ភ្នំពេញ៖ មនុស្សភាគច្រើន ជាពិសេសនារីៗ តែងតែសន្សំលុយញាត់ចូលក្នុង «ធនគារកូនជ្រូក » តាមខ្នាតតូច ឬខ្នាតធំ ដែលទិញមកពីផ្សារ ដើម្បីកាត់បន្ថយការចាយវាយខ្ជះខ្ជាយអស់ដោយមិនដឹងខ្លួន។ ពិតមែនហើយ មិនត្រឹមធ្វើឲ្យអ្នកអាចដោះទាល់ការលំបាកក្នុងគ្រាណាមួយប៉ុណ្ណោះទេ តែវាក៏អាចធ្វើឲ្យជីវភាពរបស់អ្នកល្អប្រសើរផងដែរ ប្រសិនបើអ្នកតាំងចិត្តសន្សំលុយតាមរយៈវិធីមួយនេះ។
តែយ៉ាងណា ការសន្សំលុយតាមវិធីនេះ ក៏ត្រូវបានគេនិយាយតៗគ្នាថា អាចប្រឈមហានិភ័យទឹកភ្នែកផងដែរ ព្រោះថា ការទុកលុយនៅក្នុង «កូនជ្រូក» យូរខែ គឺនឹងអាចធ្វើឲ្យពុកលុយ ឬ ក៏ដុះផ្សិតផងដែរ។ ប៉ុន្តែ ការលើកឡើងបែបនេះ មិនបានធ្វើឲ្យមនុស្សជាច្រើនដែលពុំធ្លាប់ជួបផ្ទាល់ ជឿនោះឡើយ។ ប៉ុន្តែ រឿងនេះគឺជាការពិត ដែលតែងកើតមានឡើងត្រូវបានសាម៉ីខ្លួនបង្ហោះឲ្យឃើញនៅលើបណ្តាញសង្គមជារឿយៗ។
ជាក់ស្តែង អ្វីដែលយើងគ្រប់គ្នាភាគច្រើនមិនជឿ ឥឡូវនេះបានឃើញច្បាស់មួយករណីទៀតហើយ គឺថាលុយជាង ១០ លានរៀល ត្រូវដុះផ្សិត ពុកផុយសឹងតែទាំងស្រុងតែម្តង ក្រោយសន្សំទុកនៅក្នុងកូនជ្រូកដីអស់រយៈពេល ១ ឆ្នាំ។
នេះបើតាមម្ចាស់សាម៉ីខ្លួនដែលមានគណនីហ្វេសប៊ុកឈ្មោះ Oun Vy Oun Pig បានបង្ហោះរៀបរាប់និយាយលែងចេញ និងក៏ដូចផ្តាំផ្ញើទៅដល់អ្នកដទៃដែលមានបំណងដាក់លុយក្នុងកូនជ្រូកថា៖ «អស់សង្ឃឹមហើយទឹកភ្នែកក៏មិនស្រក់ដែរ 12pro max ក្លាយជា12ប៉ែតហើយ សុំផ្តាំអ្នកដាក់លុយកូនជ្រូកប្រយត្ន័ដូចខ្ញុំ»។
ក្រោយពីបានឃើញបែបនេះ ក៏មានបងប្អូនអ្នកលេងបណ្តាញសង្គម បានណែនាំឲ្យយកលុយខូចខាតទាំងនោះទៅដូរនៅធនាគារជាតិទៅ អត់កាត់ទឹកទេ។ ប៉ុន្តែ ម្ចាស់លុយបានឆ្លើយប្រាប់ទៅវិញថា អ្នកធ្វើការនៅនឹងថា ប្រហែលមួយចំនួនដូរអត់បានដោយសារផុយបាត់រូបរាង។ ម្ចាស់លុយបន្តថា៖ «ដូរបានខ្លះ តែផុយប្រហែល៧លានម៉ត់ចូលគ្នាដូរអត់បាន»។
នៅពេលសួរថា លុយទាំងអស់ប៉ុន្មាន? នាងក៏បានប្រាប់ថា លុយទាំងអស់ជាង ១០ លានរៀល និងរើសបានល្អតែ២លានរៀលប៉ុណ្ណោះ។ ដោយឡែក នៅពេលសួរមូលហេតុថា មកពីត្រូវទឹកទេដឹងចែ? នាងក៏បានប្រាប់ឲ្យដឹងទៀតថា អត់ត្រូវទឹកទេ តែលុយពុកផុយ តែជ្រូក១ទៀតមិនអី ខូចតែមួយហ្នឹង៕ រក្សាសិទ្ធិដោយ៖ លឹម ហុង
