ភ្នំពេញ៖ សម្តេចក្រុមព្រះ នរោត្តម រណឫទ្ធិ ព្រះប្រធានគណបក្សហ្វ៊ុនស៊ិនប៉ិចបានសម្រេចរុះរើក្បាលម៉ាស៊ីនដឹកនាំបក្សទ្រង់ទ្រាយធំដោយបានតែងតាំងបុត្រាច្បងរបស់ព្រះអង្គ គឺព្រះអង្គម្ចាស់ នរោត្តម ចក្រាវុធ ជាអនុប្រធានគណបក្សហ្វ៊ុនស៊ិនប៉ិច។
ការរុះរើក្បាលម៉ាស៊ីនបក្សនេះ ក្នុងគ្រាដែលព្រះអង្គកំពុងមានព្រះរាជសុខភាពទ្រុឌទ្រោម បន្ទាប់ពីរងគ្រោះដោយគ្រោះថ្នាក់ចរាចរណ៍ នៅផ្លូវជាតិលេខ៤ នាពេលកន្លងមក។
យោងតាមសេចក្តីសម្រេចនៅថ្ងៃទី១៦ ខែធ្នូ ឆ្នាំ២០២០នេះ សម្តេចក្រុមព្រះ នរោត្តម រណឫទ្ធិ តែងតាំងលោក អាំង សំបូរ ជាអគ្គលេខាធិការប្រតិបត្តិ បន្ថែមលើតួនាទីបច្ចុប្បន្ន និងលោក ផាន់ សិទ្ធី ជាអ្នកនាំពាក្យបក្ស បន្ថែមលើតួនាទីបច្ចុប្បន្ន។
គណបក្សហ្វ៊ុនស៊ិនប៉ិច ជាមរតកបក្សដែលត្រូវបានបង្កើតឡើងក្រោមស្នាព្រះហស្ថរបស់ព្រះបរមរតនកោដ្ឋ នរោត្តម សីហនុ ដើម្បីចូលរួមប្រកួតប្រជែងក្នុងឆាកនយោបាយតាមបែបលទ្ធិប្រជាធិបតេយ្យ នៅឆ្នាំ១៩៩៣៕ រក្សាសិទ្ធិដោយ៖បញ្ញាស័ក្តិ
