ភ្នំពេញ៖ គ្រប់គ្នានៅក្នុងបណ្តាញសង្គម ពិតជាមានការរំជួលចិត្តខ្លាំងណាស់ ក្រោយពីបានដឹងថា ក្មេងប្រុសម្នាក់ ពិតជាមានការតស៊ូខ្លាំងណាស់ ដោយរូបគេខំរុញរទេះដើរលក់លៀសរហូតទល់យប់អាធ្រាត្រ ព្រោះតែលក់ពេលថ្ងៃពុំដាច់ ដើម្បីបានប្រាក់មកផ្គត់ផ្គង់ជីវិតភាពប្រចាំថ្ងៃចិញ្ចឹមប្អូនៗ៥នាក់ ខណៈម្តាយរបស់ពួកគេមានផ្ទៃពោះទម្ងន់ជិតគ្រប់ខែពុំអាចធ្វើការរកស៊ីបាន រីឯឪពុកទៅធ្វើការសំណង់នៅឆ្ងាយ។
តាមរយៈទំព័រហ្វេសប៊ុកឈ្មោះ «ខ្ញុំបាទរ៉ាហ្វីនដែលជាយុវជនមូស្លីមកម្ពុជា» បានបង្ហោះរូបភាពប៉ុន្មានសន្លឹកពីក្មេងប្រុសកម្សត់ខាងលើ និងភ្ជាប់សំណេររៀបរាប់ទាំងក្តីអាណិតអាសូរថា៖ «ម្ដាយទម្ងន់ជិតគ្រប់ខែ កូនបងតស៊ូលក់លៀសដើម្បីចិញ្ចឹមប្អូនប្រាំនាក់លក់អត់ដាច់សូមជួយស៊ែរផង ខ្ញុំឃើញហើយអាណិតណាស់ បើសិនជាបងប្អូនឃើញគាត់នៅកន្លែងណាជួយទិញគាត់ផង បងប្អូនពេលដឹងរឿងទើបដឹងថាជីវិតជាបងប្រុស គឺតស៊ូលំបាកដើម្បីប្អូនប្រុស៥នាក់ ទាំងក្នុងផ្ទៃពោះម្តាយ ឯឪពុកទៅឆ្ងាយធ្វើសំណង់ ថ្ងៃនេះលក់ដល់យប់ ទិញលៀស៦ម៉ឺនលក់បាន១ម៉ឺន ទ្រហោរយំគ្មានដើមឲ្យថ្លៃលៀស ផ្ទះក៏ឆ្ងាយគ្មានកម្លាំងអស់សង្ឃឹមដើរ មិនដល់គិតពីម្តាយជិតសម្រាល និងប្អូនៗចាំបាយ… ជីវិត និងគ្រួសារ ហើយបើសិនជាបងប្អូនចង់ជួយគាត់អាចទំនាក់ទំនងមកលេខទូរស័ព្ទ 081 641 318 ខ្ញុំនឹងទៅជួបគាត់»។
ក្រោយពីបានឃើញបែបនេះ ទន្ទឹមនោះផងដែរ ក៏មានមហាជនជាច្រើនបានសម្តែងនូវការកោតសរសើរពុំដាច់ពីមាត់ ចំពោះការខិតខំរបស់ក្មេងប្រុសនោះ ខណៈអ្នកខ្លះទៀត ក៏ព្រោះតែឃើញអាណិតពេក ក៏បានផ្តល់ជាយោបល់ថា៖ «អាណិតក្មេងណាស់ទើបតែអាយុប៉ុណ្ណឹងចេះដឹងសុខទុក្ខគ្រួសារ តែម្ដាយគួរតែឈប់យកកូនទៀតទៅ អាណិតក្មេងណាស់ កើតមកពិបាកដដែល អាណិតណាស់»។
ជាមួយគ្នានោះផងដែរ ដោយក៏មានក្តីអាណិតទៅដល់ក្មេងកម្សត់តស៊ូជម្នះឧបសគ្គជួយគ្រួសារបែបនេះ កូនស្រីលោកតាវ៉ិចទ័រតារាកំប្លែងកញ្ញា នីឡា បានប្រកាសក្នុងបំណងចង់ចូលរួមជួយឧបត្ថម្ភទៅដល់ក្មេងប្រុស ទៅតាមសន្ធារបស់ខ្លួនមានដោយបញ្ជាក់ថា៖ «ចង់ជួយគាត់ ទោះមិនមានលុយច្រើនជួយក៏ចង់ជួយគាត់ដែរ»៕ រក្សាសិទ្ធិដោយ៖ លឹម ហុង
