ភ្នំពេញ៖ ក្នុងរយៈពេល៨ខែ ឆ្នាំ២០២០ចុងក្រោយនេះ សំណង់បុរីលំនៅឋាន បន្តកំណើនរឹងមាំ។ គម្រោងវិនិយោគបុរីលំនៅឋាន នៅតែបន្តកំណើនខ្ពស់ ដែលជួយទ្រទ្រង់ដល់ការវិនិយោគរួមក្នុងវិស័យសំណង់ឱ្យស្ថិតស្ថេរ ក្នុងអត្រាថមថយទាប។
លោកស្រី ហ្គ្រេស រចនី អគ្គនាយិកាក្រុមហ៊ុនអចលនទ្រព្យ Century 21 Cambodia បានលើកឡើងថា តម្រូវការលំនៅឋាន បុរីដែលមានតម្លៃ មធ្យមនៅតែរក្សាបានដំណើរការល្អ ដោយសារតែម្ចាស់គម្រោងផ្តោតលើអតិថិជន ក្នុងស្រុក។
លោកស្រី បានថ្លែងថា៖ «ម្ចាស់គម្រោងនៅតែបន្តអភិវឌ្ឍ និងបើកដំណើរការគម្រោង ថ្មីៗរបស់ពួកគេពីមួយដំណាក់កាលទៅមួយដំណា ក់កាល ដែលមិនឃើញជាសញ្ញាណាមួយដែលថាការផ្គត់ផ្គង់នេះលើសពីតម្រូវក្នុងទីផ្សារនោះទេ។ ម្យ៉ាងវិញទៀតម្ចាស់គម្រោងប្រើប្រា ស់យុទ្ធសាស្ត្រ ដែលផ្តល់លក្ខណ្ឌក្នុងការលក់ទៅឱ្យអតិថិជនមានភាពងាយស្រួលជាងឆ្នាំមុន។»
របាយការណ៍របស់ក្រសួងសេដ្ឋកិច្ច និងហិរញ្ញវត្ថុ ដែលចេញផ្សាយនៅថ្ងៃទី ៤ ខែវិច្ជិកា ឆ្នាំ២០២០នេះ បានបង្ហាញ គម្រោងសំណង់លំនៅឋាននៅតែបន្តមានកំណើនល្អក្នុងរយៈពេល៨ខែដំបូងឆ្នាំនេះ ដែលមានចំនួន២,៨១៩គម្រោង ឬស្មើនឹង ៨៤% នៃគម្រោងសាងសង់សរុប។ គម្រោងសំណង់លំនៅឋាននេះកើនឡើង៦.៥% បើធៀបនឹង រយៈពេលដូចគ្នាកាលពីឆ្នាំមុន។
របាយការណ៍ដដែលបានគូសបញ្ជាក់ថា គម្រោងដែលបើកដំណើរការថ្មីទាំងនេះគ្រប់ដណ្តប់ក្នុងខណ្ឌចំនួន៦ មានដូចជាខណ្ឌសែនសុខ កំបូល ព្រែកភ្នៅ ដង្កោ ជ្រោយចង្វារ និងខណ្ឌមានជ័យ។ ក្នុងចំណមនោះខណ្ឌសែន សុខមានចំណែក៦០ភាគរយនៃគម្រោងលំនៅឋានថ្មីសរុប ដែលបើកដំណើរការ។
លោកស្រីហ្គ្រេស រចនី បានបន្ថែមថា សម្រាប់លំនៅឋានដែលមានតម្លៃមធ្យម នៅតែដំណើរការល្អ ព្រោះអតិថិជនទិញគម្រោងលំនៅឋានកម្រិតនេះ គឺទិញដើម្បីរស់នៅ មិនមែន សម្រាប់វិនិយោគបន្ត នោះទេ។
គួរបញ្ជាក់ថា បើរបាយការណ៍ខាងលើ គម្រោងស្នើសុំសាងសង់សរុបនៅ ៨ ខែដំបូងឆ្នាំនេះ មាន ៣,៣៥០គម្រោង កើនឡើង៦.៣% បើធៀបនឹងរយៈពេលដូចគ្នាក្នុងឆ្នាំ២០១៩ តែទំហំទុនវិនិយោគសរុបក្នុងវិស័យសំណង់មានការធ្លាក់ចុះបន្តិចដែលមានទឹកប្រាក់ត្រឹមតែ ៥,០៨១ លានដុល្លារ។ ផ្ទៃក្រឡាសំណង់នៃគម្រោងស្នើសុំសាងសង់នេះមានជាង១១លានម៉ែត្រការ៉េ៕
ដោយ៖CEN
