ភ្នំពេញ៖ ក្រសួងទេសចរណ៍ ដែលមានលេខាធិការដ្ឋានគណៈកម្មាធិការជាតិអ្នកជំនាញទេសចរណ៍ (គ.ជ.អ.ទ) ជាសេនាធិការជំនាញ បានរៀបចំកម្មវិធីវាយតម្លៃសមត្ថភាពតាមយន្តការវាយតម្លៃការសិក្សាពីមុន (RPL: Recognition of Prior Learning) ដល់អ្នកកំពុងបម្រើការងារ (ជាស្ត្រី) ដែលមានបទពិសោធន៍បម្រើការងារតាមផ្ទះ ចំនួន ៦០រូប ស្ថិតក្នុងគម្រោងវាយតម្លៃសាកល្បង ដើម្បីឲ្យអ្នកកំពុងបម្រើការងារទាំងនោះទទួលបានជំនាញ និងវិញ្ញាបនបត្រវិជ្ជាជីវៈ ផ្នែករៀបចំបន្ទប់នៃសេវាកម្មសណ្ឋាគារ។
ការវាយតម្លៃការសិក្សាពីមុន (RPL) នេះរៀបចំឡើងដោយលេខាធិការដ្ឋាន គ.ជ.អ.ទ ដែលបានបណ្តុះបណ្តាលលើជំនាញបច្ចេកទេស កាលពី ០២សប្តាហ៍មុន ដោយផ្តោតសំខាន់លើជំនាញចាំបាច់មួយចំនួន និងមានការចូលរួមផ្ទាល់ពីអ្នកវាយតម្លៃបង្គោលជាតិ ដែលទទួលបានការបណ្តុះបណ្តាលពីអាស៊ាន ស្ថិតក្នុងក្របខណ្ឌនៃកិច្ចសហប្រតិបត្តិការទេសចរណ៍ក្នុងតបន់ ពិសេសក្រោមយន្តការនៃការអនុវត្តកិច្ចព្រមព្រៀងទទួលស្គាល់គ្នាទៅវិញទៅមកលើអ្នកជំនាញទេសចរណ៍អាស៊ាន (MRA)។
ក្នុងន័យនេះ កម្មវិធីវាយតម្លៃសមត្ថភាពដល់អ្នកជំនាញក្នុងវិស័យផ្សេងៗ ដែលមានបំណងបម្រើការងារក្នុងវិស័យទេសចរណ៍ ជាមុំយុទ្ធសាស្ត្រដែលក្រសួងទេសចរណ៍បានដាក់ចុះបន្ថែមលើការបណ្តុះបណ្តាល និងពង្រឹងសមត្ថភាពដល់អ្នកកំពុងបម្រើការងារ ក្នុងទិសដៅលើកកម្ពស់មូលធនមនុស្សក្នុងវិស័យទេសចរណ៍កម្ពុជា ដែលជាមូលដ្ឋាននៃការពង្រឹងឧត្តមភាពប្រកួតប្រជែងក្នុងវិស័យទេសចរណ៍កម្ពុជាផងដែរ។
ការវាយតម្លៃការសិក្សាពីមុន RPLត្រូវបាន ឯកឧត្តម ថោង ខុន រដ្ឋមន្ត្រីក្រសួងទេសចរណ៍ និងជាប្រធានគណៈកម្មាធិការជាតិអ្នកជំនាញទេសចរណ៍ ប្រកាសដាក់ឲ្យអនុវត្តចាប់តាំងពីឆ្នាំ២០១៨មក ហើយបច្ចុប្បន្នក្រសួងទេសចរណ៍បានវាយតម្លៃ និងទទួលស្គាល់សមត្ថភាពអ្នកកំពុងបម្រើការងារក្នុងវិស័យទេសចរណ៍បានជាច្រើនពាន់អ្នក និងមានធនធានជាគ្រូបណ្តុះបណ្តាល និងអ្នកវាយតម្លៃជាង ៦០០នាក់ មជ្ឈមណ្ឌលវាយតម្លៃចំនួន ០៤ទីតាំង និងសាលាបណ្តុះបណ្តាលតាមកម្មវិធីសិក្សាអាស៊ាន ចំនួនប្រមាណជាង ២០ ទីតាំង៕
ដោយ : CEN
