Sunday, December 5, 2021

កូរ៉េខាងជើង​យល់ព្រម​ចរចា​ជាមួយ​អាមេរិក​ប្រសិនបើ​…

តាម Sputnik មន្ត្រី​កូរ៉េខាងជើង​មិន​បញ្ចេញ​ឈ្មោះ​ម្នាក់ បានប្រកាសថា លទ្ធភាព​ការទូត​សំដៅ​បញ្ចប់​វិបត្តិ​បច្ចុប្បន្ន​ពុំមែន​ជា​ជម្រើស​របស់​កូរ៉េខាងជើង​ទេ​។ ក្រុង​ព្យុងយ៉ាង​នឹងចូលរួម​ក្នុង​កិច្ចចរចា ដរាបណា​អាច​ប្រឆាំង​តប​នឹង​កម្លាំងយោធា​របស់​អាមេរិក តាមរយៈ​កិច្ច​អភិវឌ្ឍ​កាំជ្រួច​មួយ​អាច​វាយលុក​ឆ្នេរសមុទ្រ​ប៉ែក​ខាងកើត​របស់​អាមេរិក ក៏ដូចជា​បណ្តា​ទីក្រុង​ធំៗ​ជាអាទិ៍ វ៉ាស៊ីនតោន​ឌី​ស៊ី និង​ញូយ៉ក​។​

មន្ត្រី​កូរ៉េខាងជើង​ដដែល​បាន​ប្រាប់ CNN នៅ​ថ្ងៃទី​១៧ ខែ​១០ ថា ៖ “​មុនពេល​ចូលរួម​ចរចា​ជាមួយ​រដ្ឋការ Trump កូរ៉េខាងជើង​ចង់​ផ្ញើ​ចេញ​នូវ​សារ​ច្បាស់លាស់​មួយ​ថា ក្រុង​ព្យុងយ៉ាង​មាន​សមត្ថភាព​វាយលុក​និង​ការពារ​ខ្លួន​អាច​ជឿទុកចិត្ត​បាន​ដើម្បី​ប្រឆាំង​តប​រាល់​ការឈ្លានពាន​ណាមួយ​ពី​ភាគី​អាមេរិក​”​។​

​តាម​បណ្តា​អ្នកជំនាញការ ដើម្បី​អនុវត្តបាន​គោលដៅ​ខាងលើ​ក្រុង​ប្យុងយ៉ាង​នឹងត្រូវ​បន្ត​អភិវឌ្ឍ​កាំជ្រួច​អន្តរទ្វីប​មួយ ដែលមាន​សមត្ថភាព​ជ្រៀតចូល​ស្រទាប់​បរិយាកាស​ដោយ​មិន​រង​ការ​ប្រេះ​បែក ។​

​តាម​នាយក​ខុទ្ទកាល័យ​សេត​វិមាន John Kelly ថ្លែង​កាលពី​សប្តាហ៍​មុន​នោះ​ឲ្យ​ដឹងថា កូរ៉េខាងជើង​កំពុង​អភិវឌ្ឍ​បរិក្ខារ​នុយក្លេអ៊ែរ​ដែល​អាច​បំបែក​និង​ផ្គុំ​ចូលគ្នា​បាន ។​

​សេចក្តីប្រកាស​របស់​ម​ន្ត្រី​កូរ៉េខាងជើង​នេះ ត្រូវបាន​លើកឡើង​ក្នុង​បរិបថ​ដែល​បណ្តា​អនុរដ្ឋមន្ត្រី​ការបរទេស​អាមេរិក​និង​ជប៉ុន​នៅ​ថ្ងៃ​១៧ ខែ​១០ ឯកភាព​បន្ត​បង្កើត​គំនាប​សេដ្ឋកិច្ច​ចំពោះ​កូរ៉េខាងជើង​សំដៅ​បង្ខំ​ឲ្យ​ប្រទេស​នេះ​វិលត្រឡប់​មកកាន់​តុ​ចរចា​វិញ៕​