ក្រសួងសុខាភិបាលកម្ពុជា និងទីភ្នាក់ងារសហប្រតិបត្តិការកូរ៉េ (KOICA) បានចុះហត្ថលេខាលើកំណត់ត្រាពិភាក្សាគ្នា ស្តីពីគម្រោងពង្រឹងប្រព័ន្ធសុខាភិបាលផ្នែកជំងឺឆ្លងនៅកម្ពុជា ក្នុងគម្រោងទឹកប្រាក់ចំនួន៨,៥លានដុល្លារ។
ពិធីចុះហត្ថលេខានេះ បានធ្វើឡើងនៅទីស្តីការក្រសួងសុខាភិបាល នៅថ្ងៃទី២៥ ខែកញ្ញានេះ ដោយមានការចូលរួមពីលោកស្រីវេជ្ជបណ្ឌិត ឱ វណ្ណឌីន រដ្ឋលេខាធិការនិងជាអ្នកនាំពាក្យក្រសួងសុខាភិបាល ជាមួយលោក RHO Hyunjun នាយកទីភ្នាក់ងារKOICA នៅកម្ពុជា។
សេចក្តីប្រកាសព័ត៌មានរបស់ KOICA នៅថ្ងៃសុក្រទី២៥ខែកញ្ញានេះ បានលើកឡើងថា គម្រោងថ្មីដែលមានថវិកាចំនួន៨,៥លានដុល្លារ សម្រាប់ពង្រឹងប្រព័ន្ធសុខាភិបាល ដើម្បីការពារ ស្រាវជ្រាវ និងឆ្លើយតបចំពោះជំងឺឆ្លងនៅកម្ពុជានេះ។ ទីភ្នាក់ងារសហប្រតិបត្តិការអន្តរជាតិកូរ៉េ(កយកា-KOICA)បានចាប់ផ្តើមគម្រោងថ្មីមួយដែលមានថវិកាចំនួន ៨,៥ លានដុល្លារសម្រាប់ពង្រឹងប្រព័ន្ធសុខាភិបាលដើម្បីការពារ ស្រាវជ្រាវ និងឆ្លើយតប ចំពោះជំងឺ ឆ្លងនានានៅកម្ពុជា។ តាមរយៈគម្រោងរយៈពេល ៦ឆ្នាំនេះ ការិយាល័យមជ្ឈមណ្ឌលគ្រប់គ្រង និងបង្ការ ជំងឺសហរដ្ឋអាមេរិកប្រចាំប្រទេសកម្ពុជា (យូអេសស៊ីឌីស៊ី-USCDC) នឹងធ្វើការជាមួយក្រសួងសុខាភិបាល ដើម្បីពង្រឹងប្រព័ន្ធមន្ទីរ ពិសោធន៍ជាតិ កសាងសមត្ថភាពបុគ្គលិកសុខាភិបាលសាធារណៈ រួមទាំងអ្នក ជំនាញផ្នែករោគរាតត្បាត ព្រមទាំងបង្កើតកម្មវិធីឆ្លើយតបបន្ទាន់ នៅថ្នាក់ជាតិ និង ថ្នាក់ក្រោមជាតិ។
ជាមួយគ្នានេះ ផងដែរ ក៏មានការចុះហត្ថលេខាលើអនុស្សរណៈនៃការយោគយល់ (MOU) រវាងប្រធានតំណាងប្រចាំ ប្រទេសរបស់កយកា-KOICA និងប្រធានតំណាងប្រចាំប្រចាំប្រទេសរបស់យូអេសស៊ីឌីស៊ី-USCDC ក្រោមអធិបតីលោកស្រីវេជ្ជបណ្ឌិត Rachel Albalak ។
នៅដំណាក់កាលទីមួយនៃគម្រោងរបស់កយកា-KOICAនេះ ត្រូវបានអនុវត្តចាប់តាំងពីឆ្នាំ ២០១៧ ដោយមានថវិកាចំនួន ៣ លានដុល្លារតាមរយៈកិច្ចសហប្រតិបត្តិការជាមួយយូអេសស៊ីឌីស៊ី-USCDC និងទីភ្នាក់ងារសហរដ្ឋអាមេរិកសម្រាប់ការអភិវឌ្ឍន៍អន្តរជាតិ (យូអេសអេអាយឌី-USAID) នៅកម្ពុជា។ ក្នុងរយៈពេល ៣ ឆ្នាំចុងក្រោយនេះ កយកា-KOICA បានអនុវត្តគម្រោងពង្រីកការចាក់ថ្នាំបង្ការ និងពង្រឹង ប្រព័ន្ធនេះយ៉ាងខ្ជាប់ខ្ជួន នៅក្នុងខេត្តចំនួន ៦ រួមមានខេត្តរតនគិរី មណ្ឌលគិរី ស្ទឹងត្រែង ព្រះវិហារ និង ខេត្តក្រចេះ ជាមួយ យូអេសអេអាយឌី-USAID។ លើសពីនេះទៀតកិច្ចសហការរបស់ កយកា-KOICA ជាមួយ យូអេសស៊ីឌីស៊ី-USCDC ក្នុងការគាំទ្រដល់ការកសាងប្រព័ន្ធមន្ទីរពិសោធន៍ជាតិ និងការកសាង សមត្ថភាពធនធានមនុស្សលើផ្នែកសុខភាពសាធារណៈ។
