កណ្តាល ៖ គិតត្រឹមរសៀលថ្ងៃទី២៥ ខែវិច្ឆិកា ឆ្នាំ២០២០នេះ ភាគីវៀតណាមបានរុះរើតង់ចំនួន២៦កន្លែងចេញអស់ហើយ បន្ទាប់ពីបានបោះតង់នៅជាប់ព្រំដែនកម្ពុជាវៀតណាម ឈមនឹងខេត្តកណ្តាល ។
បើតាមលោក គង់ សោភ័ណ្ឌ អភិបាលខេត្តកណ្តាល និងលោកឧត្តមសេនីយ៍ទោ ឈឿន សុចិត្ត ស្នងការនគរបាលខេត្តកណ្តាល បានប្រាប់កាសែតក្នុងស្រុកមួយថា ការរុះរើតង់នេះបានធ្វើឡើងតែមួយថ្ងៃប៉ុណ្ណោះ បន្ទាប់ពីមានការសន្ទនាតាមប្រព័ន្ធវិដេអូរវាងសម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា និងលោក ង្វៀង សួនហ្វុក នាយករដ្ឋមន្ត្រីវៀតណាម កាលពីថ្ងៃទី២៤ ខែវិច្ឆិកា ឆ្នាំ២០២០ ។
ចំណែកលោកវីល្លាម ប្រធានគណបក្សខ្មែក្រោក បានលើកឡើងក្នុងផេកហ្វេសប៊ុកផ្លូវការថា វៀតណាមបានរើតង់ចំនួន ២៦ ដែលបោះនៅភូមិសាស្ត្រតំបន់ស តាមបន្ទាត់ព្រំដែនខេត្តកណ្ដាលអស់ហើយ បន្ទាប់ពីជួបជំនួបទូរស័ព្ទជាមួយសម្ដេចនាយក និង មេដឹកនាំវៀតណាម ។ ខ្ញុំពុំមានការអរគុណទេចំពោះការរើចេញនេះ ។ ព្រោះអ្វី ? ព្រោះនៅត្រង់ថា រឿងរើគឺត្រូវតែរើចេញ ដោយសារតំបន់នេះមិនទាន់ឯកភាពគ្នាទេ ហើយមួយទៀតសោត គឺសង់ដោយគ្មានការជូនដំណឹងអ្វីទាំងអស់ ។ ដោយឡែកក្នុងនាមអ្នករបងក្បែរគ្នានិងដើម្បីបង្កើតទំនាក់ទំនងឲ្យរឹងមាំនូវព្រំដែនសន្តិភាព អ្វីដែលគួរបំផុតគឺ កុំសង់អ្វីបន្ថែមទៀតលើតំបន់សសាជាថ្មីទោះនៅកន្លែងណាក៏ដោយ ។
ក្រសួងការបរទេសនិងសហប្រតិបត្តិការអន្តរជាតិបានចេញសេចក្តីប្រកាសព័ត៌មានស្តីពីខ្លឹមសារកិច្ចសន្ទនាតាមប្រព័ន្ធវីដេអូរវាងសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ជាមួយ ឯកឧត្តម ង្វៀន សួនហ្វ៊ុក នាយករដ្ឋមន្ត្រីនៃសាធារណរដ្ឋសង្គមនិយមវៀតណាម នៅថ្ងៃទី២៤ ខែវិច្ឆិកា ឆ្នាំ២០២០ ដោយថ្នាក់ដឹកនាំទាំងពីរក៏បានអះអាងជាថ្មីនូវកិច្ចខិតខំប្រឹងប្រែងរួម ដើម្បីពង្រឹងកិច្ចសហប្រតិបត្តិ ទ្វេភាគីលើវិស័យការពារជាតិ និងសន្តិសុខ ក្នុងទិសដៅធានាសន្តិសុខ និងសណ្តាប់ នៅតាមតំបន់ព្រំដែន។ថ្នាក់ដឹកនាំទាំងពីរក៏បានអះអាងជាថ្មីនូវកិច្ចខិតខំប្រឹងប្រែងរួម ដើម្បីពង្រឹងកិច្ចសហប្រតិបត្តិ ទ្វេភាគីលើវិស័យការពារជាតិ និងសន្តិសុខ ក្នុងទិសដៅធានាសន្តិសុខ និងសណ្តាប់ នៅតាមតំបន់ព្រំដែន។
