ភ្នំពេញ៖ និយាយដល់ដៃគូលោក ព្រហ្ម ម៉ាញ គឺយាយ យ៉យ នោះប្រិយមិត្តនិងមហាជនបានស្គាល់ច្បាស់រួចហើយ ដែលអ្នកស្រីគឺជាអ្នកសិល្បៈជើងចាស់ដ៏ល្បីឈ្មោះមួយរូប ដែលពុំត្រឹមតែពូកែខាងផ្នែកអាយ៉ៃប៉ុណ្ណោះទេ តែអ្នកស្រីក៏មានសមត្ថភាពលេងកំប្លែង និងមានទឹកដមសំឡេងយ៉ាងពីរោះផងដែរ។
ដោយសារតែមានសមត្ថភាពសិល្បៈខ្ពស់ជាមួយវោហាស័ព្ទនិយាយលេងសើចចាក់ទឹកមិនលេច និងបូករួមទឹកមុខមានប្រជាប្រិយពីធម្មជាតិទៀតនោះ ជាហេតុធ្វើឲ្យយាយ យ៉យ នៅតែទទួលបានការគាំទ្រយ៉ាងខ្លាំងពីទស្សនិកជន ដែលមានន័យថា ហាក់គ្មានសិល្បករជើងចាស់ ឬ ជើងថ្មីរូបណា អាចមកជំនួសតំណែងរបស់អ្នកស្រីបានឡើយ។
ពិតមែនហើយ បើទោះជាមានវ័យកាន់តែជ្រេទៅហើយក្តី តែយាយ យ៉យ មើលទៅហាក់មិនចាស់សោះ និងផ្ទុយមកវិញ ពេលតុបតែងខ្លួន ផាត់មុខម្តងៗ គឺរឹតតែស្រស់ស្អាតប្លែកតែម្តង ខណៈការងារសិល្បៈនៅតែមានទីផ្សារជាប់រហូត ជាពិសេសសម្រាប់រដូវមង្គលការ ដែលឈានចូលមកការជាបណ្តើរៗនេះ។
ដោយឡែកថ្មីៗនេះ តារាកំប្លែងជើងចាស់រូបនេះបានធ្វើឲ្យហ្វេនៗនាំគ្នាភ្ញាក់ផ្អើលជាខ្លាំង ខណៈយាយ យ៉យ បានបង្ហោះរូបថត២សន្លឹកចេញដំណើរទៅលេងកាត់សក់មង្គលការគេ ដោយភ្ជាប់សារដ៏មានន័យថា៖ “ស្នេហ៍វ័យចំណាស់វាមិនសំខាន់ទៅលើអាយុ អាយុវាគ្រាន់តែជាតួលេខសម្រាប់មនុស្សម្នាក់ៗតែប៉ុណ្ណោះ អ្វីដែលសំខាន់គឺការមានក្តីស្រឡាញ់ឲ្យគ្នា”។
យាយយ៉យ ក៏បានបន្តទៀតថា៖ “សូមឲ្យប្រជាជនខ្មែរទូទាំងប្រទេសមានសុខភាពល្អជៀសផុតពីជំងឺកូវី១៩”៕ ដោយ៖ លឹម ហុង
