ភ្នំពេញ៖ កំពូលតារាចម្រៀងលោក ព្រាប សុវត្ថិ នៅថ្ងៃទី ២៦ ខែធ្នូ ២០២០នេះ បានលើកឡើងថា ចំពោះការផ្សព្វផ្សាយ ដែលបានធ្វើឲ្យសាធារណជនភាន់ច្រឡំ ក្នុងករណីវិវាទដីធ្លីរវាងរូបលោក ព្រាប សុវត្ថិ និងឯកឧត្តម ម៉ៅ ធនារក្ស ដោយបានបញ្ជាក់ថា ករណីនេះត្រូវបានលោកជំទាវកិត្តិសង្គហបណ្ឌិត ម៉ែន សំអន ឧបនាយករដ្ឋមន្ត្រី និងជារដ្ឋមន្ត្រីក្រសួងទំនាក់ទំនងជាមួយរដ្ឋសភា-ព្រឹទ្ធសភា និងអធិការកិច្ច បានធ្វើការសម្របសម្រួលបញ្ចប់ ជាព័ត៌មានមិនពិតនោះទេ។
ប៉ុន្តែជាក់ស្ដែងការបញ្ចប់វិវាទដីធ្លីដែល លោកជំទាវកិត្តិសង្គហបណ្ឌិត ធ្វើការសម្របសម្រួលនោះគឺរវាងរូបលោក និងឯកឧត្តម យឹម លុច្ស ក្រុមប្រឹក្សាខេត្តមណ្ឌលគិរីលើផ្ទៃដីទំហំ ១៥,៦៣៤ ហិកតានៅភូមិពូទ្រូ ឃុំសែនមនោរម្យ ស្រុកអូររាំង ខេត្តមណ្ឌលគិរី ពុំមែនជាករណីវិវាទជាមួយឯកឧត្តម ម៉ៅ ធនារក្សនោះឡើយ។ ដូច្នេះសូមបងប្អូនសាធារណជននិងសារព័ត៌មានមេត្តាជ្រាប និងកុំបន្តការភាន់ច្រឡំទៀត។
លោកបាទ ព្រាប សុវត្ថិ សូមធ្វើបញ្ជាក់ថា ដោយសារថ្មីៗនេះមានសារព័ត៌មាន និងបណ្តាញសង្គមមួយចំនួន បានធ្វើការផ្សព្វផ្សាយនូវព័ត៌មានទាក់ទងទៅនឹងករណីវិវាទដីធ្លីរវាងរូបខ្ញុំបាទជាមួយ ឯកឧត្តម ម៉ៅ ធនារក្ស ជាសមាជិក ក្រុមប្រឹក្សាខេត្ត ថាករណីវិវាទដីធ្លីនេះត្រូវបាន លោកជំទាវកិត្តិសង្គហបណ្ឌិត ម៉ែន សំអន ឧបនាយករដ្ឋមន្ត្រី និង ជារដ្ឋមន្ត្រីក្រសួងទំនាក់ទំនងជាមួយរដ្ឋសភា-ព្រឹទ្ធសភា និងអធិការកិច្ច បានធ្វើការ សម្របសម្រួល បញ្ចប់ករណីវិវាទដីធ្លីនេះហើយ ចំពោះព័ត៌មាននេះមិនមែនជាការត្រឹមត្រូវទេ។
លោកសូមជម្រាបជូនសាធារណជនមេត្តាជ្រាបថា៖ កន្លងមកខ្ញុំបាទបានដាក់ពាក្យសុំកិច្ចអន្តរាគមន៍មក លោក ជំទាវ កិត្តិសង្គហបណ្ឌិត ឧបនាយករដ្ឋមន្ត្រី រដ្ឋមន្ត្រីក្រសួងទំនាក់ទំនងជាមួយរដ្ឋសភា-ព្រឹទ្ធសភា និងអធិការកិច្ច ដើម្បីជួយដោះស្រាយករណីវិវាទដីធ្លីរបស់ខ្ញុំជាមួយ ឯកឧត្តម យីម លុច្ស សមាជិកក្រុមប្រឹក្សាខេត្ត មណ្ឌលគិរី លើផ្ទៃដីទំហំ១៥.