សមិទ្ធផលមួយក្នុងចំណោមសមិទ្ធផលសំខាន់ៗនៃគម្រោងក្នុងដំណាក់កាលទីមួយ មានដូចជា វគ្គបណ្តុះ បណ្តាលការស្រាវជ្រាវរកករណីជំងឺឆ្លងទៅដល់បុគ្គលិកសុខាភិបាលសាធារណៈ៦៩នាក់ ដែលបានទទួល ការបណ្តុះបណ្តាលតាមរយៈកម្មវិធីស្រាវជ្រាវរោគរាតត្បាត (FETP) ដើម្បីកំណត់ និងឆ្លើយតបទៅនឹងការ រីករាលដាលនៃជំងឺឆ្លងដូចជា ជំងឺកូវីដ-១៩ នៅទីកន្លែងណាមួយ ឬ អំឡុងពេលណាមួយ ដែលអាចកើតឡើង។ កម្មវិធីនេះត្រូវបានបង្កើតឡើងក្នុងឆ្នាំ ២០១១ សម្រាប់បណ្តុះបណ្តាលអ្នកជំនាញសុខភាព សាធារណៈ នៅទូទាំងប្រទេសកម្ពុជាដោយផ្អែកលើមូលដ្ឋានគ្រឹះនៃរោគរាតត្បាត រួមមានការឃ្លាំមើល ជំងឺឆ្លង ការតាមដានលើឬសគល់នៃជំងឺឆ្លង កត្តាប្រឈមមុខ និងការគ្រប់គ្រងការឆ្លងរាលដាល។ កម្មវិធី នេះត្រូវបានអនុវត្តដោយសហការជាមួយគ្នា រវាងនាយកដ្ឋានប្រយុទ្ធនឹងជំងឺឆ្លងនៃក្រសួងសុខាភិបាល និងអង្គការ សុខាភាពពិភពលោក។ បច្ចុប្បន្ននេះសិក្ខាកាមរបស់កម្មវិធីFETP គឺមាននៅគ្រប់ ២៥ ខេត្តក្រុងនៃប្រទេស កម្ពុជាដែលបានរួមចំណែកយ៉ាងសកម្មនៅក្នុងការឆ្លើយតបទៅនឹងជំងឺកូវីដ-១៩ នាពេលកន្លងមក។
គម្រោងថ្មីនេះនឹងបន្តគាំទ្រដល់ការបណ្តុះបណ្តាលអ្នកជំនាញផ្នែករោគរាតត្បាត ដូច្នេះនៅចុងបញ្ចប់នៃ គម្រោង ស្រុកនីមួយៗនឹងមានអ្នកជំនាញខាងរោគរាតត្បាត ដែលមានសម្ថភាពពេញលេញក្នុងការត្រួត ពិនិត្យលើករណីផ្ទុះជំងឺឆ្លងណាមួយនៅក្នុងតំបន់ និងអាចតាមដានករណីដែលបានរកឃើញ។ លើសពីនេះ ទៀតកយកា-KOICA នឹងបន្តកសាងប្រព័ន្ធគ្រប់គ្រងគុណភាពមន្ទីរពិសោធន៍ (LQMS) និងប្រព័ន្ធព័ត៌មាន មន្ទីរពិសោធន៍ (LIS) នៅក្នុងមន្ទីរពិសោធន៍សាធារណៈចំនួន ៤៩ នៅក្នុងប្រទេស និងពង្រឹងសមត្ថភាពដឹក ជញ្ជូនសំណាកវត្ថុវិភាគ។
លទ្ធផលនៃគម្រោងនេះត្រូវបានរំពឹងថា មន្ទីរពិសោធន៍សាធារណៈទាំងអស់ នឹងមានបំពាក់នូវឧបករណ៍សម្រាប់ការធ្វើរោគវិនិច្ឆ័យបានត្រឹមត្រូវ និងអាចជឿជាក់បានជាងមុនក្នុងការ ពិនិត្យរកមើលជំងឺឆ្លងនានា ។ មជ្ឈមណ្ឌលប្រតិបត្តិការសង្គ្រោះបន្ទាន់ (EOC) ដែលបានដើរតួនាទីយ៉ាង សំខាន់ក្នុងការឆ្លើយតបទៅនឹងជំងឺរាតត្បាតកូវីដ-១៩ ក៏នឹងទទួលបានការគាំទ្រផ្នែកហិរញ្ញវត្ថុ និងបច្ចេក ទេសតាមរយៈគម្រោងនេះ ដែលនឹងជួយដំណើរការពិសោធន៍ ការវាយតម្លៃពេញលេញលើហានិភ័យ ថ្នាក់ជាតិ នីតិវិធីប្រតិបត្តិស្តង់ដារមជ្ឈមណ្ឌលប្រតិបត្តិការសង្គ្រោះបន្ទាន់ ( SOPs) និងធ្វើការបណ្តុះបណ្តាល ដល់បុគ្គលិក EOC និងមន្ត្រីគោលដៅនៅតាមបណ្តាខេត្ត។
