ភ្នំពេញ៖ ឯកឧត្តម វ៉ាត់ ចំរើន អគ្គលេខាធិការ សហព័ន្ធកីឡាការ៉ាតេកម្ពុជាអះអាងថា បច្ចុប្បន្នសហព័ន្ធបានធ្វើកំណែទម្រង់បច្ចេកទេស ដែលទទួលបានគ្រូបង្វឹកអន្តរជាតិពីរនាក់ គឺមកពីអ៊ីរ៉ង់ និងជប៉ុន ហើយគ្រូអ៊ីរ៉ង់បានពិនិត្យ និងការវាយតម្លៃឃើញថា កម្រិតគុណភាពបច្ចេកទេសរបស់គ្រូបង្វឹក កីឡាករ កីឡាការិនីកម្ពុជានៅទាបខ្លាំងនៅឡើយ បើប្រៀបធៀបនឹងបណ្តាប្រទេសនានា ទាំងគុណភាពកម្លាំងកាយ បច្ចេកទេស និងយុទ្ធសាស្ត្រ។
ឯកឧត្តមអគ្គលេខាធិការបញ្ជាក់ថា តាមការផ្តល់អនុសាសន៍របស់ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ និងជាប្រធានសហព័ន្ធកីឡាការ៉ាតេកម្ពុជា បានណែនំឲ្យមានការធ្វើកំណែទម្រង់អំពីការវិនិច្ឆ័យរបស់អាជ្ញាកណ្តាល-ចៅក្រម ដើម្បីស្វែងរក Fair Play ដែលធ្វើឲ្យកីឡាករ កីឡាការិនី ដែលចូលរួមប្រកួតមានទំនុកចិត្តខ្ពស់ តាមរយៈការបំពាក់ឧបករណ៍ទំនើបៗជំនួយ។ នៅក្នុងការប្រកួតជ្រើសរើសជើងឯកថ្នាក់ជាតិកីឡាការ៉ាតេ ប្រចាំ២០២០ ដែលទើបបញ្ចប់ការពេលថ្មីៗនេះ សហព័ន្ធទើបចាប់ផ្តើមរៀបចំការប្រកួតតាមស្តង់ដាបច្ចេកទេស ដែលធ្វើឲ្យការប្រកួតបែបទំនើបនេះមិនទាន់បានរលូនល្អនៅឡើយ។ ជាមួយគ្នានោះ ឯកឧត្តមប្រធានសហព័ន្ធក៏បានស្នើសុំឲ្យមានការបង្រួបបង្រួមគ្នា ក្នុងគ្រួសារកីឡាការ៉តេកម្ពុជាឡើងវិញឲ្យមានសុខដុមនីកម្ម ដើម្បីបន្តការអភិវឌ្ឍឲ្យវិស័យកីឡាជំនាញមួយនេះបានរីចម្រើន ឆ្ពោះទៅទទួលរៀបចំធ្វើជាម្ចាស់ផ្ទះ ការប្រកួតកីឡា ស៊ីហ្គេម លើកទី៣២ ឆ្នាំ២០២៣ ផងដែរ។
ឯកឧត្តមបានលើកឡើងនូវការបង្ហាញរបស់គ្រូអ៊ីរ៉ង់ លោក Hassan ថា កីឡាករ កីឡារិនីកម្ពុជាប្រើបានតែមួយក្បាច់ ឬមួយបច្ចេកទេស ពេលឡើងប្រកួតជើងឯកថ្នាក់ជាតិកន្លងទៅថ្មីៗនេះ។ ដូច្នេះហើយគ្រូបង្វឹកជម្រើសជាតិកម្ពុជា២រូប ដែលជាជនជាតិអ៊ីរ៉ង់លោក Hassan និងគ្រូជប៉ុន លោក Shoki Toyarma នឹងពង្រឹងឡើងវិញលើផ្នែកគុណភាពបច្ចេកទេសប្រយុទ្ធ និងកាតា ដើម្បីត្រៀមចូលរួមប្រកួត ស៊ីហ្គេម លើកទី៣១ នៅវៀតណាម ចុងឆ្នាំ២០២១ និងឆ្ពោះ ស៊ីហ្គេម លើកទី៣២ ឆ្នាំ២០២៣ នៅកម្ពុជា។
បើកាលណាមានការគាំទ្រពីថ្នាក់ដឹកនាំ ហើយយើងធ្វើទៅត្រូវនឹង កម្រិតបច្ចេកទេស នោះបច្ចេកទេសនឹងលូតឡើងឆាប់រហ័ស ហើយបើកាលណាយើងនៅតែមានបញ្ហាផ្ទៃក្នុង នោះសហព័ន្ធកីឡានីមួយៗនឹងមិនអាចរីកចម្រើនបានឡើយ។ ដូច្នេះនៅឆ្នាំ២០២១ សហព័ន្ធកីឡាការ៉តេកម្ពុជានឹងសម្រិតសម្រាំងពិតប្រាកដហើយ ដោយសារយើងមានគ្រូឯកទេសកម្រិតខ្ពស់អន្តរជាតិ២រូប មកជួយដល់បច្ចេកទេស ដល់ក្រុមជម្រើសជាតិ គ្រូអ៊ីរ៉ង់ លោក Hassan ធ្លាប់បង្វាត់ក្រុមកីឡាករកីឡាការិនីវៀតណាម៤ឆ្នាំ ដែលធ្វើឲ្យវៀតណាម អាចដណ្តើមមេដាយដល់កម្រិតពិភពលោក។ លោក Hassan បញ្ជាក់ថា កាលលោកទៅបង្វឹកនៅប្រទេសវៀតណាម គឺកម្រិតកីឡាករ កីឡាការិនីការ៉តេវៀតណាម ដូចកម្ពុជាយើងដែរ ប៉ុន្តែសំខាន់គឺកម្ពុជាមិនមានពេលគ្រប់គ្រាន់ដល់ទៅ៤ឆ្នាំ នោះទេ ដោយការត្រៀមស៊ីហ្គេម លើកទី៣២ ឆ្នាំ២០២៣ គឺកម្ពុជានៅដល់ពេលតែជាង២ឆ្នាំប៉ុណ្ណោះ ដែលតាមធម្មតា ការអភិវឌ្ឍបច្ចេកទេសគឺត្រូវការពេល៤ឆ្នាំ ស្មើនឹងមួយជុំអូឡាំពិក ដូច្នេះគ្រូបង្វឹកអ៊ីរ៉ង់រូបនេះសម្តែងការសោកស្តាយ ដែលមាន រយៈពេលខ្លីបន្តិច។
ឯកឧត្តម វ៉ាត់ ចំរើន លើកឡើងទៀត ទោះយ៉ាងនេះក្តី ក៏សហព័ន្ធកំពុងខិតខំរកយុទ្ធសាស្ត្រពិសេស ដើម្បីពង្រឹង បច្ចេកទេសឲ្យកាន់រឹងមាំ ដោយឯកឧត្តមដាក់ក្តីសង្ឃឹម ដែលសហព័ន្ធទទួលបានគ្រូអន្តរជាតិពីររូបនេះ ដែលគ្រូជប៉ុន លោក Shoki Toyarma នឹងពង្រឹងលើផ្នែកកាតា ដែលប្រទេសជប៉ុន នៅតែឈរនៅលំដាប់ថ្នាក់លេខ១លើកីឡាការ៉ាតេ លើពិភពលោក បើផ្នែកប្រយុទ្ធ គឺនៅចាញ់បណ្តាប្រទេសអឺរ៉ុប អ៊ីរ៉ង…ជាដើម។ នៅឆ្នាំ២០២១ កីឡាការ៉ាតេកម្ពុជានឹងប្រែប្រួល ក្នុងរបត់ថ្មីមួយ សម្រាប់ដំណើរការអភិវឌ្ឍន៍របស់ខ្លួន។ កន្លងមក ការហ្វឹកហាត់របស់ក្រុមជម្រើសជាតិការ៉ាតេមិនត្រូវ ពេលវេលា ដែលអាចលូតលាស់បានទេ ឧទាហរណ៍ដូចជា ការហ្វឹកហាត់ពេលព្រឹក និងទៅរៀន នៅពេលល្ងាចជាដើម ដែលខុសពីក្បួនវិទ្យាសាស្ត្រកីឡា ដែលតាមតាមធម្មតាហ្វឹកហាត់ហើយ ត្រូវសម្រាកសិន។
«នៅក្នុងការប្រកួត ស៊ីហ្គេម លើកទី៣១ នៅប្រទេសវៀតណាម នាចុងឆ្នាំ២០២១ ខាងមុខ កីឡាការ៉េតេមានការលំបាកបន្តិច ក្នុងការប្រជែងមេដាយមាស ដោយយើងរំពឹងត្រឹមមេដាយសំរឹទ្ធ ប៉ុន្តែប្រសិនបើគ្រូបង្វឹកជម្រើសជាតិកម្ពុជាជា ជនជាតិអ៊ីរ៉ង់រូបនេះអាចស្វែងរកឃើញកីឡាករ កីឡាការិនីមានទេពកោសល្យខ្ពស់ នោះគាត់អាចបង្វឹកត្រឹមតែ១ឆ្នាំគឺគាត់អាចឲ្យកូនសិស្សរបស់គាត់ស្វែងរកមេដាយមាសបាន។ បើប្រៀបធៀបគុណភាពបច្ចេកទេសកីឡាការ៉ាតេកម្ពុជាជាមួយ បណ្តាប្រទេសអាស៊ីអាគ្នេយ៍ គឺយើងនៅទាបជាងគេ។ ដូច្នេះហើយទើបយើងកំពុងតែខិតខំឲ្យអស់ពីលទ្ធភាព ដើម្បីជំរុញការអភិវឌ្ឍឲ្យបានកាន់តែរឹងមាំ តាមរយៈការប្រកួតក្នុងស្រុកឲ្យបានច្រើន និងត្រៀមទទួលរៀបចំធ្វើជាម្ចាស់ផ្ទះ ការប្រកួតកីឡាការ៉ាតេ ជើងឯកអាស៊ីអាគ្នេយ៍ នាឆ្នាំ២០២១ និងត្រៀមធ្វើម្ចាស់ផ្ទះ ការប្រកួតមុន ស៊ីហ្គេម (Pre-SEA Games) នាឆ្នាំ២០២២ ដើម្បីវាយតម្លៃ និងដាក់គោលដៅថាអាចដណ្តើមបានមេដាយប៉ុន្មានគ្រឿង ក្នុងពេលប្រកួត ស៊ីហ្គេម ឆ្នាំ២០២៣។» នេះជាការលើកឡើងបន្ថែមរបស់ឯកឧត្តម វ៉ាត់ ចំរើន៕ដោយ៖បញ្ញាស័ក្តិ
