ភ្នំពេញ៖ ឯកឧត្តម ឃួង ស្រេង អភិបាលរាជធានីភ្នំពេញបានបញ្ជាឱ្យ អភិបាលខណ្ឌទាំង១៤ប្រឹងប្រែងប្រើ ប្រាស់ឱ្យអស់លទ្ធភាព ក្រោមកិច្ចសហការជាមួយភាគីពាក់ព័ន្ធ ធ្វើយ៉ាងណាដឹកជញ្ជូនយកសំរាមចេញពីក្នុងក្រុងទៅកាន់ទីលានចាក់សំរាមឱ្យបានគ្រប់ខណ្ឌ ដោយប្រើប្រាស់យន្តការគ្រប់រូបភាព ដោយចាប់ផ្តើមជាបន្ទាន់ចាប់ពីយប់នេះ។
ឯកឧត្តម ឃួង ស្រេង បានជំរុញបែបនេះធ្វើឡើងនៅក្នុងកិច្ចប្រជុំបន្ទាន់មួយ ជាមួយអភិបាលខណ្ឌទាំង១៤ និងមន្ត្រីពាក់ព័ន្ធក្រោមឱវាទ នៅ រសៀលថ្ងៃទី៧ ខែតុលា ឆ្នាំ២០២០នេះ នៅសាលា រាជធានីភ្នំពេញ។
ឯកឧត្តម ឃួង ស្រេង ក៏បានបញ្ជាឱ្យអភិបាល អភិបាលរងទទួលបន្ទុកយកចិត្តទុកដាក់ តាមដាន និងពិនិត្យសកម្មភាពប្រមូលសំរាមនៅយប់នេះឱ្យបានហ្មត់ចត់ តាមស្មារតីនៃកិច្ចប្រជុំ និងយកលទ្ធផលនៃកិច្ចប្រជុំនារសៀលនេះទៅអនុវត្តឱ្យមានប្រសិទ្ធភាព។
បើតាមប្រសាសន៍របស់ ឯកឧត្តម កើត ឆែ អភិបាលរងរាជធានីភ្នំពេញ បានឱ្យដឹងផងដែរ រដ្ឋបាលរាជធានីភ្នំពេញបានចាត់ចែងរថយន្តដឹកសំរាមរបស់រដ្ឋបាលរាជធនីភ្នំពេញទៅតាមខណ្ឌនីមួយៗរួចហើយ ប៉ុន្តែបើមានតម្រូវចាំបាច់ដើម្បីឆ្លើយតបឱ្យបានទាន់ពេលវេលាបន្ថែមទៀតនោះ សុំអភិបាល ខណ្ឌ ចាត់ចែងជួលរថយន្តបែនដឹកដីឱ្យមកដឹកសំរាមដោយគិតតម្លៃជាតោន ក្នុង១តោនចាប់ពី១០ដុល្លារ ដល់ ១៤ដុល្លាអាមរិក ចំពោះឡានដែលប្រើប្រាស់ប្រេងផ្ទាល់ខ្លួន។ លើសពីនេះថែមទៀត ក៏ត្រូវជួលកម្លាំងកម្មករ រួមទាំងកម្លាំងកម្មកររបស់ក្រុមហ៊ុនស៊ិនទ្រីផងដែរ ដែលក្នុងម្នាក់ផ្តល់ជូន១០ដុល្លានៅពេលថ្ងៃ និងបន្ថែម៥ដុល្លារទៀតសម្រាប់អ្នកធ្វើការពេលយប់។
ឯកឧត្តម អភិបាលរង ក៏បានស្នើឱ្យខណ្ឌនិមួយៗជាពិសេសខណ្ឌជាយក្រុង រកទីកន្លែងឬជួលដីប្រជាពលរដ្ឋណាដែលនៅទំនេរមួយរយៈសម្រាប់ស្តុកសំរាមជាបណ្តោះអាសន្នរង់ចាំរថយន្តដឹកសំរាមមកជញ្ជូនបន្តទៅកាន់ទីលានចាក់សំរាម ធ្វើយ៉ាងណាយប់នេះយកសំរាមឱ្យអស់ពីតាមបណ្តារនានាក្នុងរាជធានីភ្នំពេញ។
