ចំនួនអ្នកស្លាប់ដែលជាជនស៊ីវិល បានកើនដល់ ៣០០នាក់ ហើយក្នុងរយៈពេល ៣ថ្ងៃ ដោយសារតែ កងកំលាំងរដ្ឋាភិបាលស៊ីរី បានធ្វើការវាយប្រហារតាមដែនអាកាស និងទំលាក់គ្រាប់បែកនៅតំបន់ Ghouta ភាគខាងលិច នៃប្រទេសស៊ីរី។ នេះបើតាមការចេញផ្សាយរបស់ CNN នៅថ្ងៃព្រហស្បតិ៍នេះ។
ក្រុមគ្រួពេទ្យបានបង្ខំចិត្តប្រើប្រាស់ថ្នាំហួសការបរិច្ឆេតដើម្បីព្យាបាលមនុស្ស។ នេះបើតាមសកម្មជន និងគ្រូពេទ្យបានបញ្ជាក់។
មនុស្សយ៉ាងតិចចំនួន ២៦០នាក់បានស្លាប់ និង ៥០០នាក់រងរបួស ចន្លោះថ្ងៃច័ន្ទ និងអង្គារ នៅតំបន់ Ghouta ដែលជា កន្លែងក្រុមឧទ្ទាមកាន់កាប់ ក្រោយពេលកងកំលាំងរបបស៊ីរី បានវាយប្រហារលើក្រុមទាំងនោះ។
ការវាយប្រហារលើតំបន់ Ghouta ស្ថិតនៅជាយក្រុងរដ្ឋធានី Damascus ដែលត្រូវបានឡោមព័ទ្ធដោយកងកំលាំងរបបលោក Bashar al-Assad អស់រយៈពេលជាច្រើនឆ្នាំមកហើយ បានទទួលរងការថ្កោលទោសជាអន្តរជាតិ ខណៈអង្គការលើកលែងទោសអន្តរជាតិ បានបញ្ជាក់ថា ឧក្រិដ្ឋកម្មសង្រ្គាមបានកំពុងប្រព្រឹត្តនៅកន្លែងនោះ។
ចំនែកអគ្គលេខាធិការអង្គការសហប្រជាជាតិ Antonio Guterres បានចាត់ទុកទីកន្លែងនោះជាឋាននរកនៅលើផែនដី (Hell on Earth)។
របបដឹកនាំដោយប្រធានាធិបតី Bashar al-Assad គាំទ្រដោយប្រទេសរុស្សី។
សូមបញ្ជាក់ផងដែរថា តំបន់ភាគខាងកើត Ghoutaគឺជាតំបន់ដែលត្រូវបានគ្រប់គ្រងដោយពួកឧទ្ទាមអ៊ីស្លាមជាច្រើនក្រុម ហើយក្រុមមួយចំនួន បានចង់សម្ព័ន្ធមិត្តជាមួយនឹងក្រុមអាល់កៃដា
(al Qaeda) ផងដែរ៕ សុភ័ក្ត្រ
