នៅក្នុងកិច្ចប្រជុំពិភាក្សាកែសម្រួលលក្ខណៈសម្បត្តិ នៃគោលនយោបាយភូមិ-ឃុំ មានសុវត្ថិភាព កាលពីថ្ងៃទី៨ ខែមករា ឆ្នាំ២០២១ សម្ដេចក្រឡាហោម ស ខេង ឧបនាយករដ្ឋមន្ដ្រី រដ្ឋមន្ដ្រីក្រសួងមហាផ្ទៃ បានស្នើដល់កម្លាំងនគរបាល សហការជាមួយក្រសួងសាធារណការ និងដឹកជញ្ជូន ត្រូវបង្ក្រាបឲ្យអស់ពួកក្មេងស្ទាវកែច្នៃបំពង់ស៊ីម៉ាំងលាន់ឮ និងត្រូវស្រាវជ្រាវកំណត់បន្ថែមអត្តសញ្ញាណម៉ូតូធំៗ ដែលក៏លេងស៊ីម៉ាំងបង្កសំឡេងរំខានដល់ប្រជាពលរដ្ឋ។
ក្រោយសម្តេចក្រឡាហោម ស ខេង បានដាក់ចេញបទបញ្ជានេះ នាយឧត្តមសេនីយ៍សន្ដិបណ្ឌិត នេត សាវឿន ក៏បានឲ្យសមត្ថកិច្ចនគរបាលអនុវត្តការងារនេះភ្លាមៗផងដែរ។ តែយ៉ាងណា បានដូចចិត្ត ស្រាប់តែមន្ត្រីមួយចំនួន ចុះអនុវត្តលើសពីការណែនាំ រហូតដល់ចូលចាប់ម៉ូតូធំកែច្នៃបំពង់ស៊ីម៉ាំងឮខ្លាំងបង្កការរំខានដល់ក្នុងផ្ទះតែម្តង ដែលខុសពីបទបញ្ជាថ្នាក់លើ ឲ្យចាប់នៅលើដងផ្លូវប៉ុណ្ណោះ។
ជាក់ស្តែង ក្រោយពីមានប្រតិកម្មជាច្រើនពីប្រជាពលរដ្ឋ ជុំវិញប្រតិបត្តិការចាប់ម៉ូតូធំ១គ្រឿង ដែលចោទថាបំពាក់បំពង់ស៊ីម៉ាំងប្រែនខុសបច្ចេកទេស នៅក្នុងខណ្ឌចំការមន ភ្លាមៗនោះ ឧត្តមសេនីយ៍ឯក ស ថេ ត អគ្គស្នងការរងនគរបាលជាតិ និងជា ស្នងការនគរបាលរាជធានីភ្នំពេញ កាលពីថ្ងៃទី១២ ខែមករា ឆ្នាំ២០២០ ម្សិលមិញនេះ ក៏បានដាក់បទបញ្ជា ដល់កម្លាំងនគរបាលទាំង១៤ ខណ្ឌ ក្នុងរាជធានី ភ្នំពេញ ឱ្យផ្អាកសកម្មភាពចាប់ម៉ូតូធំដែលមានបំពង់ស៊ីម៉ាំងប្រែនបង្កការរំខានជា បណ្ដោះអាសន្នសិន ដែលធ្វើឲ្យសាធារណជនមានការភ្ញាក់ផ្អើល និងហួសចិត្តជាខ្លាំង។
ក្នុងនោះផងដែរ លោកជំទាវ ហ៊ុន ស៊ីណាត ដែលតែងតែចេញមុខទើសចំពោះរឿងហាក់មិនទំនងនៅក្នុងសង្គម បានដាក់ឲ្យចំៗថា៖ «មិនមែនលើកទី១ទេ ដែលការងារធ្វើមិនច្បាស់លាស់ធ្វើឲ្យតែរាស្ត្រក្ដៅក្រហាយ ។ ម្យ៉ាងទៀតអាសំឡេងឮហ្នឹងវាមិនងាប់ដូចគ្រឿងញៀនទេនាំគ្នាចាប់អាគ្រឿងញៀនទៅពេលនេះពេញវាលស្រែកូនខ្មែរបន្តិចទៀតងាប់អស់ហើយអស់លោកអើយ»៕ រក្សាសិទ្ធិដោយ៖ លឹម ហុង
