន៣គឺ,ទី១ តូចព្រះទ័យប៉ះពាល់ដល់ផ្លូវព្រះទ័យ ចំពោះក្រុមគ្រួសារបានជួបរឿងបាក់បែកគឺញោមម្តាយបានស្លាប់ចោល ចំណែកញោមឳពុកបានយកប្រពន្ធថ្មីមួយទៀត។ ទី២ ព្រះអង្គ ហ៊ាត ហ៊ាក់ បានតូចព្រះទ័យចំពោះលទ្ធផល ប្រឡងធ្លាក់នៅ សាលាពុទ្ធិកវិទ្យាល័យ ដែលខកបំណងធំតាមការគ្រោងទុក និងបន្តការសិក្សាឆ្ពោះ ទៅកាន់សាកល វិទ្យាល័យ និង ទី៣.ចុងក្រោយ ដោយសារមានបញ្ហាខ្វះខាតបច្ច័យសម្រាប់ដំណើការសិក្សារៀនសូត្របន្តទៀត។
ប្រភពប្រជាពលរដ្ឋដែលចូលរួមក្នុងពិធីបុណ្យព្រះសព បានសម្តែងការសោកស្តាយយ៉ាងខ្លាំង ព្រោះបាត់បង់ព្រះសង្ឃមួយអង្គដែលមានទឹកព្រះទ័យល្អស្លូតត្រង់ និងមានសេចក្តីព្យាយាមសិក្សារៀនសូត្រ មិនចេះជិនណាយ។
ព្រះសង្ឃរងគ្រោះមានព្រះនាម ហ៊ាត ហ៊ាក់ ព្រះជន្ម ២១វស្សា មានស្រុកកំណើតនៅភូមិគោកឬស្សី ឃុំ បល្ល័ង្គ ស្រុកប្រាសាទបាគង ខេត្តសៀមរាបរយៈពេលចុងក្រោយប្រមាណជា៥ ខែបានមកគង់នៅវត្តកណ្តាល ក្រុងបាត់ដំបង ដើម្បីសិក្សារៀនសូត្រក្នុងវិស័យ ព្រះពុទ្ធសាសនានិង សាលាចំណេះដឹងទៅ នៅក្នុងខេត្តបាត់ដំបង ហើយបានធ្វើអត្តឃាតដុតខ្លួនឯងកាលពីថ្ងៃទី២១ ខែកញ្ញា ឆ្នាំ២០២០។
នៅក្នុងពិធីបុណ្យព្រះសពខាងលើឯកឧត្តម ប៊ុត គឹមស៊ាន អភិបាលរងខេត្តបាត់ដំបង បាននាំយក នូវថវិការបស់សាខាកាកបាទក្រហមកម្ពុជាខេត្តពីសប្បុរសជនមួយចំនួន និងថវិការបស់សម្តចកិតិ្តព្រឹទ្ធ បណ្ឌិត ប៊ុន រ៉ានី ហ៊ុន សែន ចំនួន១០លានរៀលផងដែរ ដើម្បីឧបត្តម្ភគាំទ្រកម្មវិធីបុណ្យសពនេះ៕ ដោយ ៖ ឡេងបញ្ញាឬទ្ធិ
