ភ្នំពេញ៖មនុស្ស២នាក់បានរងរបួសធ្ងន់និង៥នាក់ផ្សេងទៀតបានរងរបួសស្រាល ខណះអ្នកបើករថយន្តដែលដឹកមនុស្សពេញលើរថយន្តត្រឡប់មកពីបុណ្យកឋិនវិញ ខំបួងចង្កូតគេចពីម៉ូតូដែលបើកដោយបុរសម្នាក់ រ៉េពេញផ្លូវ ដែលកំពុងមានភ្លៀងធ្លាក់តិចផងធ្វើឲ្យផ្លូវរអិលរថយន្ដក៏រេចង្កូតក្រឡាប់ផ្ងារជើងតែម្តង។
គ្រោះថ្នាក់នេះបានកើតឡើងកាលពីវេលាម៉ោង៣រសៀលថ្ងៃទី១៥ ខែតុលាឆ្នាំ២០១៧ស្ថិតនៅចំណុចតាមបណ្តោយផ្លូវ៦០ម៉ែត្រ សង្កាត់ជើងឯក ខណ្ឌដង្កោ ។
បើតាមជនរងគ្រោះបាននិយាយថាមុនពេលកើតហេតុពួកគាត់បានធ្វើដំណើរតាមរថយន្តម៉ាកកូរ៉េ ពណ៌ស ពាក់ស្លាកលេខ កោះកុង 2A-0706 បើកបរក្នុងទិសដៅពីកើតទៅលិចត្រឡប់មកពីបុណ្យកឋិននៅឯស្រុកកៀនស្វាយក្នុងបំណងធ្វើដំណើរត្រឡប់ទៅផ្ទះនៅអង្គស្នួល ខេត្តកណ្តាលដោយបានធ្វើដំណើរតាមបណ្តោយផ្លូវខាងលើ លុះដល់ចំណុចកើតហេតុដែលស្រាប់តែមានម៉ូតូម៉ាក ហុងដាសេ១២៥ ពណ៌ខ្មៅស៊េរីឆ្នាំ២០១៧ពាក់ស្លាកលេខកណ្តាល1V-7680 បើកបរដោយបុរសម្នាក់ រេពេញផ្លូវក្នុងទិសដៅបញ្ច្រាសទិសគ្នា ដោយខ្លាចបុកម៉ូតូបុរសខាងលើ ក៏បួងចង្កូតគេចស្របពេលមេឃកំពុងភ្លៀងផងនោះក៏បណ្តាលក្រឡាប់។ ចាក់អ្នកជិះលើរថយន្តខ្ទាតមកលើដងផ្លូវរងរបួសធ្ងន់២នាក់និងស្រាល៥នាក់ ។
ក្រោយពីកើតហេតុ ម្ចាស់រថយន្តបានគេចចេញពីកន្លែងកើតហេតុបាត់ ចំណែកម៉ូតូបុរសខាងលើបានដួលបោកទៅលើដងផ្លូវរងរបួសធ្ងន់សន្លប់បាត់ស្មារតីត្រូវបានបញ្ជូនទៅសង្គ្រោះបន្ទាន់នៅមន្ទីរពេទ្យ។ ក្រោយកើតហេតុរថយន្តនិងម៉ូតូត្រូវសមត្ថកិច្ចចុះមកវាស់វែងយកទៅរក្សាទុកនៅអធិកាដ្ឋានខណ្ឌដង្កោ រង់ចាំដោះស្រាយគ្នាតាមនីតិវិធីច្បាប់ជាក្រោយ៕ ដោយ៖សំណាង
