ភ្នំពេញ៖ នាយឧត្តមសេនីយ៍ ខៀវ សុភ័គ ជានាយ ខុទ្ទកាល័យសម្ដេចក្រឡាហោម ស ខេង ឧបនាយករដ្ឋមន្ដ្រី រដ្ឋមន្ដ្រីក្រសួងមហាផ្ទៃ និងជាប្រធានក្រុមគ្រប់គ្រងទីប្រឹក្សា និងជំនួយការ បានចេញសារព្រមានចាត់វិធានការ និងដកតំណែងទីប្រឹក្សាទាំងឡាយណា ដែលយកតំណែងទីប្រឹក្សា ជំនួយការទៅប្រព្រឹត្តអំពើខុសច្បាប់ ឬប៉ះពាល់ដល់ថ្នាក់ដឹកនាំ ។
ក្នុងលិខិតព្រមាននេះ ដែលធ្វើឡើងកាលពីថ្ងៃទី១៦តុលា នាយ ខុទ្ទកាល័យសម្ដេចក្រឡាហោម ស ខេង បានបញ្ជាក់ថា ក្នុងករណីនៅមានអ្នកប្រព្រឹត្តតទៅទៀត ខុទ្ទកាល័យនឹងបន្ដអនុវត្តជាក់ទណ្ឌកម្មតាមវិន័យរដ្ឋបាល ឬក្នុងករណីធ្ងន់ធ្ងរនឹងគោរពស្នើសុំយោបល់ដ៏ខ្ពង់ខ្ពស់ សម្ដេចក្រឡាហោម ដើម្បីបញ្ចប់មុខតំណែង បណ្ដេញចេញពីក្របខ័ណ្ឌ ឬបញ្ជូនទៅតុលាការធ្វើការវិនិច្ឆ័យទោសតាមច្បាប់ជាធរមាន។
លោកបន្តថា នាពេលកន្លងមក ទីប្រឹក្សានិងជំនួយ ការបានខិតខំប្រឹងប្រែងបំពេញការងារតួនាទីរបស់ខ្លួនបានយ៉ាងល្អប្រសើរ ថែមទាំងបរិច្ចាគធនធានផ្ទាល់ខ្លួនដើម្បីរួមចំណែកជួយប្រជាពលរដ្ឋនិងអភិវឌ្ឍន៍ក្នុងមូលដ្ឋាន ។ទន្ទឹងគុណសម្បត្តិនេះ ខុទ្ទកាល័យក៏បានទទួលព័ត៌មានខ្លះមកថា ទីប្រឹក្សានិងជំនួយការមួយចំនួនតូចមិនបានបំពេញភារកិច្ចឲ្យបានល្អរលូននេាះទេ ហើយថែមទាំងបានប្រើប្រាស់តួនាទីនិងភារកិច្ចទាំងនេះធ្វើសកម្មភាពអសកម្មនានា ដូចជា រត់ការ កាងអំពើល្មើសច្បាប់ ឬអន្តរាគមន៍ទៅស្ថាប័នមានសម្ថកិច្ច ក្នុងបំណងស្វែងរកផលប្រយោជន៍លាភសក្ការផ្ទាល់ខ្លួន ដែលជាអំពើធ្វើឲ្យប៉ះពាល់ដល់កិត្តិយស និងកិត្តិនាមដ៏ខ្ពង់ខ្ពស់របស់សម្តេចសខេង៕ ដោយ៖ជាលី
