ឧត្តរមានជ័យ ៖ រដ្ឋបាលខេត្តឧត្តរមានជ័យ បានឲ្យដឹងថា ពលករខ្មែរប្រុស ស្រី ចំនួន១៧២នាក់ នៅព្រឹកថ្ងៃទី២១ ខែធ្នូឆ្នាំ២០២០នេះ បានចាកចេញពីប្រទេសថៃ តាមច្រកអន្តជាតិអូរស្មាច់ ត្រូវបានអជ្ញាធរខេត្តឧត្តរមានជ័យ និងមន្ត្រីពាក់ព័ន្ធ ដឹកជញ្ជូនតាមរថយន្តទៅធ្វើចត្តាឡីស័ករយះពេល១៤ថ្ងៃនៅក្រុងសំរោង។
លោកវេជ្ជបណ្ឌិត ឃ្លោក ហួត ប្រធានមន្ទីរសុខាភិបាលខេត្តឧត្តរមានជ័យ បានថ្លែងឲ្យដឹងនៅព្រឹកថ្ងៃនេះថា ៖ គិតត្រឹមម៉ោង១១និង០០នាទីព្រឹក ថ្ងៃទី២១ ខែធ្នូ ឆ្នាំ២០២០នេះ ពលករខ្មែរចំនួន១៧២នាក់ បានចាកចេញពីប្រទេសថៃតាមច្រកអន្តរជាតិអូរស្មាច់ ស្ថិតក្នុងសង្កាត់អូរស្មាច់ ក្រុងសំរោង ហើយពលករទាំងអស់ ត្រូវបានដឹកជញ្ជូនតាមរថយន្តទៅធ្វើចត្តាឡីស័ករយៈពេល១៤ថ្ងៃ នៅក្នុងក្រុងសំរោង។
នៅព្រឹកនេះដែរ ម៉ាស់ចំនួន ៤០ ម៉ឺនម៉ាស់(ម៉ាស់ក្រណាត់ ២០ ម៉ឺនម៉ាស់ និងម៉ាស់កប្បាសចំនួន ២០ម៉ឺនម៉ាស់) ដែលជាអំណោយរបស់សម្ដេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានដឹកមកដល់ច្រកទ្វារព្រំដែនអន្តរជាតិអូរស្មាច់ហើយ ដើម្បីត្រៀមចែកជូនបងប្អូនពលករ ដែលធ្វើការដំណើរចូលមកប្រទេសកម្ពុជា តាមរយៈច្រកទ្វារអន្តរជាតិអូរស្មាច់។ ចំពោះរថយន្តដឹកជញ្ជូនពលករ ក្រោមការណែនាំរបស់ឯកឧត្ដម ប៉ែន កុសល្យ អភិបាលខេត្តឧត្តរមានជ័យ គឺយើងប្រើប្រាស់រថយន្តរបស់តំបន់ប្រតិបត្តិការសឹករងខេត្តចំនួន៤គ្រឿង និងរថយន្តរបស់ស្នងការដ្ឋានចំនួន១គ្រឿង ជាបណ្តោះអាសន្នសិន។ ស្របពេលរថយន្តរបស់កងទ័ពមកដល់ចំនួន១៥គ្រឿង គឺយើងនឹងឈប់ប្រើរថយន្តសឹករង និងរថយន្តស្នងការនគរបាលខេត្ត ហើយពេល នេះរថយន្តកងទ័ពដែលមកដល់គឺចំនួន៧គ្រឿង ត្រៀមចាំនៅមាត់ច្រកទ្វារអន្តរជាតិអូរស្មាច់ និង៨គ្រឿងទៀតត្រៀមចាំនៅខាងក្រោម។
លោកប្រធានមន្ទីរសុខាភិបាលខេត្ត បានថ្លែងបញ្ជាក់ឲ្យដឹងទៀតថា៖ ថ្ងៃម្សិលម៉ិញ និងថ្ងៃនេះ គឺក្រុមការងារកំពុងខិតខំប្រឹងប្រែង រៀបចំពង្រីកមណ្ឌុលចត្តាឡីស័កបន្ថែមទៀត នៅតាមសាលារៀននានា ហើយលោកក៏ថ្លែងនូវការអរគុណដល់កងកម្លាំងទាំងអស់ ដែលបានចូលរួមក្នុងសកម្មភាពនេះ៕ រក្សាសិទ្ធិដោយ៖បញ្ញាស័ក្តិ
