ទឹកចិត្តដ៏ល្អប្រពៃរបស់លោកគ្រូពេទ្យម្នាក់ បានកំពុងឆក់យកក្តីស្រឡាញ់ និងការកោតសរសើរជាខ្លាំង ពីសំណាក់បងប្អូនមហាជននៅក្នុងបណ្តាញសង្គម ក្រោយពីលោកគ្រូពេទ្យ និងបុគ្គលិករបស់គាត់ បានទទួលយកការអង្វររបស់ស្ត្រីជាយាយម្នាក់ សុំឲ្យជួយព្យាបាលចៅប្រុសរបស់គាត់ ដែលបានជួបគ្រោះថ្នាក់មុតជើងខាងឆ្វេងរបួសធ្ងន់ធ្ងរ បន្ទាប់ពីពេទ្យឯកជនមួយបដិសេធទទួលព្យាបាល នៅពេលឮថាគាត់មានលុយជាប់នឹងខ្លួនតែ ៤ ម៉ឺនរៀលប៉ុណ្ណោះ។
នេះបើយោងតាមគណនីហ្វេសប៊ុកលោកពេទ្យដែលមានឈ្មោះ Sophara Heng ម្ចាស់មន្ទីរសម្រាកព្យាបាលជំងឺ សុខ ហេង អង្គស្នួល បានបង្ហោះឲ្យដឹងថា៖ «ពីរនាក់ចៅហើយនឹងយាយបានទៅគ្លីនិកឯកជនមួយកន្លែង ដោយគាត់បានអង្វរលោកគ្រូពេទ្យខ្ញុំមានលុយតែ ៤០០០០ រៀលទេ ដោយចៅរបស់គាត់មុតប៉ះចំជើងខាងឆ្វេងដេរប្រហែល២០ថ្នេរ លោកគ្រូពេទ្យបាននិយាយថា អត់មានលុយអត់មើលអត់ដេរឲ្យទេ ហើយគាត់បានមកសុំឲ្យខ្ញុំជួយ គាត់ថាអត់មានលុយទេ ចៅរបស់គាត់បានឪពុកម្តាយស្លាប់ចោលតាំងទើបតែកើតមកម្លេះ ខ្ញុំបានឲ្យបុគ្គលិកជួយដេរជើងឲ្យ និងដាក់សេរ៉ូមមិនយកលុយពីគាត់ទេ ជាគ្រូពេទ្យកុំមើលឃើញតែលុយខ្លាំងពេក»។
ក្រោយពីបានឃើញនូវទង្វើដ៏មានចិត្តធម៌របស់ម្ចាស់មន្ទីរពេទ្យខាងលើ បងប្អូននៅក្នុងបណ្តាញសង្គម សម្តែងនូវការកោតសរសើរថា៖ «ទឹកចិត្តល្អប្រពៃណាស់ ស្រឡាញ់ និងគោរពទឹកចិត្តគ្រូពេទ្យ, អរគុណលោកគ្រូចំពោះទឹកចិត្តដល់ល្អមួយនេះ ពេទ្យមួយចំនួនខ្លះខ្ញុំមិនចង់យាយទេ ពេលខ្លះថាអ្នកអត់លុយទៅគេមិនខ្វល់ តែខ្លះទៀតមានលុយហើយអស់លោកនឹងគាត់គៀបស៊ីទាល់តែអស់សាច់លុយ បាននិយាយថាអស់សមត្ថភាព រូចបញ្ជូនទៅក្រៅប្រទេស ធ្លាប់ជួបហើយ, លើកលោកនឹងបើគឹតដូចលោកគ្រូពេទ្យចឹង មិនដឹងជាល្អយ៉ាងណាទេពេទ្យខ្លះឃើញយើងខោមិនខោចូលទៅសួរ មិនចង់ឆ្លើយទេខ្ញុំសប្បាយចិត្តជំនួសប្អូនប្រុស ដែលលោកគ្រូពេទ្យមិនឃើញតែលុយ “អំពើល្អ មិនសាបសូន្យទេ”»៕ រក្សាសិទ្ធិដោយ៖ លឹម ហុង