សូមរំលឹកផងដែរថា
កយកា-KOICA គឺជាទីភ្នាក់ងារផ្តល់ជំនួយដ៏ធំមួយដែលបានគាំទ្រដល់ផ្នែកសុខសុវត្តិ ភាពវេជ្ជសាស្ត្រប និងប្រព័ន្ធគ្រប់គ្រងជំងឺឆ្លងរបស់រាជរដ្ឋាភិបាលកម្ពុជា ក្នុងរយៈពេលប៉ុន្មានឆ្នាំចុងក្រោយ នេះ។ នៅឆ្នាំ ២០១៧ កយកា-KOICA បានចាប់ផ្តើមគម្រោងរយៈពេល ៣ ឆ្នាំដោយសហការជាមួយ យូអេសស៊ីឌីស៊ី-USCDC លើការពង្រឹងមន្ទីរពិសោធន៍សាធារណៈថ្នាក់ជាតិ និងខេត្តក្នុងប្រទេស ហើយនិងបណ្តុះបណ្តាលអ្នកជំនាញផ្នែករោគរាតត្បាត។
កយកា-KOICA បានបរិច្ចាគឧបករណ៍ តេស្ត Real Time PCR ចំនួន ៨,៦៤០តេស្ត និងបានផ្តល់ថវិកាចំនួន ២០០,០០០ ដុល្លារដល់រដ្ឋាភិបាលកម្ពុជាដើម្បីឆ្លើយតបទៅនឹងការរីករាលដាលនៃការរាតត្បាតជំងឺកូវីដ-១៩ នៅក្នុងប្រទេស។
កាលពីខែឧសភាកន្លងទៅ ម៉ាស់ពេទ្យជាង ១៣០,០០០ ម៉ាស់ (ម៉ាស់N95 និងម៉ាស់ ពេទ្យ) និងហ្សែលលាងដៃសម្លាប់មេរោគត្រូវបានបរិច្ចាគបន្ថែមជូនទៅមន្ទីរពេទ្យ មិត្តភាពខ្មែរ-សូវៀត និង មន្ទីរពេទ្យកុមារជាតិដែលជាមន្ទីរពេទ្យថ្នាក់ជាតិសម្រាប់ព្យាបាលជំងឺកូវីដ-១៩នៅរាជថានីភ្នំពេញ។
នៅក្នុងឆ្នាំនេះផងដែរការិយាល័យកយកា-KOICAកម្ពុជានឹងចំណាយប្រាក់ ១ លានដុល្លារបន្ថែមទៀតដើម្បី គាំទ្រដល់កម្មវិធីការឆ្លើយតបទៅនឹងជំងឺកូវីដ-១៩ របស់ប្រទេសកម្ពុជា ដែលបានរួមបញ្ចូលនូវការផ្តល់៖ -ទូចល័តសុវត្តិភាពសម្រាប់យកសំណាកវត្ថុវិភាគចំនួន២០គ្រឿង (Walk-Through Booth) -Negative Pressure Carriers ចំនួន១២គ្រឿង -PPE ដែលមានតម្លៃ ៣៥០,០០០ ដុល្លារ -ថវិកាចំនួន ៣០០,០០០ ដុល្លារក្នុងអនុវត្តគម្រោងដែលសហការជាមួយអង្គការអន្តរជាតិ ទេសន្តប្រវេសន៍ (អាយអូអឹម- IOM) ដើម្បីធ្វើឱ្យប្រសើរឡើងនូវដំណើរការផ្តល់ចំណេះដឹង ពាក់ព័ន្ធទៅនឹងជំងឺកូវីដ-១៩ ការត្រួតពិនិត្យសុខភាពនិងការធ្វើតេស្ត៍ ជំនួយមនុស្សធម៌នៅច្រក ចេញចូល និងនៅមណ្ឌលចត្តាឡី-ស័កតាមព្រំដែន និងសម្ភារប្រើប្រាស់មួយចំនួនរួមជាមួយ ស្បៀង ដល់ជនចំណាកស្រុក -ការជួយទ្រទ្រង់ជីវភាពរស់នៅរបស់ប្រជាជនងាយរងគ្រោះ និងជនដែលរងផលប៉ះពាល់ខ្លាំងដោយសារជំងឺកូវីដ-១៩តាមរយៈការផ្តល់នូវគ្រឿងបរិភោគមួយចំនួន និងបរិក្ខាទ្រទ្រង់សុខាភាពដែលមាន តំលៃ ១៥០,០០០ ដុល្លារ៕ដោយ៖កូឡាប
