ដូចដែលបងប្អូនយើងទាំងអស់គ្នាបានជ្រាបច្បាស់ហើយថា តំបន់ស្រុកមួយចំនួនធំនៅតាមបណ្តាខេត្ត និងរាធនី នៅក្នុងប្រទេសកម្ពុជា នៅពេលនេះបាននិងកំពុងរងការលិចលង់យ៉ាងធ្ងន់ធ្ងរ ដែលធ្វើឲ្យប្រជាពលរដ្ឋរាប់ម៉ឺននាក់ ទាំងនៅក្នុងទីក្រុងភ្នំពេញ និងតាមបណ្តាខេត្ត ជួបការលំបាកយ៉ាងខ្លាំង ព្រោះតែផ្ទះសម្បែង និងស្រែកចំការរបស់ពួកគាត់ ត្រូវទឹកជន់លិចគ្មានសល់។
តែទោះយ៉ាងណា ជាមួយនឹងទុក្ខលំបាកនៅចំពោះមុខនេះ ឃើញថាថ្នាក់ដឹកនាំរបស់យើងបានកំពុងយកចិត្តទុក និងផ្តល់ភាពកក់ក្តៅបំផុត ដល់បងប្អូនប្រជាពលរដ្ឋរងគ្រោះនៅគ្រប់ទីកន្លែងដោយមិនទុកឲ្យប្រជាពលរដ្ឋណាម្នាក់ស្លាប់នៅក្នុងគ្រោះជំនន់ទឹកភ្លៀងនេះបានឡើយ។
ជាមួយគ្នានេះផងដែរ ក៏មានសប្បុរសជនយ៉ាងច្រើន បានឧបត្ថម្ភជាថវិកា និងស្បៀងអាហារយ៉ាងអនេក ដើម្បីចូលរួមចំណែកការលំបាករបស់រាជរដ្ឋាភិបាល ដែលធ្វើឲ្យបងប្អូនខ្មែរយើង ពិតរំភើបចិត្តខ្លាំងណាស់ ពេលបានឃើញខ្មែរយើងឥឡូវ ចេះជួយគ្នា ចេះស្រឡាញ់គ្នា ក្នុងនាមជាខ្មែរដូចគ្នា ពេលឃើញជួបទុក្ខលំបាកក្នុងគ្រោះធម្មជាតិបែបនេះ។
យ៉ាងណាមិញ អ្វីដែលគួរឲ្យកោតសរសើរជាខ្លាំងនោះ គឺក្រោយឃើញបងប្រុសម្នាក់ឈ្មោះ ចៅ គីង្គក់ បើទោះជាគាត់ពិការភាពពិតមែន តែបេះដូងគាត់មិនពិការទេ ដោយគាត់បានឧបត្ថម្ភថវិកាផ្ទាល់ខ្លួនចំនួន ២ ម៉ឺនរៀល ដើម្បីទិញស្អៀងអាហារដល់បងប្អូនរងគ្រោះដោយសារទឹកលិចលង់ផ្ទះសម្បែង។
ជាក់ស្តែង បើយោងទៅតាមការបង្ហោះរបស់លោក ពេជ្រ ស្រស់ បានឲ្យដឹងថា៖ «បងប្រុសឈ្មោះ ចៅ គីង្គក់ ពិការភាពពិតមែនប៉ុន្តែបេះដូងគាត់មិនពិការទេ គាត់បានឧបត្ថម្ភ២ម៉ឺនរៀលដើម្បីទិញស្បៀងដល់បងប្អូនត្រូវទឹកជន់លិច ខ្ញុំពិតជាមានមោទនភាព ចំពោះបេះដូងបងណាស់ ហើយខ្ញុំ នឹងឧបត្ថម្ភថវិកាជូនបងប្រុស20$វិញដើម្បីទុកទិញអាហារ។ បុណ្យកើតចេញពីការលះបង់និងចេតនាបរិសុទ្ធ»៕ ដោយ៖ លឹម ហុង
