ភ្នំពេញ៖ ថ្នាក់ដឹកនាំក្រសួងអប់រំ យុវជន និងកីឡា បានរៀបចំកិច្ចប្រជុំត្រួតពិនិត្យវឌ្ឍនភាពនៃការរៀបចំការប្រឡងសញ្ញាបត្រមធ្យមសិក្សាទុតិយភូមិ សម័យប្រឡង៖ ២១ ធ្នូ ២០២០ ដើម្បីធានាបានថា ការប្រឡងនៅអាចប្រព្រឹត្តទៅដោយរលូន ជោគជ័យ គោរពតាមគោលការណ៍ច្បាប់ យុត្តិធម៌ តម្លាភាពនិងលទ្ធផលទទួលយក បើទោះបីជាប្រទេសកំពុងប្រឈមមុខនឹងវិបត្តិជំងឺកូវីដ-១៩ ក្ដី។
ពិធីនេះបានប្រព្រឹត្តទៅក្រោមអធិបតីភាពឯកឧត្ដមបណ្ឌិតសភាចារ្យ ហង់ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា ព្រមទាំងមានការចូលរួមពីមន្ត្រីថ្នាក់ដឹកនាំនានាដែលពាក់ព័ន្ធនឹងការរៀបចំដំណើរការប្រឡង កាលពីថ្ងៃទី២៥ ខែវិច្ឆិកា ឆ្នាំ២០២០ នៅអគាររដ្ឋបាលចៅពញាហុក ។
សូមជម្រាបថា ដើម្បីបង្ការការឆ្លងរីករាលដាលនៃជំងឺកូវីដ-១៩ ក្នុងចំណោមសិស្សានុសិស្ស និងបុគ្គលិកអប់រំ ក្នុងឱកាសនៃការប្រព្រឹត្តទៅដំណើរការប្រឡង ក្រសួងបានដាក់ឱ្យអនុវត្តយ៉ាងហ្មត់ចត់នូវស្តង់ដារអនាម័យ SOP របស់ក្រសួងសុខាភិបាល ដោយនឹងមានការដាក់វាស់កម្តៅមុនការប្រឡង ការប្រើប្រាស់ ម៉ាស់ ជែល អាល់កុលលាងដៃជាដើម៕ ដោយ:បញ្ញាស័ក្តិ
