ភ្នំពេញ៖ ក្រសួងសុខាភិបាល នៅថ្ងៃទី៩ខែតុលាឆ្នាំ២០២០ បានចេញសេចក្តីសម្រេចបិទមជ្ឈមណ្ឌលសិក្សាជំនាញកែសម្ផស្ស វីនេស (VENUS Academy & Clinic) ដែលមានទីតាំងនៅផ្ទះលេខ៤៥ ផ្លូវលេខ២៤២ (ឧកញ៉ាពេជ្រ) សង្កាត់ចតុមុខ ខណ្ឌដូនពេញ រាជធានីភ្នំពេញ។
នេះបើតាមសេចក្តីសម្រេចរបស់ក្រសួងសុខាភិបាល បានបញ្ជាក់ថា ការបិទមជ្ឈមណ្ឌលសិក្សាជំនាញកែសម្ផស្សវីនេស ដោយមូលហេតុមជ្ឈមណ្ឌលនេះ ផ្តល់សេវាកែសម្ផស្សដោយគ្មានច្បាប់អនុញ្ញាតពីក្រសួងសុខាភិបាល ការវះកាត់កែសម្ផស្ស មិនគោរពតាមបទដ្ឋានបច្ចេកទេស ធ្វើឲ្យប៉ះពាល់ដល់សុខភាពអតិថិជន និងមានចេតនាគេចវេស មិនគោរពតាមការណែនាំរបស់ក្រសួងសុខាភិបាល។
អគ្គនាយកបច្ចេកទេសសុខាភិបាល ប្រធាននាយកដ្ឋានមន្ទីរពេទ្យ ប្រធានមន្ទីរសុខាភិបាលរាជធានីភ្នំពេញ ត្រូវអនុវត្តសេចក្តីសម្រេចនេះឲ្យមានប្រសិទ្ធភាព ចាប់ពីថ្ងៃចុះហត្ថលេខានេះតទៅ៕ដោយ៖បញ្ញាស័ក្តិ