នាយករដ្ឋមន្ត្រីទាំងពីរបានអបអរសារទរចំពោះការផ្តល់សច្ចាប័នលើសន្ធិសញ្ញាបំពេញបន្ថែមលើ សន្ធិសញ្ញាកំណត់ព្រំដែនរដ្ឋឆ្នាំ១៩៨៥ និងសន្ធិសញ្ញាបំពេញបន្ថែមឆ្នាំ២០០៥ រវាងព្រះរាជាណាចក្រកម្ពុជា និងសាធារណរដ្ឋសង្គមនិយមវៀតណាម ព្រមទាំងលើពិធីសារទទួលស្គាល់ការខ័ណ្ឌសីមា និងបោះបង្គោលព្រំដែនគោករវាងព្រះរាជាណាចក្រកម្ពុជា និងសាធារណរដ្ឋសង្គមនិយមវៀតណាមឆ្នាំ២០១៩។ នាយករដ្ឋមន្ត្រីទាំងពីរក៏បានគូសបញ្ជាក់នូវសារសំខាន់នៃការផ្លាស់ប្ដូរផែនទីឋានលេខាព្រំដែនរវាងកម្ពុជា និងវៀតណាម។ ភាគីទាំងពីរបានឯកភាពពនឿននីតិវិធីដើម្បីផ្លាស់ប្តូរលិខិតតូបករណ៍ នៃការផ្តល់សច្ចាប័ន លើសន្ធិសញ្ញាបំពេញបន្ថែម និងពិធីសារឆ្នាំ២០១៩ ឱ្យបានឆាប់តាមដែលអាចធ្វើបាន។ ថ្នាក់ដឹកនាំទាំង ពីរក៏បានប្តេជ្ញាចិត្តយ៉ាងមោះមុត ដើម្បីដោះស្រាយកំណាត់ខ្សែព្រំដែនដែលនៅសេសសល់ចំនួន១៦%ក្នុង គោលបំណងប្រែក្លាយព្រំដែនកម្ពុជា-វៀតណាម ជាព្រំដែនសន្តិភាព ស្ថិរភាព កិច្ចសហប្រតិបត្តិការ និងការអភិវឌ្ឍ។
ថ្នាក់ដឹកនាំទាំងពីរ បានគូសបញ្ជាក់ ពីសារសំខាន់នៃកិច្ចប្រជុំថ្នាក់រដ្ឋមន្ត្រី នៃគណៈកម្មការចម្រុះ កម្ពុជា-វៀតណាមលើកទី១៨ ដែលគ្រោងនឹងប្រព្រឹត្តទៅនៅថ្ងៃទី២២ ខែធ្នូ ឆ្នាំ២០២០ នៅទីក្រុងបាវិត ខេត្តស្វាយរៀង ប្រទេសកម្ពុជា។
សូមបញ្ជាក់ថា ដើម្បីរឹតបន្តឹងការឆ្លងដែនដើម្បីទប់ស្កាត់ការរីករាលដាលជំងឺកូវីដ១៩ ភាគីវៀតណាមបានបោះតង់យោធានៅជាប់ព្រំដែនស្រុកលើកដែក និងស្រុកកោះធំ ខេត្តកណ្ដាល ដែលនៅចំណុចនេះភាគីទាំងពីរ មិនទាន់មានការឯកភាពគ្នាលើខ្សែបន្ទាត់ព្រំដែននៅឡើយទេ។ បន្ទាប់ពីមានការតវ៉ាពីភាគីកម្ពុជា រួមមានទាំងការធ្វើកំណត់ទូតផងនោះ ប្រទេសវៀតណាម ក៏បានរុះរើតង់មួយចំនួនចេញ មុននឹងឈានដល់ការរុះរើទាំងស្រុងនៅថ្ងៃនេះផងដែរ៕ដោយ៖បញ្ញាស័ក្តិ
