ខេត្តកណ្ដាល៖ ក្រសួងអប់រំ យុវជន និងកីឡា បានធ្វើការចុះពិនិត្យស្ថានភាពគ្រឹះស្ថានសិក្សាប៉ះពាល់ដោយជំនន់ទឹកភ្លៀង ដែលត្រូវបានបិទបណ្ដោះអាសន្នក្នុងកំឡុងពេលនៃការបើកសាលាឡើងវិញដំណាក់កាលទី២នេះ ដើម្បីសិក្សាពិនិត្យមើលឲ្យបានច្បាស់លាស់ពីស្ថានភាពជាក់ស្ដែង និងចូលរួមសហការ ចាត់វិធានការដោះស្រាយរៀបចំបរិស្ថានសាលារៀនឡើងវិញឲ្យទាន់ពេលវេលានៅពេលចប់គ្រោះទឹកជំនន់។ ការចុះពិនិត្យស្ថានភាពគ្រឹះស្ថានសិក្សាប៉ះពាល់ដោយជំនន់ ២៧ តុលា ២០២០ សាលាបឋមសិក្សា និងអនុវិទ្យាល័យ អង្គស្នួល ខេត្តកណ្ដាល
ដើម្បីជាការរួមចំណែករំលែកនូវបញ្ហា និងជាការលើកទឹកចិត្តដល់គណ:គ្រប់គ្រង លោកគ្រូ អ្នកគ្រូ សិស្សានុសិស្ស ថ្នាក់ដឹកនាំក្រសួងយើងបាននាំយកនូវសម្ភារ:សិក្សា សម្ភារ:អនាម័យ និងស្បៀងអាហារមួយចំនួនដើម្បីចែកជូនផងដែរ ដែលរួមមាន៖ សៀវភៅ ប៊ិច ខ្មៅដៃ បន្ទាត់ ម៉ាស ជែល ឧបករណ៍លាងដៃស្វ័យប្រវត្តិ ក្ដារខៀន មីម៉ាម៉ា អង្ករ ទឹកត្រី ត្រីខ អំបិល ប៊ីចេង ទឹកសុទ្ធ។
ការចុះត្រួតពិនិត្យនេះត្រូវបានរៀបចំឡើងក្រោមអធិបតីភាព ឯកឧត្ដមបណ្ឌិតសភាចារ្យ ហង់ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា។ ក្នុងឱកាសនេះដែរ ឯកឧត្ដមបានមានប្រសាសន៍ថ្លែងអំណរគុណដល់គណ:គ្រប់គ្រង និងលោកគ្រូ អ្នកគ្រូទាំងអស់ដែលបានខិតខំប្រឹងប្រែងបង្រៀនសិស្សក្នុងកំឡុងពេលបិទសាលាដោយសារជំងឺកូវីដ-១៩ ដោយបន្តបង្រៀនតាមប្រព័ន្ធអនឡាញ ក៏ដូចជាបង្រៀនជាបណ្ដុំ និងបង្រៀនពីចម្ងាយតាមបែបប្រពៃណីជាដើម។ ក្រោយពីសំណេះសំណាលចប់ឯកឧត្ដមក៏បាននាំសហការី អញ្ជើញដើរពិនិត្យជុំវិញបរិវេណសាលាផងដែរ៕ ដោយ៖បញ្ញាស័ក្តិ
