ភ្នំពេញ៖ ថ្មីៗនេះ គណនីហ្វេសប៊ុកឈ្មោះ Bun San បានធ្វើឲ្យមហាជនមានការចាប់អារម្មណ៍ខ្លាំងតែម្តង បន្ទាប់ពីបានបង្ហោះនូវរូបភាពប៉ុន្មានសន្លឹក បង្ហាញពីស្នាដៃចម្លាក់ឈើផុសចេញជាក្រដាសប្រាក់ខ្មែរប្រភេទ ១០០.០០០ រៀល (មួយសែនរៀល) ដែលស្រស់ស្អាតចម្លែកនឹកស្មានមិនដល់។
តាមរយៈគ្រុបហ្វេសប៊ុកឈ្មោះ Amzing World Cultural Hub គណនីខាងលើបានបង្ហោះរូបភាព ដោយភ្ជាប់ Caption សរសេរជាភាសាអង់គ្លេសដែលមានខ្លឹមសារជាភាសាខ្មែរថា៖ «ពិតជាអស្ចារ្យណាស់ យកឈើមកឆ្លាក់ជា ១០០.០០០ រៀល (ក្រដាសប្រាក់ខ្មែរ), សិប្បកម្មធ្វើដោយ “មុន្នី ច័ន្ទ”, ដប់ម៉ឺនរៀល ស្មើ ២៥ ដុល្លារ»។
ទន្ទឹមនេះផងដែរ មហាជនជាច្រើនបានសម្តែងនូវការកោតសរសើរជាខ្លាំង ចំពោះស្នាដៃចម្លាក់ឈើដ៏អស្ចារ្យមួយនេះ គឺមើលទៅដូចទៅនឹងក្រដាសប្រាក់ ១០០.០០០ រៀល ពិតៗតែម្តងព្រោះថា នេះមិនមានជាការងារងាយស្រួលនោះទេ ជាមួយរចនាបថដ៏ស្មុគស្មាញនិងពិសេសរូបសម្តេចតា និងសម្តេចយាយ នៅលើក្រដាសប្រាក់នេះ៕ ដោយ៖ លឹម ហុង
