ភ្នំពេញ ៖ បុរស២នាក់បានបាត់បង់ជីវិត បន្ទាប់ពីជួបគ្រោះថ្នាក់ចរាចរណ៍ជិះម៉ូតូធំមួយគ្រឿងឌុបគ្នា ក្នុងលឿនលឿនដូចហោះ មកដល់ផ្លូវកោងបានរេចង្កូតទៅបុកបង្គោលភ្លើងពេញទំហឹង បណ្តាលឲ្យម្នាក់បែកខួរស្លាប់នៅកន្លែង និងម្នាក់ទៀតស្លាប់ពេលបញ្ជូនដល់មន្ទីរពេទ្យ។
សពឈ្មោះ ឃុនអ៊ុន ភេទប្រុសអាយុ២០ ឆ្នាំជាងមុខរបរជាងជួសជុលកង់បីឥណ្ឌា មានស្រុកកំណើត នៅស្រុកក្រូចឆ្មារ ខេត្តកំពង់ចាម និងម្នាក់ទៀតមិនទាន់ស្គាល់អត្តសញ្ញាណនៅឡើយ។
បើយោងតាមប្រភពព័ត៌មានពីប្រជាពលរដ្ឋ នៅកន្លែងកើតហេតុបានឲ្យដឹងថា មុនពេលកើតហេតុគាត់បានឃើញបុរស២នាក់ បានជិះម៉ូតូធំមួយគ្រឿងពណ៌ខ្មៅ ពាក់ផ្លាកលេខ ភ្នំពេញ1-FH 6696 ឌុបគ្នាធ្វើដំណើរតាមបណ្តោយផ្លូវ២៧១ ក្នុងល្បឿនលឿនដូចហោះ មកដល់ផ្លូវកោងមិនបង្អង់បានរេចង្កូតទៅបុកបង្គោលភ្លើងពេញទំហឹង បណ្តាលម្នាក់បែកខួរស្លាប់នៅកន្លែងកើតហេតុភ្លាមៗ និងម្នាក់ទៀតដោយសភាពធ្ងន់ធ្ងរពេក បានស្លាប់ពេលបញ្ជូនដល់មន្ទីរពេទ្យ។
ក្រោយពេលកើតហេតុសមត្ថកិច្ចមូលដ្ឋានសហការជាមួយខាងជំនាញចរាចរណ៍ខណ្ឌមានជ័យ ចុះមកដល់ធ្វើការវាស់វែងយកម៉ូតូ ទៅរក្សាទុកនៅអធិការខណ្ឌមានជ័យ រួចធ្វើកំណត់ហេតុប្រគល់សពឲ្យទៅក្រុមគ្រួសារ យកទៅធ្វើបុណ្យតាមប្រពៃណី៕ រក្សាសិទ្ធិដោយ៖ សា មេត
