ភ្នំពេញ៖ផ្ទះប្រជាពលរដ្ឋចំនួន៤ខ្នង ត្រូវបានអគ្គិភ័យឆាបឆេះយ៉ាងសន្ធោសន្ធៅ បង្កការភ្ញាក់ផ្អើលផ្អើលដល់បងប្អូនប្រជាពលរដ្ឋ និងសមត្ថកិច្ចហៅរថយន្តពន្លតអគ្គិភ័យ ចុះមកអន្តរាគមន៍ភ្លាមៗ កាលពីវេលាម៉ោង១២និង៤៥នាទី រំលងអធ្រាត្រឈានចូលថ្ងៃទី១០ ខែវិច្ឆិកាឆ្នាំ២០២០ ស្ថិតនៅក្បែររង្វង់មូលផ្សារដើមថ្កូវ តាមបណ្តោយផ្លូវ៤៣០ ក្នុងសង្កាត់ផ្សារដើមថ្កូវ ខណ្ឌចំការមន រាជធានីភ្នំពេញ។
តាមប្រភពព័ត៌មានពីកន្លែងកើតហេតុបានឲ្យដឹងថា ផ្ទះខាងលើមានចំនួន៤ខ្នងជាប់ៗគ្នា ដោយផ្ទះទី១ និងទី២ មានលក់បាយម្ហូបកាហ្វេពេលព្រឹក និងផ្ទះទី៣មានលក់ចាប់ហួយ ផ្ទះទី៤មានលក់នំកង ។
ប្រភពព័ត៌មានបន្តថា មុនពេលកើតហេតុគេបានឃើញអណ្តាតភ្លើងឆាបឆេះយ៉ាងសន្ធោសន្ធៅ ផ្សែងខ្មួលខ្មាញ់ទើបបង្កការភ្ញាក់ផ្អើល និងរាយការណ៍ទៅសមត្ថកិច្ចហៅរថយន្តពន្លតអគ្គិភ័យជាច្រើនគ្រឿង មកអន្តរាគមន៍។
សមត្ថកិច្ចបានឲ្យដឹងថា ក្នុងហេតុការណ៍ខាងលើនេះរថយន្តពន្លតអគ្គិភ័យមកចំនួន២១គ្រឿង និងប្រើប្រាស់អស់ចំនួន១៧គ្រឿង អគ្គិភ័យក៏រលត់ទាំងស្រុងតែម្តង។ ចំពោះផ្ទះចំនួន៤ខ្នងខាងលើ គឺរងការខូចខាតទាំងស្រុងតែម្តង សំណាងមិនមានមនុស្សរងរបួស។
ចំពោះមូលហេតុ ជំហានដំបូងសមត្ថកិច្ចសន្ឋិដ្ឋានមកពីឆ្លងចរន្តអគ្គិសនី៕ដោយ៖មីដា
