ភ្នំពេញ៖ ក្រសួងសុខាភិបាល នៅថ្ងៃទី១៦ខែតុលាឆ្នាំ២០២០នេះ បានចេញសេចក្តីជូនព័ត៌មាន ចំពោះការបដិសេធ និងច្រានចោលទាំងស្រុងរបស់ក្រសួងសុខាភិបាល ចំពោះវិធីព្យាបាលជំងឺ ភូតភរ កុហក បោកប្រាស់របស់គ្រូបុរាណ Chea Sokheng តាមបណ្តាញសង្គមហ្វេសប៊ុកឈ្មោះ Chea Sokheng។
ក្រសួងសុខាភិបាល នៃព្រះរាជាណាចក្រកម្ពុជា សូមជម្រាបជូនដល់សាធារណជនទាំងអស់ឱ្យបានជ្រាបថា៖ ក្រសួងសូមធ្វើការបដិសេធ និងច្រានចោលទាំងស្រុង ចំពោះវិធីព្យាបាលជំងឺមិនត្រឹមត្រូវ ភូតភរ កុហក បោកប្រាស់ របស់ គ្រូបុរាណ Chea Sokheng នៅលើបណ្តាញសង្គមហ្វេសប៊ុកដែលមានគណនេយ្យឈ្មោះ Chea Sokheng ដែលពុំ មានច្បាប់អនុញ្ញាតពីក្រសួងសុខាភិបាលគ្មានជំនាញវិជ្ជាជីវៈវេជ្ជសាស្ត្រត្រឹមត្រូវ មិនគោរពច្បាប់ស្តីពីអ្នកប្រកបវិជ្ជាជីវៈ សុខាភិបាល និងមិនគោរពក្រមសីលធម៌គ្រូពេទ្យ ដែលបានឈរពិនិត្យហ្វីល និងព្យាបាលអ្នកជំងឺទាំងខ្លួនមិនមានជំនាញ ពេទ្យទាល់តែសោះ។ ដូចនេះ ក្រសួងសុខាភិបាលសូមអំពាវនាវទៅដល់បងប្អូនប្រជាពលរដ្ឋទាំងអស់ សូមកុំជឿតាមការ ឃោសនា ភូតភរ កុហក បោកប្រាស់ របស់គ្រូបុរាណ Chea Sokheng បែបនេះតទៅទៀត ព្រោះវាធ្វើឱ្យប៉ះពាល់ទៅដល់ សុខភាពរបស់បងប្អូន។
ក្រសួងសុខាភិបាល សូមគ្រូបុរាណ Chea Sokheng បញ្ឈប់ការផ្សព្វផ្សាយ និងទង្វើបែបនេះជាបន្ទាន់ និងសូម ឱ្យអាជ្ញាធរមានសមត្ថកិច្ចជួយចាត់វិធានការយ៉ាងតឹងរឹង និងម៉ឺងម៉ាត់បំផុត ចំពោះគ្រូបុរាណ Chea Sokheng តាមផ្លូវច្បាប់ជាធរមាន។
សូមភ្ជាប់មកជាមួយនូវរូបភាពរបស់គណនេយ្យហ្វេសប៊ុកឈ្មោះ Chea Sokheng ៕ដោយ៖បញ្ញាស័ក្តិ
