ភ្នំពេញ ៖ មន្ត្រីជាន់ខ្ពស់នៃក្រសួងសេដ្ឋកិច្ចនិងហិរញ្ញវត្ថុបានឲ្យដឹងថា កំណើនសេដ្ឋកិច្ចកម្ពុជានឹងស្ទុះងើបឡើងវិញ នៅក្នុងឆ្នាំនេះក្នុងរង្វង់ ៤ភាគរយ ដែលកាលពីឆ្នាំមុនបានធ្លាក់រហូតដល់ ៣,១ភាគរយ។
លោក វង្សី វិស្សុត រដ្ឋមន្ត្រីប្រតិភូអមនាយករដ្ឋមន្ត្រី និងជារដ្ឋលេខាធិការប្រចាំការ នៃក្រសួងសេដ្ឋកិច្ច និងហិរញ្ញវត្ថុ បានឲ្យដឹងនៅក្នុងវេទិកាសាធារណៈ ស្តីពី «គ្រប់គ្រងម៉ាក្រូសេដ្ឋកិច្ច និងច្បាប់ស្តីពីហិរញ្ញវត្ថុ សម្រាប់ការគ្រប់គ្រងឆ្នាំ២០២១» ថា ការស្ទុះងើបឡើងវិញនៃកំណើនសេដ្ឋកិច្ចនេះ គឺដោយសារតែការខិតខំប្រឹងប្រែង និងការអន្ដរាគមន៍យ៉ាងខ្លាំងក្លារបស់រដ្ឋាភិបាលកម្ពុជា។
លោក វិស្សុត បានឲ្យដឹងថា៖ «ឆ្នាំ២០២១នេះ សេដ្ឋកិច្ចកម្ពុជាងើបឡើងវិញក្នុងរង្វង់៤ភាគរយ ងើបគ្រប់វិស័យទាំងអស់ […..] ការងើបឡើងវិញនៃកំណើនសេដ្ឋកិច្ចកម្ពុជា ក្នុងរង្វង់៤ភាគរយនេះ មិនមែនជាកំណើនអាក្រក់នោះទេ ជាកំណើនមួយដែលស្ទុះងើបពី-៣.១ភាគរយ [២០២០]។ តែទោះជាយ៉ាងណាខ្ញុំមិនហ៊ានព្យាករណ៍ ឲ្យខ្ពស់ជាងនេះនោះឡើយ ដោយសារតែវិបត្តិភ្ញៀវទេសចរ បញ្ហានៃជំងឺកូវីដ១៩ ធ្វើឲ្យវិស័យទេសចរធ្លាក់ចុះខ្លាំង ហើយសម្រាប់ឆ្នាំ២០២១ នេះ ក៏មិនអាចដឹងឡើយថា វិស័យទេសចរណ៍ មានដំណើរការល្អប្រសើរឡើងវិញឬអត់»។
លោករដ្ឋលេខាធិការរូបនេះបញ្ជាក់ថា ការហ៊ានអះអាងពីកំណើនសេដ្ឋកិច្ច ក្នុងរង្វង់៤ភាគរយក្នុងឆ្នាំនេះ ដោយសារតែកម្ពុជា បានទទួលការអន្ដរគមន៍យ៉ាងកក់ក្ដៅពី ប្រមុខរាជរដ្ឋាភិបាលសម្ដេចតេជោ ហ៊ុន សែន នាយករដ្ឋមន្ដ្រីនៃកម្ពុជា ក្នុងការស្ដារសេដ្ឋកិច្ចកម្ពុជាឡើងវិញ ក្នុងពេលដែលពិភពលោក ពិសេសកម្ពុជាកំពុងជួបវិបត្តិ នៃជំងឺកូវីដ១៩នេះ។
