ភ្នំពេញ ៖ នៅស្នាក់ទីភ្នាក់ងារផ្តល់ជំនួយអន្តរជាតិជប៉ុន(JICA)ភ្នំពេញ នៅព្រឹកថ្ងៃពុធ ទី១៤ខែកុម្ភៈ ឆ្នាំ២០១៨លោកហេង រតនា អគ្គនាយកស៊ីម៉ាក់ បានដឹកនាំការធ្វើvideo conference ជាមួយអគ្គនាយកនៃផ្នែកគំរោងសន្តិភាពនៃស្នាក់ការធំJICA នៅទីក្រុងតូក្យូ (តូក្យូ- ភ្នំពេញ វិលវិញមិនឆ្ងាយ) ពិភាក្សាលើការរៀបចំផែនការយុទ្ធសាស្ត្រ ស៊ីម៉ាក់ក្រោយឆ្នាំ២០២៥។
លោកហេង រតនា អគ្គនាយកស៊ីម៉ាក់ បានថ្លែងថា នេះជាការគិតគូរយុទ្ធសាស្ត្រស្របតាមតម្រូវការរបស់ប្រជាជននិងយុទ្ធសាស្ត្ររបស់រាជរដ្ឋាភិបាលលើសកម្មភាពកំចាត់មីន។ តម្រូវការទាំងក្នុងឆាកជាតិនិងឆាកអន្តរជាតិ ដែលចាំបាច់ត្រូវតែពង្រឹងសមត្ថភាពស្ថាប័នជាតិ បន្តដោះស្រាយវិបតិ្ត និងចែករំលែកពិសោធន៍ជាមួយជាតិសាសន៍ដទៃ។
លោកបានមានប្រសាសន៍ថា បើផ្អែកលើគោលនយោបាយ ការកសាងនិងការការពារមាតុភូមិ ២០១៨-២០២៣ ឃើញថា”ពង្រឹងរដ្ឋបាលសាធារណៈ ជារដ្ឋបាលរបស់ប្រជាជន និងបម្រើផលប្រយោជន៍ប្រជាជន” ដើម្បីសម្រេចគោលដៅនេះ រាជរដ្ឋាភិបាលបន្តពង្រឹងរដ្ឋបាលសាធារណៈទាំងថ្នាក់ជាតិនិងថ្នាក់ក្រោមជាតិ ជារដ្ឋបាលទំនើប ស្អាតស្អំនិងមានគុណភាព ដើម្បីបំរើប្រជាជននិងផលប្រយោជន៍សាធារណៈប្រកបដោយប្រសិទ្ធភាពខ្ពស់។ ពង្រឹងនិងលើកកម្ពស់សមត្ថភាពសាធារណៈគ្រប់ថ្នាក់ ដោយធ្វើការពិនិត្យ កែលំអររចនាសម្ពន្ធ័ តួរនាទី ភារកិច្ច ចំនួនក្របខ័ណ្ឌតាមស្ថាប័ននីមួយៗ ឆ្លើយតបជាមួយតម្រូវការនៃការលើកកម្ពស់គុណភាពជីវិតរបស់ប្រជាជន។ ដូចនេះការគិតគូរ រចនាយុទ្ធសាស្ត្ររបស់ស៊ីម៉ាក់ត្រូវតែដើរទន្ទឹមគ្នានេះដែរ”៕ ដោយ៖បញ្ញាស័ក្តិ
