មន្ត្រីថ្នាក់ក្រោមជាតិខ្លះ មិនទាន់មានសមត្ថភាពគ្រប់គ្រាន់នៅឡើយ បែរជាអង្គុយរង់ចាំតែបទបញ្ជារបស់នាយករដ្ឋមន្ត្រីទៅវិញ

ភ្នំពេញ៖ សម្តេចតេជោ នាយករដ្ឋមន្រ្តី បានថ្លែងរំលឹកដល់មន្រ្តីរបស់ខ្លួនថា រាជរដ្ឋាភិបាលបានប្រឹងប្រែងក្នុងការធ្វើប្រតិភូកម្មអំណាច គឺការទម្លាក់ការងារទៅឲ្យមន្ត្រីថ្នាក់ក្រោមជាតិ តែមន្ត្រីថ្នាក់ក្រោមជាតិខ្លះ មិនទាន់មាន​សមត្ថភាពគ្រប់គ្រាន់នៅឡើយ ចាប់ពីថ្នាក់រដ្ឋមន្ត្រី អភិបាលខេត្ត រួមនឹងមន្ត្រីពាក់ព័ន្ធដទៃទៀត ដែលពួក​គេ មិនព្រមបំពេញការងារ និងភារកិច្ចមានចែងក្នុងច្បាប់ បែរជាអង្គុយរង់ចាំតែបទបញ្ជារបស់នាយករដ្ឋមន្ត្រីទៅវិញ។

ក្នុងពិធីបិទសន្និសីទជាតិស្តីពីកំណែទម្រង់វិមជ្ឈការ និងវិសហមជ្ឈការនៅថ្ងៃ២២ ខែកុម្ភៈ ឆ្នាំ២០១៨នេះ សម្តេច​តេជោ ហ៊ុន សែន នាយករដ្ឋមន្ត្រី បានលើកឡើងថា ក្រសួងស្ថាប័ននីមួយៗសុទ្ធតែមានកំណត់ពីព្រំដែនការងារដែលខ្លួនត្រូវអនុវត្តន៍រួចអស់ទៅហើយ ប៉ុន្តែពួកគេមិនបានអនុវត្តន៍ការងារតួនាទី និងភារកិច្ច ដែលបានកំណត់នោះទេ។

សម្តេចតេជោ ហ៊ុន សែន បានថ្លែងថា៖ កន្លងទៅនេះមានការសង្កេតឃើញថា ស្ថាប័នមួយចំនួន ឬអាជ្ញាធរថ្នាក់ក្រោមជាតិមួយចំនួនមិនទាន់អនុវត្តន៍ច្បាប់នៅឡើយទេ គឺនៅអនុវត្តន៍បទបញ្ជានៅឡើយដែរ។ តាមពិតច្បាប់បានឲ្យស្ថាប័ននោះអនុវត្តន៍ភារកិច្ចរបស់ខ្លួន ប៉ុន្តែខ្លួនបែរជាមិនបានអនុវត្តន៍នូវភារកិច្ចនោះទេ លុះត្រាតែមាន​​​បទបញ្ជាពី នាយករដ្ឋមន្ត្រីទើបបានធ្វើ។ បើដូច្នោះមានការចាំបាច់បង្កើតឡើងនូវស្ថាប័ន ឬក៏ក្របខណ្ឌ​គតិយុទ្ធសម្រាប់ស្ថាប័ននីមួយៗធ្វើអ្វីទៅ។

សម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា នៅថ្ងៃនេះបានស្តីបន្ទោសទៅអភិបាលខេត្តមួយ ដោយសារ​តែមិនហ៊ានអនុវត្តច្បាប់ ចំពោះក្រុមហ៊ុន ដែលបានធ្វើសកម្មភាពរំលោភច្បាប់។ ប៉ុន្តែទោះជាយ៉ាងនេះក្តី សម្តេចតេជោ ហ៊ុន សែន មិនបានបញ្ចេញឈ្មោះអភិបាលខេត្ត និងក្រុមហ៊ុនឯកជនដែលសម្តេចចង់មានប្រសាសន៍នោះទេ។