លោកថា ការអន្ដរាគមន៍ពី ប្រមុខរាជរដ្ឋាភិបាល ទាំងផ្នែកទប់ស្កាត់ការរីករាលដាលនៃជំងឺកូវីដ១៩, ការផ្ដល់ឥណទានដល់សហគ្រាសធុនតូច និងមធ្យម (SME), ការបន្ធូរបន្ថយពន្ធ ព្រមទាំងការចូលរួមដោះស្រាយរូបិយវត្ថុមួយចំនួន របស់ធនាគារជាតិនៃកម្ពុជា បានរួមចំណែកផ្ដល់ភាពងាយស្រួល ដល់ការប្រកបអាជីវកម្ម ការរកស៊ីរបស់វិនិយោគិន។
រាជរដ្ឋាភិបាលកម្ពុជា បានអន្ដរាគមន៍លើវិស័យផ្សេងៗជាច្រើន ដើម្បីទប់ស្កាត់ការធ្លាក់ចុះនៃសេដ្ឋកិច្ចកម្ពុជា។ ក្នុងឆ្នាំ២០២០ សេដ្ឋកិច្ចកម្ពុជាធ្លាក់ចុះត្រឹម-៣.១ភាគរយប៉ុណ្ណោះ ខណៈក្នុងតំបន់អាស៊ានធ្លាក់ចុះ-៣.៣ភាគរយ។ លោកបានបន្ថែមថា ដោយសារតែការអន្ដរាគមន៍ដ៏វិសេសវិសាល របស់ថ្នាក់ដឹកនាំកម្ពុជា ធ្វើឲ្យកំណើនសេដ្ឋកិច្ចកម្ពុជា មានក្នុងចន្លោះ-៣.១ភាគរយ មិនធ្លាក់ដល់៥ភាគរយនៅឆ្នាំ២០២០។
លោក វង្សី វិស្សុត ឲ្យដឹងទៀតថា ប្រសិនបើគ្មានការអន្ដរគមន៍ ការគាំពារសង្គម ការផ្ដល់ជំនួយសង្គម, ការបង្កើតការងារតាមជនបទនោះទេ ភាពក្រីក្ររបស់កម្ពុជា នឹងធ្លាក់ដល់១៧ភាគរយ ប៉ុន្ដែបន្ទាប់ពីមានការជ្រោមជ្រែង ធ្វើឲ្យភាពក្រីក្រកម្ពុជា ស្ថិតក្នុងចន្លោះ១៤ភាគរយប៉ុណ្ណោះ។ ចំណែកឯភាពអត់ការងារធ្វើក៏ធ្លាក់ចុះពី៤.៨ភាគរយ មកត្រឹម៤.១ភាគរយ។
លោកបានបញ្ជាក់ថា «ការអន្ដរាគមន៍របស់រាជរដ្ឋាភិបាលនេះ ពិតជាផ្ដល់ផលល្អដល់ការស្ដារសេដ្ឋកិច្ច និងល្អចំពោះលំនឹងជីវភាពរស់នៅរបស់ប្រជាជន និងការថយចុះនៃការធ្លាក់ក្នុងភាពក្រីក្រ»។
លោកបន្តថា ឧស្សាហកម្ម ការកាត់ដេររបស់កម្ពុជាធ្លាក់ពី-៦.៧ភាគរយ មក -៦.៤ភាគរយ ការនាំចេញលើវិស័យកាត់ដេររបស់កម្ពុជាធ្លាក់ចុះ១០ភាគរយ ប៉ុន្ដែមិនមែនជាវិស័យកាត់ដេរកើន២៦ភាគរយ។ ដូច្នេះការនាំចេញរបស់កម្ពុជា ធ្លាក់ចុះត្រឹមតែ-១ភាគរយប៉ុណ្ណោះ។ សម្រាប់វិស័យកសិកម្ម ក្នុងឆ្នាំ២០២០ បានរួមចំណែក ០.៥ភាគរយនៃសេដ្ឋកិច្ចកម្ពុជា ខណៈការនាំចេញផលិតផលកសិកម្មបានកើនឡើង ១៨ភាគរយ៕
រក្សាសិទ្ធិដោយ៖CEN
