ភ្នំពេញ៖ ខណៈឆ្នាំ២០២០នេះ មានការប្រែប្រួលអាកាសធាតុ ធ្វើឱ្យកម្ពុជា ទទួលរងសម្ពាធអាកាសធាតុចុះត្រជាក់មួយរយៈ និងការរាតត្បាតដែលបង្ករឡើងដោយជំងឺកូវីដ១៩ផងនោះ ធ្វើឱ្យរោងចក្រ និងសហគ្រាសមួយចំនួន នៅកម្ពុជា បានផ្អាកដំណើរការអាជីវកម្មបណ្តោះអាសន្ន ធ្វើឱ្យតម្រូវការប្រើប្រាស់អគ្គិសនី ក្នុងឆ្នាំ២០២០ នេះ បានធ្លាក់ចុះជាង១០ភាគរយ បើប្រៀបធៀបនឹងឆ្នាំមុនៗ ដែលមានតម្រូវការខ្ពស់ ។
មន្ត្រីក្រសួងរ៉ែ និងថាមពល បានឱ្យអ្នកសារព័ត៌មានដឹងថា តម្រូវការប្រើប្រាស់អគ្គិសនីនៅកម្ពុជា បានធ្លាក់ចុះប្រមាណ ១០ភាគរយ។ អគ្គិសនីដែលមានបច្ចុប្បន្ននេះ គឺលើសពីតម្រូវការទៅហើយ ដោយសារមានរោងចក្រសហគ្រាសមួយចំនួន បានផ្អាកដំណើរអាជីវកម្មពីវិបិត្តជំងឺកូវីដ១៩ ដែលបញ្ហានេះ មិនមែនតែមាននៅកម្ពុជាយើងនោះទេ វាគឺជាបញ្ហាសកល ដែលប្រទេសនានាក៏ទទួលផលប៉ះពាល់ពីវិបិត្តនេះផងដែរ។ ទន្ទឹមគ្នានេះ សមត្ថភាពអគ្គិសនីផ្ទុក ប្រើប្រាស់នៅកម្ពុជា មានការកើនឡើង មិនមានអ្វីជាការខ្វះខាតនោះទេ សម្រាប់ឆ្នាំនេះ និងឆ្នាំបន្តបន្ទាប់ទៀត” ។
សូមជម្រាប់ផងដែរថា សម្រាប់ឆ្នាំ២០២០ នេះ គម្រោងរោងចក្រអគ្គិសនីជាច្រើនបានដាក់ឱ្យដំណើរការ និងបញ្ចប់ទៅតាមការគ្រោងទុក ដោយមិនមានគម្រោងណាមួយ ទទួលរងនូវផលប៉ះពាល់នោះទេ។ គម្រោងវិនិយោគលើវិស័យអគ្គិសនី នៅកម្ពុជា បានដាក់ឱ្យដំណើរជាច្រើនកន្លែង ដែលរួមមានគម្រោងអគ្គិសនីដុតធ្យូងថ្ម នៅក្នុងខេត្តព្រះសីហនុ និងគម្រោងថាមពលស្អាតសូឡាជាដើម ដែលគម្រោងអគិ្គសនីទាំងនេះបានជួយកាត់បន្ថយភាពក្រីក្ររបស់ប្រជាពលរដ្ឋ តាមរយៈការប្រើប្រាស់អគ្គីសនី ដែលបច្ចប្បន្ននេះ ស្ទើតែគ្រប់ភូមិនៅទូទាំងប្រទេសមានអគ្គិសនីប្រើប្រាស់ជាច្រើន៕
រក្សាសិទ្ធិដោយ៖CEN