ភ្នំពេញ៖នៅក្នុងឱកាសអបអរសាទរទិវាគ្រូបង្រៀន ៥តុលា ទិវាគ្រូបង្រៀន បណ្ឌិតសភាចារ្យ ហង់ជួន ណារ៉ុន រដ្ឋមន្ដ្រីក្រសួងអប់រំ យុវជន និងកីឡាបានថ្លែងថា សាលារៀន គឺជាកោសិកាស្នូលនៃប្រព័ន្ធអប់រំ។ សាលារៀនល្អ គឺសាលាដែលគណៈគ្រប់គ្រង និងគ្រូគោរពបានយ៉ាងពេញលេញនូវតម្លៃជាមូលដ្ឋាន មានបេសកកម្មច្បាស់លាស់ កំណត់នូវលទ្ធផលខ្ពស់ ដែលគ្រូ និងសិស្សត្រូវសម្រេចឱ្យបាន និងត្រូវមាននាយក ដែលមានសមត្ថភាពក្នុងការដឹកនាំអនុវត្តនូវទស្សនវិស័យនេះ។
លទ្ធផលសិក្សារបស់សិស្សចំណុះឱ្យកត្តាធំៗចំនួន៤ គឺ៖ ១.នាយកល្អ ២.គ្រូល្អ ៣.សិស្សល្អ និង៤.មាតាបិតា និងសហគមន៍ល្អ។
សាលារៀនត្រូវមានផែនការអភិវឌ្ឍសាលារៀន៖ ១.ការអនុវត្តកម្មវិធីសិក្សា និងរង្វាយតម្លៃសិក្សា ២.ការចូលរួមរបស់មាតាបិតា និងសហគមន៍ និង៣.ការបង្កើតលក្ខខណ្ឌអំណោយផលដើម្បីឱ្យសិស្សទទួលជោគជ័យក្នុងការសិក្សា។
ការពង្រឹងគណនេយ្យភាពរបស់សាលារៀន គឺជាមធ្យោបាយប្រកបដោយប្រសិទ្ធភាព ដើម្បីកែលម្អលទ្ធផលសិក្សារបស់សិស្ស។
អបអរសាទ ទិវាគ្រូបង្រៀន ៥ តុលា ២០២០ ក្រោមប្រធានបទ ៖ គ្រូបង្រៀនឆ្លាតវៃ ដើម្បីការអប់រំឌីជីថល។ ទិវាគ្រូបង្រៀនពិភពលោក ៥ តុលា គឺជាឱកាសដែលមនុស្សទូទាំងសាកលលោកសម្តែងការដឹងគុណ ភាពកតញ្ញូ ព្រមទាំងផ្ដល់តម្លៃចំពោះគ្រូបង្រៀនដែលបានចំណាយពេលវេលា កម្លាំងកាយ កម្លាំងចិត្ត ស្មារតី វិជ្ជាជីវៈ ក្នុងការផ្ទេរ និងផ្ដល់ចំណេះដឹង ព្រមទាំងបំណិនក្នុងការអភិវឌ្ឍសង្គមជាតិ។
បើតាមសេចក្តីប្រកាសព័ត៌មាន ក្រសួងអប់រំ យុវជន និងកីឡា រៀបចំប្រារព្ធពិធីអបអរសាទរទិវាគ្រូបង្រៀន ៥ តុលា ក្រោមប្រធានបទ “គ្រូបង្រៀនឆ្លាតវៃ ដើម្បីការអប់រំឌីជីថល” នា ថ្ងៃទី៥ ខែតុលា ឆ្នាំ២០២០ នៅវិទ្យាស្ថានជាតិអប់រំ រយៈពេល ១ ថ្ងៃ ដោយមានការចូលរួមពី លោកគ្រូ អ្នកគ្រូ បុគ្គលិកអប់រំ សមាគមបុគ្គលិកសិក្សាខ្មែរ សមាគមគ្រឹះស្ថានឧត្តមសិក្សា និងតំណាងដៃគូអភិវឌ្ឍន៍ពាក់ព័ន្ធ។ ទិវាគ្រូបង្រៀន ៥ តុលា ប្រារព្ធឡើងក្នុងគោលបំណងបំផុសឡើងវិញនូវវប្បធម៌ និងប្រពៃណី របស់សិស្សានុសិស្សទាំងអស់ ឱ្យរំលឹកនូវគុណូបការៈដ៏ថ្លៃថ្លារបស់គ្រូបង្រៀនទូទាំងប្រទេស ដែលពួកគាត់បាន និងកំពុងបំពេញការងារជាអ្នកអប់រំ និងជាសិល្បករផ្ទេរចំណេះដឹងផងដែរ ឬ គ្រូបង្រៀនមួយចំនួនបានចូលនិវត្តន៍ទៅហើយនោះ។
ក្នុងកម្មវិធីនេះ ក៏មានបាឋកថារបស់ឯកឧត្តមបណ្ឌិតសភាចារ្យ ហង់ជួន ណារ៉ុន រដ្ឋមន្ត្រីក្រសួងអប់រំ យុវជន និង កីឡា ស្ដីពី “គ្រូបង្រៀនឆ្លាតវៃ ដើម្បីការអប់រំឌីជីថលនៅកម្ពុជា” និងវេទិកាពិភាក្សាលើប្រធានបទសំខាន់ៗ ចំនួន ២ គឺ ១.ដំណើរការបើកសាលារៀនចំណេះទូទៅឡើងវិញ និងការអប់រំឌីជីថល ២.ការបង្រៀន និងរៀនតាមប្រព័ន្ធបច្ចេក វិទ្យានៅគ្រឹះស្ថានឧត្តមសិក្សា៕ដោយ៖កូឡាប