នេះជាខណៈពេលដ៏ស្លុតរន្ធត់មួយ ដែលបុរសស្រវឹងម្នាក់ បានធ្លាក់ចេញពីរថយន្ត នៅពេលដែលគាត់បានបើកទ្វារថយន្តខាងក្រោយ ដើម្បីក្អួត ខណៈដែលប្រពន្ធគាត់ជាអ្នកកាន់ចង្កូតឡាន បានដឹងប៉ុន្មាននាទីក្រោយមកប៉ុណ្ណោះ ។
យោងតាមប៉ូលីសចរាចរណ៍ នៅក្នុងខេត្ត Jiangsu ប្រទេសចិន បុរសម្នាក់បានទៅចូលរួមពិធីជប់លៀងមួយ ជាមួយប្រពន្ធរបស់គាត់ ។ ជាការពិតណាស់ ស្រាបៀរគឺជារឿងពិបាកនឹងជៀសវាងបានណាស់ សម្រាប់មនុស្សប្រុសភាគច្រើន តួយ៉ាងដូចជាបុរសរងគ្រោះម្នាក់នេះអីចឹង ។
ខណៈពេលនោះ បុរសរូបនេះបានផឹកស្រាយ៉ាងជោគជាំ ប៉ុន្តែ សំណាង ដែលបានប្រពន្ធរបស់គាត់អាចបើករថយន្ត ដឹកយកគាត់ទៅផ្ទះបាន ។ គាត់ត្រូវបានគេគ្រាដាក់ឲ្យដេកនៅកៅអីក្រោយរថយន្ត ខណៈប្រពន្ធរបស់គាត់ជាអ្នកបញ្ជារថយន្ត ។ ប៉ុន្តែ នៅតាមផ្លូវ គាត់ក៏មានអារម្មណ៍ចង់ក្អួត និងបើកទ្វាររថយន្ត ដើម្បីក្អួត ប៉ុន្តែ ជាអកុសល គាត់ពុំអាចគ្រប់គ្រងខ្លួនបាន គាត់ក៏បានដាំក្បាលធ្លាក់ពីរថយន្តទាំងកម្រោលតែម្តង ។
ទោះយ៉ាងណា ប្រពន្ធរបស់គាត់ពុំបានដឹងនោះទេ ដោយសារតែផ្តោតការបើកបរ ។ ប៉ុន្តែ ប៉ុន្មានវិនាទីក្រោយមក នាងបានបើករថយន្តត្រឡប់ក្រោយវិញ ដើម្បីតាមរកប្តី បន្ទាប់ពីដឹងថា នាងកំពុងស្ថិតនៅក្នុងរថយន្តតែម្នាក់ឯង និងពុំដឹងថា ប្តី «ជ្រុះ» តាមថ្នល់ពីអង្កាល់ណាមកនោះ!! ៕ ចន្ទី
