ភ្នំពេញ៖ កាលពីថ្ងៃទី២៦ ខែកញ្ញា ឆ្នាំ២០២០ កន្លងទៅថ្មីៗនេះ មហាជនបានមានការចាប់អារម្មណ៍ជាខ្លាំង បន្ទាប់ពីបានឃើញតារាចម្រៀង និងក៏ដូចជាអ្នកនិពន្ធនៅផលិតកម្ម Galaxy Navatra ត្រូវបានទទួលការយកចិត្តទុកដាក់ និងលើកទឹកចិត្តពីមេកើយរបស់ពួកគេគឺលោកឧកញ៉ា ឡេង ណាវ៉ត្រា តាមរយៈការផ្តល់ផ្ទះ១ល្បែង ដែលក្នុងនោះមានដូចជាលោក សាក់ ធារិទ្ធ អ្នកនិពន្ធបទចម្រៀងក្នុងផលិតកម្មជាដើម។
ជាមួយការលើកទឹកចិត្តដ៏ធំធេងនេះផងដែរ ឃើញថាមានបងប្អូនអ្នកលេងហ្វេសប៊ុកយ៉ាងច្រើន បានសម្តែងនូវកោតសរសើរជាខ្លាំងដល់លោកឧកញ៉ា ឡេង ណាវ៉ាត្រា ដែលជាអគ្គនាយកក្រុមហ៊ុន Galaxy Navatra Group ដែលតែងតែយកចិត្តទុកដាក់ និងផ្តល់តម្លៃចំពោះកូនចៅ ដើម្បីជាការលើកទឹកចិត្តឲ្យខិតខំបន្ថែមទៀត ដើម្បីឲ្យសិល្បៈចម្រៀងកាន់តែរីកចម្រើនតទៅមុខ។
យ៉ាងណាមិញ អ្វីដែលគួរឲ្យចាប់អារម្មណ៍មួយទៀតនោះ គឺនៅខាងក្រោមសាររបស់ផលិកម្ម Galaxy បានបង្ហោះ គេបានកត់សម្គាល់ឃើញមានមតិជាច្រើនបានចូលរួមលើកឡើង ដោយពួកគេទទូចសុំម្ចាស់ផលិតកម្ម Galaxy Navatra ដែលមានលោកឧកញ៉ា ឡេង ណាវ៉ាត្រា ផ្តល់ឱកាសឲ្យតារាចម្រៀង ប៊ុត សីហា បានចូលច្រៀងក្នុងផលិតកម្មរបស់លោកផង។
ក្នុងនោះ អ្នកគាំទ្រ ប៊ុត សីហា បានលើកជាសំណូមពរយ៉ាងដូច្នេះថា៖ «បងអើយផ្តល់ឱកាសឱ្យ ប៊ុត សីហា ចូល Galasxy ផងបងអើយសង្ឃឹមលើបង ណាវ៉ាត់ត្រា ហើយ», «សង្ឃឹមថាកាឡាក់ស៊ីនឹងផ្ដល់ឱកាសឱ្យ ប៊ុត សីហា ចូលច្រៀងផង!»។
គួរបញ្ជាក់ផងដែរថា អតីតម្ចាស់ជ័យលាភី The Voice Cambodia រដូវកាលទី១ ក្នុងឆ្នាំ២០១៤ លោក ប៊ុត សីហា ត្រូវបានដឹងថា ពេលនេះលោកហាក់មិនទាន់ឈរជើងនឹងនៅផលិតកម្មណាមួយនោះទេ ដោយគេតែងសង្កេតឃើញចេញច្រៀងតាមអកកាដង់ម្តងម្កាលប៉ុណ្ណោះ៕ ដោយ៖ លឹម ហុង