ឯកឧត្តម កើត ឆែ ក៏បានសុំគោលការណ៍ពីឯកឧត្តមអភិបាល ដើម្បីចាត់ចែងលេខរៀងខណ្ឌនីមួយៗឱ្យបានច្បាស់លាស់ ជាពិសេសចំពោះរថយន្តបែនដែលខណ្ឌបានជួល ដើម្បីងាយស្រួលគ្រប់គ្រង និងត្រួតពិនិត្យ ក៏ដូចជាងាយស្រួលគ្រប់គ្រងការចំណាយនានានៅក្នុងដំណាក់កាលនេះឱ្យបានច្បាស់លាស់ ឆ្លើយតបឱ្យបានទាន់ពេលវេលាបំផុត ។
សូមបញ្ជាក់ថា បុគ្គលិកក្រុមហ៊ុន ស៊ិនទ្រី (CINTRI) បានយល់ព្រមចូលធ្វើការងារវិញហើយ ក្រោយពួកគេទទួលបានដំណោះស្រាយសមស្របពីសាលារាជធានីភ្នំពេញ ហើយនឹងចាប់ផ្តើមដើរប្រមូលសំរាមវិញ នៅរសៀលថ្ងៃទី៧ ខែតុលា ឆ្នាំ២០២០។ នេះបើយោងតាមការកំណត់ហេតុដំណោះស្រាយរបស់ភាគីពាក់ព័ន្ធ។
ការយល់ព្រមចូលធ្វើការវិញ ដោយភាគីពាក់ព័ន្ធ ព្រមទទួលយកដំណោះស្រាយ និងព្រមព្រៀងចូលធ្វើការវិញរបស់កម្មករក្រុមហ៊ុន ស៊ិនទ្រី (CINTRI) ដែលបានធ្វើឡើងក្រោយបញ្ចប់កិច្ចចរចារវាង ឯកឧត្តម ឃួង ស្រេង អភិបាលរាជធានីភ្នំពេញ ម្ចាស់ក្រុមហ៊ុន ស៊ិនទ្រី (CINTRI) និងកម្មករនិយោជិត នៅឯសាលារាជធានីភ្នំពេញ។ ជាលទ្ធផល នៃការចរចារ ភាគីទាំងអស់ បានព្រមព្រៀងគ្នាលើចំណុចចំនួន ៣រួមមាន៖
ទី១-សូមឱ្យកម្មករនិយោជិតទាំងអស់នាំគ្នាចូលធ្វើការងារជាធម្មតាវិញ ចាប់ពីរសៀលថ្ងៃទី៧ ខែតុលា ឆ្នាំ២០២០នេះតទៅ។
ទី២-ចំពោះសំណើរបស់កម្មករនិយោជិតទាមទារឲ្យក្រុមហ៊ុនដោះស្រាយពេលបញ្ចប់កិច្ចសន្យា គឺ ក្រុមហ៊ុនទទួលដោះស្រាយតាមច្បាប់ស្ដីពីការងារ ហើយរដ្ឋបាលរាជធានីភ្នំពេញ ជាអ្នកធានាខុសត្រូវ។
ទី៣-ចំពោះការងាររបស់កម្មករនិយោជិត ទៅថ្ងៃខាងមុខ រដ្ឋបាលរាជធានីភ្នំពេញ ធានាមិនបាត់បង់ឡើយ ទោះបីក្រុមហ៊ុនស៊ិនទ្រី (CINTRI) ដេញថ្លៃជាប់ ឬមិនជាប់ក៏ដោយ។
សូមបញ្ជាក់ថា បន្ទាប់ពីបញ្ចប់កិច្ចប្រជុំនោះ ឯកឧត្តម ឃួង ស្រេង អភិបាលរាជធានីភ្នំពេញ បានចុះទៅជួបសំណេះសំណាលដោយផ្ទាល់ជាមួយកម្មករក្រុមហ៊ុន ស៊ិនទ្រី (CINTRI) នៅក្នុងភូមិម័ល សង្កាត់ដង្កោ ខណ្ឌដង្កោ ដើម្បីប្រាប់អំពីដំណោះស្រាយ និងការសន្យារបស់រដ្ឋបាលរាជធានីភ្នំពេញ។
គួរបញ្ជាក់ផងដែថា កម្មករប្រមូលសំរាមរបស់ក្រុមហ៊ុន ស៊ិនទ្រី (CINTRI) បាននាំគ្នាធ្វើកូដកម្មឈប់ប្រមូលសំរាម តាំងពីថ្ងៃទី៣ ខែតុលា ឆ្នាំ២០២០ ដើម្បីទាមទារឱ្យអាជ្ញាធរចូលរួមដោះស្រាយ ចំពោះលក្ខខណ្ឌដែលពួកគេបានទាមទារ៕ដោយ៖កូឡាប