ភ្នំពេញ៖ ក្រសួងទេសចរណ៍ នាថ្ងៃទី២៦ ខែតុលា ឆ្នាំ២០២០នេះ បានឱ្យដឹងថា ក្នុងរយៈពេល៩ខែ ឆ្នាំ២០២០ ទេសចរអន្តរជាតិមកទស្សនាកម្ពុជាមានត្រឹមតែ ១.២៤៧.៦៨០នាក់ ថយចុះ ៧៤,១% និងទទួលបានទេសចរផ្ទៃក្នុង ៧.២៨៤.៤០៩នាក់ ថយចុះ ៥១,៩% ដែលការថយចុះនេះគឺដោយសាររងផលប៉ះពាល់ខ្លាំងពីវិបត្តិជំងឺកូវីដ-១៩។
ក្នុងដំណាក់កាលវិបត្តិកូវីដ-១៩ ចាប់ពីខែមេសា ដល់ខែកញ្ញា និន្នាការទេសចរណ៍មានការប្រែប្រួលយ៉ាងខ្លាំង ជាក់ស្ដែង ទេសចរសម្រាកលំហែកម្សាន្តមាន ៤៣,៤% ទេសចរធុរកិច្ច និងការទូតមាន ៥៤,៤% និងផ្សេងៗ ២,៣%។ កាលពីឆ្នាំ២០១៩ ទេសចរសម្រាកលំហែកម្សាន្តមានរហូតដល់ ៧៦,២% ទេសចរធុរកិច្ច និងការទូតមាន ២០,៧% និងប្រភេទផ្សេងៗ ៣,១%)។
តាមការព្យាករណ៍នៅឆ្នាំ២០២០ កម្ពុជានឹងទទួលទេសចរអន្តរជាតិប្រមាណ ១.៣២លាននាក់ ថយចុះ ៨០% ធៀបនឹងឆ្នាំ២០១៩។
អ្នកជំនាញទេសចរណ៍បានវាយតម្លៃថា ស្ថានភាពទេសចរណ៍កម្ពុជានឹងវិលត្រលប់មកប្រក្រតីភាពឡើងវិញ តាមសេណារីយ៉ូចំនួន ២៖ សេណារីយ៉ូទី១ ប្រើរយៈពេល ៣ឆ្នាំ (២០២០-២០២៣) និង សេណារីយ៉ូទី២ ប្រើរយៈពេល ៥ឆ្នាំ (២០២០-២០២៥)។
ក្រសួងទេសចរណ៍បានបន្តថា រយៈពេល៩ខែ ឆ្នាំ២០២០ មានទេសចរផ្ទៃក្នុង ៧.២៨៤.៤០៩នាក់ ដែលបានធ្វើដំណើរកម្សាន្តតាមរមណីដ្ឋាននានាទូទាំងប្រទេស ថយចុះ ៥១,៩% ធៀបនឹងរយៈពេលដូចគ្នាក្នុងឆ្នាំ២០១៩ ក្នុងនោះទេសចរជាតិមានប្រមាណ ៥.៥៦២.៥៣១នាក់ ថយចុះ ៣៨,២% និងទេសចរបរទេសមានប្រមាណ ១.៧២១.៨៧៨នាក់ ថយចុះ ៧២%។
តាមការព្យាករណ៍ ឆ្នាំ២០២០ កម្ពុជានឹងទទួលទេសចរផ្ទៃក្នុងបានប្រមាណ ៩លាននាក់ ថយចុះ ២០% ធៀបនឹងឆ្នាំ២០១៩ ខណៈទេសចរផ្ទៃក្នុងនឹងវិលមកប្រក្រតីភាពឡើងវិញក្នុងរយៈពេល ៣ឆ្នាំ ពោលគីឆ្នាំ២០២៣ កម្ពុជានឹងទទួលបាន ១១លាននាក់។
នារសៀលថ្ងៃទី ២៦ ខែតុលា ឆ្នាំ២០២០ ឯកឧត្តមរដ្ឋមន្ត្រី ថោង ខុន បានដឹកនាំកិច្ចប្រជុំបូកសរុបលទ្ធផលការងារទេសចរណ៍រយៈពេល ៩ខែ ដើមឆ្នាំ២០២០ និងទិសដៅអនុវត្តបន្តត្រីមាសទី៤ ឆ្នាំ២០២០ ដោយមានការចូលរួមពីថ្នាក់ដឹកនាំ មន្ត្រីក្រសួង និងប្រធានមន្ទីរទេសចរណ៍រាជធានីខេត្ត ប្រមាណ ១៣០នាក់។
កិច្ចប្រជុំនេះធ្វើឡើងដើម្បីបូកសរុប ឆ្លុះបញ្ចាំង និងវាយតម្លៃពីលទ្ធផលអនុវត្តការងាររយៈពេល៩ខែ ឆ្នាំ២០២០ កន្លងមក និងការដាក់ចេញនូវផែនការ យុទ្ធសាស្ត្រ និងទិសដៅអនុវត្តបន្ត ក្នុងដំណាក់កាលវិបត្តិជំងឺឆ្លងសកលកូវីដ-១៩។
កិច្ចប្រជុំនេះមានបទអន្តរាគមន៍លើប្រធានបទចំនួនសំខាន់ៗ ៦ ដូចជា៖ ផែនការអនុវត្តវិធានសុវត្ថិភាពទេសចរណ៍។ ផែនការសកម្មភាពជំរុញចលនាទេសចរណ៍ផ្ទៃក្នុង និងការពង្រឹងមណ្ឌលព័ត៌មានទេសចរណ៍ ។ ការអភិវឌ្ឍផលិតផលទេសចរណ៍ថ្មីៗ និងសហគមន៍ទេសចរណ៍ ។ កិច្ចសហប្រតិបត្តិការទេសចរណ៍ជាមួយ UNWTO, WTTC, ASEAN, ASEAN+3 ។ ការបណ្តុះបណ្តាលជំនាញវិជ្ជាជីវៈទេសចរណ៍តាមប្រព័ន្ធអនឡាញ។ ការពង្រឹងរចនាសម្ព័ន្ធ និងវិន័យមន្ត្រីរាជការនៅថ្នាក់ក្រសួង និងថ្នាក់មន្ទីរទេសចរណ៍រាជធានី ខេត្ត៕
ដោយ៖បញ្ញាស័ក្តិ