សម្តេចតេជោ ហ៊ុន សែន បានមានប្រសាសន៍ថា កាលពីយប់មិញនេះ មានអភិបាលខេត្តមួយបានផ្ញើសារសុំយោបល់សម្តេចតាមបណ្តាញ Whatsapp ដើម្បីសុំគោលការណ៍អនុវត្តវិធានការលើក្រុមហ៊ុនឯកជនមួយ ។

សម្តេចតេជោ ហ៊ុន សែន បានបញ្ជាក់ថា៖ សិទ្ធិអំណាចរប​ស់ចៅហ្វាយខេត្ត មិនឱ្យក្រុមហ៊ុនមួយធ្វើកន្លែងនៅការ​ដ្ឋានមួយ។ ក្រុមហ៊ុននោះនៅតែជជេសធ្វើ ចៅហ្វាយខេត្ត អត់ហ៊ានឃាត់ អញ្ចឹងចាំបាច់ធ្វើចៅហ្វាយខេត្តធ្វើអ្វីឱ្យក្រុមហ៊ុននោះ ធ្វើចៅហ្វាយខេត្តទៅមិនល្អជាង។ បើក្រុមហ៊ុនវាធំជាងខេត្តទៅហើយ។

សម្តេចតេជោ ហ៊ុន សែន បានបន្តថា៖ ខ្ញុំវ៉ៃ Whatsapp ត្រឡប់ទៅវិញថា នេះជាសមត្ថកិច្ចរបស់អាជ្ញាធរ។ ២ម៉ោងទៀតត្រូវតែបិទឱ្យបាន ហើយខ្ញុំបានបញ្ជាក់ទៅក្រុមហ៊ុនហ្នឹងភ្លាម។ គេបញ្ជាក់ថា ខ្លួនគេទៅបិទ ខ្ញុំថាបើអញ្ចឹង បិទ១ម៉ោងមុនទៅ បើ២ម៉ោងក្រោយ គឺរដ្ឋបាលខេត្តទៅបិទហើយ។ សមត្ថកិច្ចមិនព្រមឱ្យធ្វើ ច្បាប់មិនទាន់មាន អ្វីៗក៏មិនទាន់មាន បែរជាក្រុមហ៊ុនទៅធ្វើ។ ហុយដីហុយធ្លី ប៉ះពាល់ដល់ប្រជាជន ប៉ះពាល់ដល់សណ្តាប់​ធ្នាប់​សាធារណៈ ខ្លួន បែរជាអត់ហ៊ានសម្រេច ដោយខ្លាចក្រុមហ៊ុនទៅវិញ។ ខ្ញុំសូមបញ្ជាក់ បើធ្វើចៅហ្វាយខេត្តបែបនេះ មិនបាច់ធ្វើទេ ឱ្យពួកថៅកែ ឬក៏ពួកគេហៅថា បើនិយាយពី ក្រុមជល់មាន់ ឱ្យអាពួកជល់មាន់វាមកធ្វើចៅ​ហ្វាយខេត្តល្អជាង។

សម្តេចបានបញ្ជាក់ទៀតថា ធ្វើជាអាជ្ញាធរខេត្ត ត្រូវហ៊ានយកការទទួលខុសត្រូវ លើដែនដីរបស់ខ្លួន។ ប៉ុន្តែអភិ​បាល​ខេត្តខ្លះ ពុំហ៊ានអនុវត្តដាវអាជ្ញាសឹក ដែលសម្តេចបានប្រគល់ជូននោះទេ ហើយបែរជាយកដាវអាជ្ញា​សឹកនោះ​មកប្រគល់ឱ្យសម្តេចជាកាប់វិញដដែល៕ បញ្ញាស័ក្តិ