ឧត្ដរមានជ័យ៖ ផេកហ្វេសប៊ុកប្រជាជនខេត្តឧត្ដរមានជ័យ នៅថ្ងៃទី២១ ខែធ្នូ ឆ្នាំ២០២០នេះ បានចេញផ្សាយព័ត៌មានថា សូមជូនពរបងប្អូនពលករ ដែលធ្វើដំណើរចូលមកប្រទេសកម្ពុជា តាមរយៈច្រកទ្រវាអន្តរជាតិអូរស្មាច់ សូមជៀសផុតពីជំងឺកូវីដ-១៩ ព្រឹកថ្ងៃទី២១ ខែធ្នូ ឆ្នាំ២០២០។
ចំណែកអាជ្ញាធរខេត្តបន្ទាយមានជ័យ ចុះពិនិត្យស្ថានភាពទូទៅតាមព្រំដែនកម្ពុជា-ថៃ ដើម្បីដាក់ចេញវិធានការបន្ថែមពង្រឹងការគ្រប់គ្រងបងប្អូនប្រជាពលរដ្ឋត្រឡប់ចេញ ចូលមកពីប្រទេសថៃ។ នៅព្រឹកថ្ងៃទី២១ ខែធ្នូ ឆ្នាំ២០២០ ក្នុងនាមគណៈបញ្ជាការឯកភាព រដ្ឋបាលខេត្ត ឯកឧត្តម អ៊ុំ រាត្រី អភិបាលខេត្តបន្ទាយមានជ័យ បានអញ្ជើញចុះពិនិត្យមើលស្ថានភាពទូទៅតាមព្រំដែនកម្ពុជាថៃ ជួបប្រជុំបន្ទាន់ជាមួយកងកម្លាំងទាំង០៣ ទាំងភូមិសាស្ត្រខេត្ត និងតាមបន្ទាត់ព្រំដែន នៅច្រកអូរបីជាន់ ដើម្បីដាក់វិធានការ បន្ថែមពង្រឹងការគ្រប់គ្រងបងប្អូនប្រជាពលរដ្ឋត្រឡប់ចេញ ចូលមកពីប្រទេសថៃ ឲ្យបានហ្មត់ចត់តឹងរឹង។
ជាមួយគ្នានោះចំពោះបងប្អូនត្រឡប់មកពីប្រទេសថៃ ក្នុងនាមគណៈកម្មការប្រយុទ្ធជំងឺកូវីដ១៩ខេត្ត ដែលមានក្រុមប្រចាំការតាមច្រកព្រំដែន និងទីតាំងចត្តាឡីស័ក បានរៀបចំរួចជាស្រេចដើម្បីធ្វើចត្តាឡីស័ករយៈពេល១៤ថ្ងៃឲ្យបានត្រឹមត្រូវ តាមវិធានការសុខាភិបាល។
ក្នុងនោះជាមួយក្រុមការងារ ឯកឧត្តមក៍បានបន្តអញ្ជើញចុះពិនិត្យមើលទីតាំងសម្រាប់ធ្វើចត្តាឡីស័ក ដូចជានៅវិទ្យាល័យនិមិត្ត ក្រុងប៉ោយប៉ែត, វិទ្យាល័យកូប ស្រុកអូរជ្រៅផងដែរ។
នៅព្រឹកថ្ងៃដដែលនេះដែរ មានក្រុមការងារគណៈបញ្ជាការឯកភាពខេត្តកោះកុង ដឹកនាំដោយលោកជំទាវ មិថុនា ភូថង អភិបាលនៃគណ:អភិបាលខេត្តកោះកុង បានអញ្ជើញចុះពិនិត្យនៅច្រកទ្វារព្រំដែនអន្តរជាតិចាំយាម និងមានការចូលរួមពីប្រធានមន្ទីរពេទ្យខេត្តកោះកុង រួមទាំងមន្ត្រីពាក់ព័ន្ធ។
ក្នុងនោះលោកជំទាវបានផ្ដល់មតិណែនាំ ដល់ក្រុមការងារមាត់ច្រក ឲ្យមានការប្រុងប្រយ័ត្ន និងចូលរួមទប់ស្កាត់ឲ្យបានល្អ ត្រូវប្រើឧបករណ៍ការពារខ្លួនដូចជា ពាក់របាំងមុខ ពាក់ម៉ាស និងស្រោមដៃ បាញ់អាកុលលាងដៃឲ្យបានញឹកញាប់៕រក្សាសិទ្ធិដោយ៖បញ្ញាស័ក្តិ
