ខ្សែវីដេអូឃ្លាំមើល បានបង្ហាញឲ្យឃើញបុរសចំណាស់ពាក់អាវពណ៌ខៀវ ស្លៀកខោខូវប៊យ បានដើរសសៀចិញ្ចើមផ្លូវ និងបានទៅឈរអែប (ពួន) នឹងបង្គោលភ្លើង ដើម្បីរង់ចាំមើល «ឱកាសល្អ» មកដល់ ។ ភ្លាមៗនោះ នៅពេលឃើញរថយន្តតូច១គ្រឿងចូលមកកៀក បុរសមានល្បិចរូបនេះ ក៏បានចុះផ្លូវ និងផ្តេកខ្លួនទៅផ្ទប់នឹងជញ្ជាំងរថយន្ត ហើយធ្វើជាដួលទៅនឹងដី និងបង្ហាញកាយវិការហាក់ដូចជារងរបួសជើងធ្ងន់ធ្ងរអីចឹង ។
ភ្លាមៗនោះ ស្ត្រីជាម្ចាស់រថយន្តនោះ ក៏បានចុះមកពិនិត្យមើល និងបានជួយលើកគាត់ទៅលើចិញ្ចើមថ្នល់ ខណៈបុរសនេះនៅតែធ្វើជាឈឺចុកចាប់នៅត្រង់ជើងរបស់គាត់យ៉ាងខ្លាំង ។ ខណៈរថយន្តរថយន្តជាច្រើនទៀត កំពុងស្ទះចរាចរណ៍នៅពីក្រោយរថយន្តរបស់នាង ជាហេតុធ្វើឲ្យនាងរងសម្ពាធត្រូវតែ «ដោះស្រាយ» ឲ្យបានឆាប់ក្នុងករណីនេះ ។
ស្ត្រីនោះត្រូវបានឃើញយកអ្វីពីរថយន្ត និងហុចវាទៅឲ្យបុរសនោះ ។ គេក៏បានជឿថា ស្ត្រីនោះប្រាកដណាស់ជាបានដោះស្រាយ «លុយថ្លៃព្យាបាល» សម្រាប់បុរសនោះ មុនពេលបើករថយន្តចាកចេញ ។
បន្ទាប់ទទួលបានសំណងរួច បុរសនេះក៏ត្រូវបានឃើញអើតឆ្វេងស្តាំ ដើម្បីសម្លឹងរកមធ្យោបាយចាកចេញ ខណៈនៅតែស្ទាបជើងហាក់ដូចពុំទាន់បាត់ឈឺ ។ ទោះយ៉ាងណា ប៉ុន្មានវិនាទីក្រោយមក បុរសនេះក៏រកឃើញមធ្យោបាយធ្វើដំណើរ និងលោតជើងម្ខាងឆ្លងផ្លូវឡើង «ទំ» លើម៉ូតូកង់បី១គ្រឿងចាកចេញទៅ ៕ ចន្ទី