៦៣៤ហិកតាដែលមានទីតាំងស្ថិតនៅ ភូមិពូទ្រ ឃុំសែនមនោរម្យ ស្រុកអូររាំង ខេត្តមណ្ឌលគិរី ។ ករណីវិវាទដីធ្លីរបស់ខ្ញុំបាទត្រូវបានគណៈប្រតិភូរបស់ក្រសួងទំនាក់ទំនងជាមួយរដ្ឋសភា ព្រឹទ្ធសភា និងអធិការកិច្ចចុះ អង្កេតស្រាវជ្រាវករណីអស់រយៈពេលជិត ១ ឆ្នាំ ទើបនៅថ្ងៃទី២២ ខែធ្នូ ឆ្នាំ២០២០ លោកជំទាវកិត្តិសង្គហបណ្ឌិត ម៉ែន សំអន ឧបនាយករដ្ឋមន្ត្រី ធ្វើការសម្របសម្រួលបញ្ចប់វិវាទដោយរូបខ្ញុំបាទ និង ឯកឧត្តម ម លុច្ស បានឯក ភាពទទួលយកនូវលទ្ធផលនៃការសម្របសម្រួលស្របតាមយុទ្ធសាស្ត្រឈ្នះ-ឈ្នះរបស់សម្តេចអគ្គមហាសេនាបតី តេជោ ហ៊ុន សែន នាយករដ្ឋមន្ត្រី ជាប្រមុខដឹកនាំរាជរដ្ឋាភិបាលនៃព្រះរាជាណាចក្រកម្ពុជា។
ដោយឡែកករណីវិវាទដីធ្លីដែលមានទំហំប្រមាណ ១៩៣២៩០ ម៉ែត្រការ៉េ មានទីតាំងស្ថិតនៅភូមិអូរស្ថានសង្កាត់ ស្ពានមានជ័យ ក្រុងសែនមនោរម្យ ខេត្តមណ្ឌលគិរី រវាងរូបខ្ញុំបាទជាមួយ ឯកឧត្តម ម៉ៅ ធនារក្ស ជាសមាជិកក្រុមប្រឹក្សា ខេត្តមណ្ឌលគិរី គឺកំពុងស្ថិតនៅក្នុងនីតិវិធីនៃការអង្កេតស្រាវជ្រាវរបស់ថ្នាក់ក្រុង និងខេត្តនៅឡើយ ករណីវិវាទនេះគឺនៅពុំ ទាន់មានដំណោះស្រាយនិងលទ្ធផលនៅឡើយទេ។ ហេតុដូចបានជម្រាបជូនខាងលើសូមសាធារណជនជ្រាបជាព័ត៌មាន។
ជាចុងបញ្ចប់ លោកសូមគោរពថ្លែងអំណរគុណយ៉ាងជ្រាលជ្រៅជូនចំពោះលោកជំទាវកិត្តិសង្គហបណ្ឌិត ម៉ែន សំអន ឧបនាយករដ្ឋមន្ត្រី និងជារដ្ឋមន្ត្រីក្រសួងទំនាក់ទំនងជាមួយរដ្ឋសភា-ព្រឹទ្ធសភា និង អធិការកិច្ចដែលបានយកចិត្តទុកដាក់ខ្ពស់ក្នុងការចាត់តាំងគណៈប្រតិភូ ចុះធ្វើការអង្កេតស្រាវជ្រាវលើករណីវិវាទរបស់ខ្ញុំ បាទដោយឈរលើគោលការណ៍តម្លាភាពនិងយុត្តិធម៌ ដែលធ្វើឲ្យគូភាគីទាំងពីរទទួលយកនូវលទ្ធផលនៃការសម្របសម្រួល របស់ លោកជំទាវឧបនាយករដ្ឋមន្ត្រី ដោយសេចក្តីគោរពដ៏ខ្ពង់ខ្ពស់៕រក្សាសិទ្ធិដោយ៖បញ្ញាស័ក្តិ
