ខេត្តព្រះសីហនុ៖ រាល់ថ្ងៃ មានទូក ដែលប្រកបរបរនេសាទស្របច្បាប់សរុបមានចំនួន ២៥២៤ គ្រឿង ក្នុងនោះ មានប្រភេទទូកអូសចំនួន ៨៥៤ គ្រឿង ជាប្រភេទទូកដែលមានកម្លាំងសេះធំ ក្រៅពីនេះគឺមានទូកប្រភេទ មងបណ្ដែត មងបង្គា មងត្រី ទូកលប ទូកសន្ទូចជាដើម។
លោក ឯម ភា នាយខណ្ឌរដ្ឋបាលជលផលកំពង់សោមបានបញ្ជាក់ប្រាប់កាសែតក្នុងស្រុកថា ទាក់ទងនឹងបទល្មើសនេសាទគឺចែកចេញជាពីរ ទីមួយបទល្មើសនេសាទដែលមានប្រភេទទូកអូស នេសាទនៅតំបន់ទឹករាក់ក្រោម២០ម៉ែត្រ មានតិចតួច និងទី ពីរ ទូកប្រើឧបករណ៍នេសាទខុសច្បាប់ដូចជា ឧបករណ៍ប្រភេទពោះវៀនជ្រូក គឺមានការប្រើនៅតំបន់ឆ្ងាយដាច់ស្រយាលដូចជាតំបន់កែវផុសនិងតំបន់ព្រៃនប់។
លោកបានលើកឡើងបន្ថែមថា ក្រៅពីបទល្មើសនេសាទ បច្ចុប្បន្នក៏នៅមានការ កាប់ទន្ទ្រានព្រៃកោងកាងក៏ដូចជាព្រៃលិចទឹកមួយចំនួន ដើម្បីវាតយកដីធ្វើ ជាដីកសិកម្មផ្ទាល់ខ្លួនដែលធ្វើឲ្យបាត់នូវជម្រកធនធានមច្ឆជាតិ ព្រោះព្រៃទាំងអស់នេះគឺជាប្រភពនៃការពងកូនរបស់មច្ឆជាតិគ្រប់ប្រភេទហើយរដ្ឋបាលជលផលកំពង់សោមក៏មានការបង្ក្រាបជា បន្តបន្ទាប់ នៅតំបន់ដែលទទួលរងការនេសាទដោយប្រើឧបករណ៍ខុសច្បាប់និងបទល្មើស ការកាប់ទន្ទ្រានព្រៃលិចទឹក នៅក្នុងភូមិសាស្ត្រនៃខេត្តព្រះសីហនុ ដូចនេះបទល្មើស មានការកាត់បន្ថយច្រើន៕ រក្សាសិទ្ធិដោយ៖បញ្ញាស័ក្តិ
