ជឿជាក់ថា ប្រិយមិត្តជាច្រើន ជាពិសេសអ្នកប្រើប្រាស់បណ្តាញសង្គម ប្រាកដជាបានស្គាល់ហើយ ពីម្ចាស់ផេកហ្វេសប៊ុកម្នាក់ A Dose Of Cath គឺកញ្ញា សម្បត្តិ សុក្រសុវណ្ណកេសរ ដែលត្រូវបានគេស្គាល់ថាជា Catherine Harry។ ពិតណាស់ កញ្ញា Catherine បានល្បីឈ្មោះ តាមរយៈការដែលតែងតែលើកឡើងពីបញ្ហាចំណេះដឹងនិងសង្គមនានា និងជាពិសេសវែកញែកបញ្ហាសុខភាពផ្លូវភេទ ជាប្រធានបទដ៏ស៊ីជ្រៅ។
ដោយឡែក ថ្មីៗនេះ កញ្ញា Cath ក្រោយពីបានឃើញសប្បុរសជនមួយចំនួនជួយជ្រោមជ្រែងជាហូរហែដល់កុមារីស្រីនីត ប៉ុន្តែ ក្នុងនោះកញ្ញាហាក់មិនពេញចិត្តចំពោះការចង់ជួយរឿងកែសម្ផស្ស ដែលអាចនាំឲ្យនាងមានមោទនភាពខ្លាំងទៅលើរូបសម្រស់ខ្លួនខ្លាំង លែងខ្វល់ពីការសិក្សា ក៏បានលើកឡើងប្រៀបធៀបថា៖ «ឆ្ងល់ណាស់ ក្មេងប្រុសដែលមានសមត្ថភាព គេយកទៅឲ្យរៀនបន្ត បានអាហារូបករណ៍ទៅរៀននៅក្រៅ។ តែដល់ពេលក្មេងស្រីដែលមានសមត្ថភាព បែរជាយកទៅកែសម្ផស្សវិញ។ សមត្ថភាពមនុស្សស្រីបានតែរូបរាងខាងក្រៅហ្នឹងទេ? គិតថាយ៉ាងម៉េច មនុស្សស្រីដែលរូបរាងស្អាតសំណាង ព្រោះរកបានប្តីល្អ ដល់ពេលមនុស្សប្រុសគឺត្រូវតែមានសមត្ថភាព និងចំណេះដឹង?»។
នៅមិនទាន់ចប់ទេ ស្រីស្អាតសម្តីផ្អែមរូបនេះ នៅបានពន្យល់យ៉ាងវែងអន្លាយតាមរយៈខមិននៅខាងក្រោមផុសរបស់ខ្លួនទៀតថា៖ «និយាយខ្លីៗខ្លាចគេយល់ខុសពីយើង ឬថា យើងស្តាប់មិនយល់។ អំពីកូនស្រីនោះ គេដឹងហើយថាមានឧកញ៉ាយកធ្វើកូនស្រីធម៌ឲ្យលុយទៅរៀន ហើយក៏មានសប្បុរសជនជាច្រើនដែរដែលឧបត្ថម្ភអំណោយដល់កូនស្រីនោះ។ ប៉ុន្តែ the point ដែលគេលើកឡើងនឹងគឺមិនមែនត្រឹមតែរឿងឲ្យលុយទៅរៀន ឬមិនឲ្យលុយទេ រឿងនេះបើនិយាយឲ្យចំគឺមិនមានរិះគន់ករណីតែមួយតែសង្គមទាំងមូល។ ឥឡូវចាប់ផ្តើមមានបណ្តើរៗ គ្លីនិកចាប់ផ្តើមយកកូនស្រីនោះទៅបំប៉នសម្រស់។ និយាយឡើងគឺ “កូនស្រីនឹងដឹងតែក្លាយជាបវរកញ្ញា តួកុន…”ជាដើម។
កញ្ញា Cath បានបន្តថា «ការធ្វើបវរកញ្ញា ឬ តួកុននោះវាមិនខុសទេ បើសិនវាជាអ្វីដែលគាត់ចង់ធ្វើ ប៉ុន្តែនៅពេលដែលសង្គមទាំងមូលឲ្យតម្លៃតែលើសម្រស់គាត់ ឬ ផ្តោតសំខាន់តែនៅលើសម្រស់គាត់ គាត់ប្រាកដជាគិតហើយថា វាប្រហែលជាសមត្ថភាពដែលល្អបំផុតរបស់ខ្ញុំ ដូចនេះមិនចាំបាច់ខ្វល់ពីក្តីស្រមៃអ្វីផ្សេង ដែលមិនទាក់ទងនឹងសម្រស់របស់ខ្ញុំទេ។ ហើយខ្ញុំមិនទាន់និយាយពី អ្នកដែលយកក្មេងស្រីនោះធ្វើជាឧបករណ៍ផង។ សុំអរគុណផងដែរ អ្នកដែលជួយប្អូនស្រីកន្លងមក ដូចជាលោកពូពាក់មីជាដើម គាត់ជួយចេញពីចិត្តស្មោះ។ She’s beautiful just the way she is, and she deserves a chance at a normal and fulfilling life»៕ ដោយ៖ លឹម ហុង
