ប្រភពការទូតជាច្រើន ដែលបានដឹងច្បាស់ពីគោលបំណងរបស់កូរ៉េខាងជើង បាននិយាយថា គីម យូជុង (Kim Yo-jong) ដែលជាប្អូនស្រីដ៏មានឥទ្ធិពលរបស់មេដឹកនាំកូរ៉េខាងជើង គីម ជុងអ៊ុន (Kim Jong-un) នឹងធ្វើការ អញ្ជើញប្រធានាធិបតីកូរ៉េខាងត្បូង ម៉ូន ជេអ៊ីន (Moon Jae-in) ឲ្យទៅទស្សនៈកិច្ចនៅទីក្រុងព្យុងយ៉ាងក្នុងពេលណាមួយ ក្នុងឆ្នាំនេះ។
បើតាមប្រភពបញ្ជាក់ថា ការអញ្ជើញមេដឹកនាំកូរ៉េខាងត្បូង ទៅទស្សនៈកិច្ចនៅកូរ៉េខាងជើង អាចនឹងត្រូវធ្វើឡើង ក្នុងកំឡុងការពិសារអាហារថ្ងៃត្រង់ជាមួយគ្នានៅថ្ងៃសៅរិ៍ស្អែក រវាង លោក ម៉ូន ជេអ៊ីន និង គីមយូជុង។
ប្រភពការទូតដដែលបញ្ជាក់ទៀតថា គ្មានអ្វីជាទីបញ្ចប់នោះទេ ហើយថ្ងៃល្អ សំរាប់ដំណើរទស្សនៈកិច្ចរបស់ប្រធានាធិបតីកូរ៉េខាងត្បូង ទៅកូរ៉េខាងជើង អាចជាថ្ងៃទី ១៥ ខែសីហាខាងមុខ ដែលជាថ្ងៃកូរ៉េត្រូវបានរំដោះចេញពីការឈ្លានពានរបស់ជប៉ុនក្នុងឆ្នាំ ១៩៤៥។
សូមបញ្ជាក់ផងដែរថា បច្ចុប្បន្ន Kim Yo-jong ប្អូនស្រីមេដឹកនាំកូរ៉េខាងជើង ដែលជាអ្នកកាន់កាប់កិច្ចការនយោបាយកូរ៉េខាងជើង កំពុងស្ថិតនៅក្នុងប្រទេសកូរ៉េខាងត្បូង ដើម្បីចូលរួមបើកដំណើរការព្រឹត្តិការណ៏កីឡាអូឡាំពិចរដូវរងា ដែលបានចាប់ផ្តើមធ្វើឡើងពីថ្ងៃទី ៩នេះ ដល់ថ្ងៃទី ២៥ខែកុម្ភះដដែល៕ សុភ័ក្ត្រ
