ភ្នំពេញ៖ ក្រសួងសុខាភិបាលថ្ងៃទី១៧ ខែធ្នូ ឆ្នាំ២០២០ បានចេញសេចក្តីជូនព័ត៌មានថា មានករណីជាសះស្បើយចំនួន ០៥នាក់ និងមិនមានករណីវិជ្ជមានវីរុសកូវីដ-១៩នៅថ្ងៃទី១៦ ខែធ្នូ ឆ្នាំ២០២០។
ក្រសួងសុខាភិបាល សូមគោរពជម្រាបជូនសាធារណជនទាំងអស់ឲ្យបានជ្រាបពីស្ថានភាព ជំងឺកូវីដ-១៩ នៅកម្ពុជា នៅ ថ្ងៃទី១៦ ខែធ្នូ ឆ្នាំ២០២០ មានករណីជាសះស្បើយ ៖ ចំនួន ០៥នាក់ ដែលជាអ្នកពាក់ព័ន្ធទៅនឹង ព្រឹត្តិការណ៍សហគមន៍ ២៨វិច្ឆិកា៖
-ស្ត្រីជនជាតិខ្មែរ អាយុ ៦៤ឆ្នាំ មានអាសយដ្ឋាននៅសង្កាត់ទួលទំពូង១ ខណ្ឌចំការមន រាជធានីភ្នំពេញ ត្រូវជាម្តាយស្ត្រី អាយុ ៣៦ឆ្នាំ ដែលមានស្វាមីជាអនុប្រធាននាយកដ្ឋានពន្ធនាគារនៃក្រសួងមហាផ្ទៃ ។
– ស្ត្រីជនជាតិខ្មែរ អាយុ ២៥ឆ្នាំ និងទារកប្រុស (ជនជាតិខ្មែរ) អាយុ ០៧ខែ មានអាសយដ្ឋាននៅសង្កាត់ និរោធ ខណ្ឌច្បារអំពៅ រាជធានីភ្នំពេញ ជាប្អូនស្រីរបស់អ្នកបើកបរឲ្យឯកឧត្តម អគ្គនាយកពន្ធនាគារ។
– បុរសជនជាតិខ្មែរ អាយុ ២៣ឆ្នាំ មានអាសយដ្ឋានស្នាក់នៅសង្កាត់វាលស្បូវ ខណ្ឌច្បារអំពៅ រាជធានីភ្នំពេញ ជាបុគ្គលិកធនាគារចិន (ផ្លូវព្រះមុន្នីវង្ស) រាជធានីភ្នំពេញ។ សូមកត់សម្គាល់ថា៖ បុគ្គលទាំងបួននាក់ខាងលើ ត្រូវបានព្យាបាលជាសះស្បើយ ដោយទទួលបានលទ្ធផលតេស្តអវិជ្ជមានវីរុសកូវីដ-១៩ ចំនួន ០២ដង និងត្រូវបានអនុញ្ញាតឲ្យចេញពីមន្ទីរពេទ្យមិត្តភាពខ្មែរ-សូវៀត រាជធានីភ្នំពេញ។
– បុរសជនជាតិខ្មែរ អាយុ ២៣ឆ្នាំ មានអាសយដ្ឋានស្នាក់នៅម្តុំស្តុប NOKIA ខណ្ឌសែនសុខ រាជធានី ភ្នំពេញ ជាបុគ្គលិកហាង Pedro ផ្លូវព្រះសីហនុ ត្រូវបានព្យាបាលជាសះស្បើយ ដោយទទួលបានលទ្ធផល តេស្តអវិជ្ជមានវីរុសកូវីដ -១៩ ចំនួន ០២ដង និងត្រូវបានអនុញ្ញាតឲ្យចេញពីមជ្ឈមណ្ឌលជាតិប្រយុទ្ធនឹងជំងឺរបេង និងហង់សិន រាជធានីភ្នំពេញ។
នៅថ្ងៃទី ១៦ ខែធ្នូ ឆ្នាំ២០២០ លទ្ធផលធ្វើតេស្តអ្នកប៉ះពាល់ក្នុង ព្រឹត្តិការណ៍សហគមន៍ ២៨វិច្ឆិកា វត្ថុសំណាកនៅសល់ពីថ្ងៃទី១៥ ខែធ្នូ ឆ្នាំ២០២០ ចំនួន ២២៤សំណាក និងវត្ថុសំណាកនៅថ្ងៃទី១៦ ខែធ្នូ ឆ្នាំ២០២០ ចំនួន ៦៧៣សំណាក សរុបមានចំនូនទាំងអស់ ៨៥៧សំណាក ដែលនៅក្នុងចំនួននេះ មានចំនួន ៤២៦សំណាក ត្រូវបានធ្វើវិភាគដោយវិទ្យាស្ថានប៉ាស្ទ័រកម្ពុជានៅថ្ងៃទី១៦ ខែធ្នូ ឆ្នាំ២០២០ គឺមានលទ្ធផល អវិជ្ជមានវីរុសកូវីដ-១៩ ទាំងអស់ ។ ដោយឡែក មាននៅសល់វត្ថុសំណាកចំនួន ២៤៧សំណាកទៀត ដែលត្រូវ ធ្វើវិភាគបន្តនៅថ្ងៃទី១៧ ខែធ្នូ ឆ្នាំ២០២០ (ដោយសារវត្ថុសំណាកទាំងនេះ ទទួលបានក្រោយម៉ោង ១៧និង០០ នាទីល្ងាចនៃថ្ងៃដដែល )។
សរុបអ្នកជំងកូវីដ-១៩ ដែលបានរកឃើញពាក់ព័ន្ធ ព្រឹត្តិការណ៍សហគមន៍ ២៨វិច្ឆិកា” ពីថ្ងៃទី ២៨ ខែ វិច្ឆិកា ឆ្នាំ២០២០ ដល់ថ្ងៃទី១៦ ខែធ្នូ ឆ្នាំ២០២០ មានចំនួន ៤១នាក់ (ស្រី ១៩នាក់ និងប្រុស ២២នាក់) ដែលនៅក្នុងចំនួននេះ មានអ្នកជាសះស្បើយ សរុបចំនួន ១៣នាក់ (ស្រី ០៤នាក់ និងប្រុស ០៩នាក់)៕ រក្សាសិទ្ធិដោយ៖បញ្ញាស័ក្តិ
