សុំសរសើរ! ស្រឡាញ់គ្នាតាំងពីថ្នាក់វិទ្យាល័យ ទល់ចប់មហាវិទ្យាល័យ ចេញធ្វើការសន្សំដឹកដៃគ្នាចូលរោងការ ចុងក្រោយ ក្លាយជាឪពុកម្តាយគេទាំងវ័យក្មេង និងចាស់ទំទៀត

January 9, 2021

ភ្នំពេញ៖ គូស្នេហ៍មួយគូ បានធ្វើឲ្យមហាជនមានការស្ងើចសរសើរ និងរំភើបជំនួសពួកគេជាខ្លាំង ព្រោះតែមិននឹកស្មានថា ពួកគេបានបង្កាត់ភ្លើងស្នេហ៍តាំងពីថ្នាក់វិទ្យាល័យ ប៉ុន្តែ ពុំបានភ្លេចការសិក្សានោះទេ គឺពួកគេបានជំនះឧបសគ្គយ៉ាងច្រើន តស៊ូរហូតរៀនចប់មហាវិទ្យាល័យ និងមានការងារធ្វើរៀងៗខ្លួន ហើយបន្តទំនាក់ទំនងស្នេហ៍ដ៏ស្មោះស្ម័គ្រឈានដល់ដឹកដៃគ្នាចូលរោងការ ដើម្បីបំពេញមុខមាត់ កិត្តិយសគ្រួសារទាំងសងខាង និងបង្កើតបានគ្រួសារតូចមួយដ៏ស្រស់បំព្រងជាមួយកូនប្រុសម្នាក់ជាចំណងដៃនាពេលនេះ ដែលផ្ទុយពីគូស្នេហ៍ជាយុវវ័យភ្លើងចំបើងភាគច្រើន។

នៅក្នុងខួបអាពាហ៍ពិពាហ៍របស់ខ្លួន នារីជាភរិយាដែលមានគណនីហ្វេសប៊ុកឈ្មោះ Thida Rachana បានសរសេររៀបពីប្រវត្តិស្នេហ៍តាំងពីគ្រាដំបូង អមជាមួយរូបភាពតាមដំណាក់កាលនីមួយៗ ក្នុងសំណេរបង្ហោះឡើងថា៖ “ថ្ងៃនេះមករៀបរាប់ពីប្រវត្តិជីវិតគូរបស់ខ្ញុំតិច ដោយសារថ្ងៃនេះ ជាថ្ងៃខួបអាពាហ៍ពិពាហ៍របស់យើងទាំងពីរហ៎ រូបទី១៖ កាលរៀនវិទ្យាល័យជាមួយគ្នា អូនថ្នាក់A បងថ្នាក់D។ រូបទី២៖ កាលរៀនសាកលជាមួយគ្នាបងថ្នាក់ច្បាប់ អូនថ្នាក់ accounting។ រូបទី៣៖ ថ្ងៃដែលយើងបានប្រាកដច្បាស់លាស់ជាមួយគ្នា ថ្ងៃទី២១ ខែធ្នូ ឆ្នាំ២០១៨។ រូបទី៤៖ ធ្វើការជាមួយគ្នា ហាលថ្ងៃ ហាលខ្យល់ ហាលភ្លៀងជាមួយគ្នា អនុស្សាវរីយ៍ច្រើននៅផ្លូវល្បឿនលឿនភ្នំពេញ ព្រះសីហនុ។ រូបទី៥៖ យើងចាប់ផ្ដើមបង្កើតគ្រួសារ សន្សំលុយសាងគ្រួសារជាមួយគ្នា។ រូបទី៦៖ ថ្ងៃពិសេសរបស់យើងទាំងពីរនាក់ ថ្ងៃនេះឆ្នាំមុន ថ្ងៃទី០៥ ខែមករា ឆ្នាំ២០២០។ រូបទី៧៖ បន្ទាប់មកយើងក៏មានចំណងដៃក្រោយអាពាហ៍ពិពាហ៍ នោះគឺកូនប្រុសជាទីស្រឡាញ់ នឹកឃើញពេលនោះប្ដីថ្នមណាស់។ រូបទី៨៖ ថ្ងៃដែលមិនអាចបំភ្លេចបានសប្បាយ ឈឺផង ស្រែកផង ២ម៉ោង បានចេញអាល្អិតតូចចេញមក 贺文宝 ណាវិនប៉ោ។ រូបទី៩៖ ថ្ងៃអាទិត្យត្រូវជូនលោកកូនដើរលេង ពេលនឹងអាអូនដូចបានបីខែ។ រូបទី១០៖ កាលអាអូន ៤ខែនាំទៅលំហែលអារម្មណ៍ម្ដងទៀត។ រូបទី១១៖ មានតែពេលយប់ទេបានៗ នៅជួបជុំគ្នា ប្រលែងសើចក្អាកក្កាយ ពេលខ្លះក៏វិលមុខដែលពេលលោកកូនគាត់កូរ។ រូបទី១២៖ ក្រៅពីម្នាក់ៗរវល់រាងខ្លួន ប្រពន្ធធ្វើការ ប្ដីរកសុី ចឹងមានតែពេលបុណ្យទៀនទេ ដែលមានពេលនៅក្បែរគ្នាបានច្រើន ធ្វើដំណើរកំសាន្តជាមួយគ្នា មើលថែគ្នា ផ្ដល់សុភមង្គល នឹងអនុស្សាវរីយ៍ អោយគ្នាទៅវិញទៅមក។

ជាចុងក្រោយក្នុងថ្ងៃខួបអាពាហ៍ពិពាហ៍របស់យើងមានតែជូនពរឲ្យមានគ្រួសារយើង មានក្ដីសុខសុភមង្គលជាមួយគ្នារួមសុខ រួមទុក្ខ រកស៊ីមានបាន ជាពិសេសឲ្យកូនខ្ញុំជាកូនដែលគន្លងធម៍ ចេះគោរពចាស់ទុំ អ្នកដទៃ អោយគេអាណិតស្រឡាញ់ Happy Wedding Anniversary My husband”៕ រក្សាសិទ្ធិដោយ៖ លឹម ហុង