ភ្នំពេញ៖ឯកឧត្តម ជិន ម៉ាលីន រដ្ឋលេខាធិការ និងជាអ្នកនាំពាក្យក្រសួងយុត្តធម៌ បញ្ជាក់ចំនួន ០៣ចំណុច អំពីទិដ្ឋភាពច្បាប់ នៃការចេញអធិបញ្ជារបស់រដ្ឋមន្ត្រីយុត្តិធម៌ ទៅព្រះរាជអាជ្ញាដើម្បីអនុវត្តវិធានការយ៉ាងតឹងរ៉ឹងម៉ឺងម៉ាត់បំផុតលើបុគ្គលឈ្មោះសមរង្ស៊ីដែលប្រមាថអង្គព្រះមហាក្សត្រ កាលពីពេលថ្មីៗនេះ ។
អ្នកនាំពាក្យក្រសួងយុត្តធម៌ បញ្ជាក់ថា៖ ១.ការប្រមាថដល់អង្គព្រះមហាក្សត្រ មិនមែនជាការអនុវត្តសិទ្ធិសេរីភាពនៃការបញ្ចេញមតិនោះទេ តែជាបទល្មើសព្រហ្មទណ្ឌដែលមានចែងនិងផ្តន្ទាទោសតាមបញ្ញតិនៃមាត្រា៤៣៧ស្ទួន នៃក្រមព្រហ្មទណ្ឌព្រះរាជាណាចក្រកម្ពុជា និងជាការរំលោភបំពានយ៉ាងធ្ងន់ធ្ងរផងដែរលើស្មារតីមាត្រា៧នៃរដ្ឋធម្មនុញ្ញកម្ពុជា។
២. ការចេញអធិបញ្ជារបស់រដ្ឋមន្ត្រីយុត្តិធម៌ មិនមែនជាការធ្វើតាមការបង្គាប់បញ្ជារបស់ស្ថាប័នឬឥស្សរជនណានោះទេ តែគឺជាការអនុវត្តតួនាទី ភារកិច្ច និងការទទួលខុសត្រូវរបស់ខ្លួនក្នុងនាមជារដ្ឋមន្ត្រីយុត្តិធម៌ និងស្របតាមបញ្ញត្តិមាត្រា២៩ នៃក្រមនីតិវិធិព្រហ្មទណ្ឌព្រះរាជាណាចក្រកម្ពុជា ក្នុងគោលដៅការពារសេចក្តីថ្លៃថ្នូរ និងព្រះកិត្តិនាមរបស់អង្គព្រះមហាក្សត្រ ដែលជាទីគោរពសក្ការៈដ៏ខ្ពង់ខ្ពស់បំផុតរបស់ប្រជាជាតិខ្មែរ។
៣. ការចេញអធិបញ្ជារបស់រដ្ឋមន្ត្រីយុត្តិធម៌ដល់ស្ថាប័នអយ្យការ មិនមែនជាការរំលោភបំពានលើអំណាចតុលាការនោះទេ ព្រោះថារដ្ឋមន្ត្រីយុត្តិធម៌ជាប្រធានថានានុក្រមនៃស្ថាប័នអយ្យការដែលតំណាងឱ្យស្ថាប័ននីតិប្រត្តិបត្តិ ក្នុងការអនុវត្តនយោបាយព្រហ្មទណ្ឌរបស់រាជរដ្ឋាភិបាល ក្នុងគោលដៅការពារនិងថែរក្សាសន្តិសុខសង្គម សណ្តាប់ធ្នាប់សាធារណៈ និងផលប្រយោជន៍ជាតិ៕ រក្សាសិទ្ធិដោយ៖បញ្ញាស័ក្តិ
