ករណីមុខសញ្ញាឆបោកតាមប្រព័ន្ធអ៊ីនធឺណិត ឬ តាមរយៈខលតាមទូរស័ព្ទផ្ទាល់ ដោយជនខិលខូចឲ្យជនរងគ្រោះវេលុយឲ្យ ក្រោមរូបភាពត្រូវរង្វាន់ធំ ឬ ទទួលរបស់មកពីក្រៅប្រទេសជាដើម គឺល្បិចដ៏ប៉ិនប្រសព្វនេះតែងតែកើតឡើងជារឿយៗ។
បើទោះជាមានការបង្ហោះផ្សាយពន្យល់ណែនាំ ឲ្យបានដឹងពីករណីបោកប្រាស់នេះយ៉ាងណា ក៏នៅតែមានបងប្អូនប្រជាពលរដ្ឋមួយចំនួនបន្តចាញ់បោកដដែល ដោយសារតែសេចក្តីលោភលន់ចង់បានខ្វះការពិចារណា។
ជាក់ស្តែង ដូចអ៊ុស្រីម្នាក់នេះអ៊ីចឹង គឺស្ទើរតែត្រូវជនខិលខូចបានទៅហើយ ខណៈរូបគាត់បានយកលុយចំនួន ៨០០ ដុល្លារ មកបម្រុងផ្ញើទៅឲ្យជនឆបោកនោះដែលប្រាប់ថាជាភ្ញាក់ងារក្រុមហ៊ុនទេសចរណ៍មួយ ក្រោមរូបភាពមានអ៊ីវ៉ាន់ និងលុយកាក់មួយចំនួនផ្ញើមកពីបរទេស ប៉ុន្តែ ជាសំណាងល្អហើយ ដោយសារតែមានការសង្ស័យ ម្ចាស់វីងក៏បានជជីកសួរនាំពីដំណើរដើមទង ហើយចុងក្រោយក៏រកឃើញថា អ៊ុំស្រីរូបនោះកំពុងចាញ់បោកគេតែម្តង។
ក្នុងនោះផងដែរ ម្ចាស់វីងដែលមានគណនីហ្វេសប៊ុកឈ្មោះ ចាន់លី ស្រីអូន បានសរសេររៀបរាប់ប្រាប់បងប្អូននៅក្នុងបណ្តាញសង្គមឲ្យមានការប្រុងប្រយ័ត្នថា៖ «គាត់មកវេរលុយកន្លែងខ្ញុំ 800$ គាត់ថាវេរទៅខេត្តសៀមរាប ក្មួយសួរនាំគាត់ភ្លាម ទីបំផុតចាញ់បោកគេមែន ជួយគាត់បានសម្រេចហើយ ជួយចែករំលែកផងបងប្អូនជនរួមជាតិ»៕ ដោយ៖ លឹម ហុង
