បាត់ដំបង៖ អាជ្ញាធរស្រុកគាស់ក្រឡនិងក្រុមការងារចុះជួយឃុំព្រះផុស បានចុះផ្សព្វផ្សាយពីវិធានការទប់ស្កាត់ជំងឺកូវីដ១៩ នៅតាមខ្នងផ្ទះដល់ពលរដ្ឋក្នុងមូលដ្ឋាន និងតាមតំបន់ដាច់ស្រយ៉ាល រួមទាំងផ្ដល់នូវបរិក្ខាអនាម័យនិងស្បៀងមួយចំនួន ដែលធ្លាប់ប៉ះពាល់ដោយសារជំនន់ទឹកភ្លៀង នាពេលកន្លងមកផងដែរ ការចុះផ្សព្វផ្សាយនោះ បានធ្វើឡើងកាលពីថ្ងៃទី១០ ខែមករា ឆ្នាំ២០២១។
លោក ញឹក សារ៉ែន អភិបាលស្រុកគាស់ក្រឡ បានមានប្រសាសន៍ថា សម្រាប់ពលករក្នុងស្រុកគាស់ក្រឡ ដែលទើបមកពី
ថៃមានចំនួន៩នាក់នឹងត្រូវធ្វើចត្តាឡីស័ក នៅក្នុងវិទ្យ័យមោងឬស្សីស្ថិតក្នុងស្រុកមោងឬស្សី និងពុំមានរកឃើញជំងឺកូវីដ១៩នោះទេ។
សម្រាប់ការងារអប់រំពលរដ្ឋ ពីបញ្ហាជំងឺនេះ ត្រូវបានធ្វើចាប់ពីមានការផ្ទុះឡើងនៃជំងឺនេះ ហើយពលរដ្ឋក្នុងស្រុកមួយចំនួន ពួកគាត់មានការយល់ដឹងច្រើន រួមទាំងអនុវត្តនូវវិធានការទប់ស្កាត់ តាមការណែនាំរបស់ក្រសួងសុខាភិបាល។
លោកស្រី សុត សុវណ្ណដា ប្រធានក្រុមការងាររាជរដ្ឋាភិបាលនិងលោក ស្រេង វង្សហៀង ប្រធានក្រុមការងារគណបក្សប្រជាជនកម្ពុជា ចុះជួយឃុំព្រះផុស បាននាំ អំណោយជូនពលរដ្ឋតាមខ្នងផ្ទះ ចំនួន១០៥២គ្រួសារ នៅទូរទាំងឃុំ ដែលឧបត្ថម្ភដោយក្រុមហ៊ុន វេទមន្តកំពូលសម្រស់ ។
លោក ស្រេង វង្សហៀង បាននាំការផ្ដាំផ្ញើរសាកសួរសុខទុក្ខពីសំណាក់សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងលោកប្រធានក្រុមការងារចុះជួយស្រុកគាស់ក្រឡនិងអំពាវនាវដល់ពលរដ្ឋទាំងអស់ សូមបន្តអនុវត្តនូវវិធានការទប់ស្កាត់ជំងឺកូវីដ១៩ តាមការណែនាំរបស់រាជរដ្ឋាភិបាលនិងក្រសួងសុខាភិបាល មានលាងដៃនឹងទឹកស្អាត លាងនឹងអាល់កុល ជែល នៅពេលចេញក្រៅទៅតាមទីសាធារណៈ ត្រូវពាក់ម៉ាស់ឲ្យបានខ្ជាប់ខ្ជួន រួមទាំងរក្សាគម្លាតសង្គមជាដើម ៕រក្សាសិទ្ធិដោយ៖អ៊ុងសារុំ
