ភ្នំពេញ៖កាលពីយប់មិញនេះ វេលាម៉ោងប្រមាណ ៨ ថ្ងៃទី២៤ ខែកញ្ញា ឆ្នាំ២០២០ បងស្រីបង្កើត និងក្មួយៗរបស់អតីតចម្រៀងសំឡេងផ្អែមស្រទន់លោក សែម សង្វាត ត្រូវបានគេចាក់សោររបងផ្ទះពីខាងក្រៅ បណ្តាលឲ្យជាប់នៅក្នុងផ្ទះអស់រយៈពេលជាច្រើនម៉ោង ទម្រាំលោកមកដល់ស្នើសុំការអន្តរាគមន៍ពីអាជ្ញាធរកាត់សោផ្អើលទាំងយប់។ ហេតុការណ៍ដ៏អាក្រក់នេះបានកើតឡើងស្ថិតនៅផ្លូវសុធារស់ (ទល់មុខសាកលវិទ្យាល័យបៀលប្រាយ) ក្នុងសង្កាត់ទន្លេបាសក់ ខណ្ឌចំការមន រាជធានីភ្នំពេញ។
តាមរយៈផ្តល់បទសម្ភាសន៍ទៅដល់អ្នកសារព័ត៌មាន ក្មួយស្រីបង្កើតលោក សែម សង្វាត បានបញ្ជាក់ប្រាប់ឲ្យដឹងថាៈ «មូលហេតុដែលម្ចាស់ Apartment ហ្នឹង បញ្ជាឲ្យសន្តិសុខខ្លួនម្នាក់មកចាក់សោទ្វារបងផ្ទះគាត់ពីខាងក្រៅបែបនេះ គឺដោយសារសុំចម្លងសោរពុំបាន ដើម្បីចាក់មើលទឹក (កុងទ័រទឹករួមនៅក្នុងបរិវេណផ្ទះរបស់គាត់) ដែលជាធម្មតា ពេលបុគ្គលិករដ្ឋាករទឹកមកចាក់មើល គឺចាក់មើលរួមទាំងអស់គ្នា។ គាត់ក៏បញ្ជាក់ឲ្យដឹងផងដែរថា ផ្ទះរបស់គាត់ក៏មានអ្នកនៅដែរ មិនមែនទៅធ្វើការទាំងអស់នោះទេ ប្រសិនបើចង់មកមើលទឹក គ្រាន់តែស្រែកប្រាប់ទៅ ឬ អាចតេទៅម្តាយរបស់គាត់ នោះម្តាយរបស់គាត់នឹងដើរមកពីផ្សារមកចាក់ឲ្យហើយ។ ហើយមូលហេតុដែលពួកគាត់មិនអាចចម្លងសោរឲ្យម្ចាស់ផ្ទះបង្កហេតុនេះ ឬ បងប្អូនផ្ទះដទៃបាន គឺព្រោះតែដើម្បីសុវត្ថិភាពផ្ទះសម្បែងរបស់ពួកគាត់ ដែលរឿងអីត្រូវចម្លងសោរទ្វារឲ្យគេកាន់ ចុះបើមនុស្សអត់នៅ ហើយម៉ូតូទុកក្នុងហ្នឹងទៀត បើបាត់នរណាទទួលខុសត្រូវ?»។
ក្មួយស្រីលោក សែម សង្វាត ក៏បានឲ្យបងប្អូនមហាជនបានដឹងបន្ថែមថា «តើគាត់ (ម្ចាស់ Apartment ហ្នឹង) ចង់បានផ្លូវសមូហភាពអីគេ សមូហភាពនៅឯណា? ទាំងដែលគាត់យកផ្លូវសមូហភាពធ្វើជារបស់ឯកជន ធ្វើរបងបិទជិតដោយមិនឲ្យពួកគាត់ចេញចូលបានឡើយ ហើយមិនត្រឹមតែប៉ុណ្ណឹងទេ សូម្បីតែជណ្តើរឡើងចេញចូលរួមទៀតផង»។
យ៉ាងណាមិញ ក្រោយរឿងនេះមើលទៅហាក់ដូចជាអយុត្តិធម៌ និងសាហាវខ្លាំងពេក ស្រាប់តែលោកជំទាវ ហ៊ុន ស៊ីណាត បានប្រតិកម្មយ៉ាងខ្លាំងៗទាំងកំហឹងឈឺចាប់ជំនួសជនរងគ្រោះថា៖ «អាជ្ញាធរអន់ពេកហើយ ធ្វើអាអ្នកមានលុយខ្លាំងជាងច្បាប់នោះ សូមឲ្យអាជ្ញាធរទៅមើលថាតើអាមួយណាក៏វាខ្លាំងហ៊ានធ្វើបែបនេះ ឬខ្លាចអំណាចនរណាម្នាក់ បានជាអាជ្ញាធរមិនហ៊ានធ្វើនោះ??។»៕ ដោយ៖ លឹម ហុង
