ភ្នំពេញ៖ និយាយដល់រហស្សនាម កូននាដឆ្លងដែន ឬកែងផ្តាច់សង្ខារ នោះប្រិយមិត្តទស្សនិកជនយ៉ាងច្រើន ជាពិសេសអ្នកស្នេហាវិស័យប្រដាល់ ប្រាកដណាស់បានស្គាល់ច្បាស់ហើយ គឺកីឡាករ វង្ស ណយ ជាជើងខ្លាំងមួយរូប ដែលបានសាងកេរ្តិ៍ឈ្មោះដ៏ល្បីល្បាញនៅក្នុងពិភពគុនខ្មែរជាយូរឆ្នាំមកហើយ។
ទោះជាយ៉ាងណា ដោយសារកម្លាំងចេះតែថយចុះទៅតាមវ័យ ហើយការប្រកួតក៏ធ្លាក់ចុះ ពោលគឺលទ្ធផលចាញ់ច្រើនជាងឈ្នះ ធ្វើឲ្យអ្នកគាំទ្រសឹងតែអស់ទំនុកចិត្ត ជាហេតុធ្វើឲ្យអតីតកីឡាករលំដាប់កំពូលរូបនេះ សម្រេចចិត្តលាចាកពីវិស័យប្រដាល់នេះអស់រយៈពេលប្រហែល១ឆ្នាំហើយ។
តែយ៉ាងណាមិញ កាលពីពេលថ្មីៗនេះ លោក វង្ស ណយ បានប្រាប់ទៅកាន់អ្នកគាំទ្រថា លោកនឹងវិលកាន់សង្វៀនឡើងវិញហើយៗ ការស្វាគមន៍ដំបូង គឺជួបដៃគូចាស់ជើងខ្លាំង កែវ រំចង់ នៅក្នុងពេលឆាប់ៗខាងមុខនេះ។
បើទោះជាឃ្លាតឆ្ងាយពីអាជីពប្រដាល់ក៏ពិតមែន តែលោក វង្ស ណយ ពុំនៅតែលតោលដើរទាត់ខ្យល់នោះទេ និងផ្ទុយទៅវិញ គឺលោកបានបង្កើតមុខរបរលក់ងៀតក្របីតាមអនឡាញ ហើយគេសង្កេតឃើញថាមានគាំទ្រពីអតិថិជនយ៉ាងច្រើន ដែលធ្វើឲ្យគ្រប់គ្នាកោតសរសើរជាខ្លាំង ព្រោះតែលោកមានគំនិតរកស៊ីបែបនេះ។
ដោយឡែកថ្មីៗនេះ កីឡាករ វង្ស ណយ ស្រាប់តែធ្វើឲ្យហ្វេនៗផ្ទុះការភ្ញាក់ផ្អើល និងអស់សំណើចជាខ្លាំង ក្រោយឃើញលោកបង្ហោះសារយ៉ាងប្លែកទាំងហួសចិត្តបែបនេះថា៖ «ខ្ញុំកំពុងតែឡាយលក់ងៀតក្របីសុខៗ ស្រាប់តែមានជនមិនស្គាល់អត្តសញ្ញាណពីរនាក់ បានប្រកាសសុំវ៉ៃដាក់ក្តាមឈូស។ ទេវតាអើយ ហេតុអ្វីក៏បង្ខំខ្ញុំម្ល៉េះ»៕ ដោយ៖ លឹម ហុង
