ប្រិយមិត្តមួយចំនួនធំបានជ្រាបហើយ ពីគូស្នេហ៍មួយគូដែលគ្រប់គ្នាចាត់ទុកថាជាស្នេហ៍ស្មោះមានពិតក្នុងលោក នោះគឺនៅពេលដែលបុរសជាប្តីដ៏ល្អកម្ររកម្នាក់ តែងតែបានបង្ហោះសារជាបន្តបន្ទាប់បង្ហាញពីទំហំ នៃសេចក្តីស្រឡាញ់ឥតគណនា និងការលើកសរសើរគ្រប់ពេល ក្រោយភរិយាជាទីស្រឡាញ់របស់ខ្លួន បានលាចាកលោកទាំងនៅវ័យក្មេងដោយសារជំងឺបេះដូង ខណៈពេលសម្រាលកូន ប៉ុន្តែ កូនរបស់ពួកគេត្រូវបានគ្រូពេទ្យជួយសង្គ្រោះរួចផុតគ្រោះថ្នាក់។
ដោយឡែក ថ្មីៗនេះ កាលពីថ្ងៃទី២៣ ខែធ្នូ ឆ្នាំ២០២០ បុរសជាប្តីដែលមានគណនីហ្វេសប៊ុកឈ្មោះ Sothon Huot បានបង្ហោះសារមួយទៀត ដែលធ្វើឲ្យគ្រប់គ្នានៅក្នុងបណ្តាញសង្គមឃើញហើយសែនរំជួលចិត្ត និងអាណិតស្រណោះដល់រូបគាត់ជាខ្លាំង ដោយក្នុងនោះគាត់បានសរសេររៀបរាប់ថា៖ «បងធ្វើខជើងជ្រូកដាក់ម្រេចច្រើន ឥលូវឆ្អិនហើយ អូនឆាប់ញ៉ាំណា អូនចូលចិត្តញ៉ាំរបស់ហឹរ…។
យប់មិញបងសុបិនឃើញអូនម្តងទៀតហើយ (លើកទី5) គឺបងឡើងទៅយកគ្រឿងសម្រាប់អូន ហើយមកវិញល្ងាចហើយ អូនបិទកន្លែងលក់ហើយ ។ បងមកដល់បើកទ្វារ បងឃើញអូនកំពុងតែរៀបចំគ្រឿងទុកដាក់ដូចសព្វដង បងឈរមើលសប្បាយចិត្តហើយ ។
មួយសន្ទុះអូនក៏និយាយថា “ហើយបងនៅឈរធ្វើអីទៀត មិនចូលមករៀបចំមក មុខញញឹមធ្វើមើលតែបែកគ្នាយូរទើបតែបានជួបចឹង គ្រាន់តែទៅយកគ្រឿងឲ្យអូនសោះ បែកមិនបានដែរ យ៉ាប់មែនធន” ។
បងសួរអូនថា ល្ងាចទៅAeonអត់? (ព្រោះអូនចូលចិត្តដើរលំហែអារម្មណ៍)អូនឆ្លើយថា អត់ទេ! អត់ស្រួលខ្លួន ចង់ទៅផ្ទះដេកអោបអ្នកខ្លះវិញ (មុខអូនញញឹម)…..បងក៏ដឹងខ្លួន ប្រពន្ធជាទីស្រឡាញ់ Soknath Darasina»៕ រក្សាសិទ្ធិដោយ៖ លឹម ហុង
