កណ្តាល ៖ អំពើចោរកម្ម ជាពិសេស ចោរឆក់ គឺជាករណីមួយដែលគេតែងសង្កេតឃើញបានកើតឡើងស្ទើរតែជារៀងរាល់ថ្ងៃ។ ហើយចោរឆក់ភាគច្រើន គឺជាស្ទាវៗតែម្តង ដែលពុំត្រឹមតែមានជំនាញជិះម៉ូតូទេ តែថែមទាំងដៃស្អិតទៀតផង និងមានគ្នីគ្នាជាបក្ខពួកចាំបិទគូទយ៉ាងហោចក៏១ម៉ូតូ ឬ ២ ម៉ូតូ។
ជាក់ស្តែង ដូចជាករណីថ្មីៗនេះអ៊ីចឹង គឺពិតជាសាហាវមែនទែន ខណៈដែលចោរស្ទាវម្នាក់ជិះម៉ូតូ Scoopy ពណ៌ស បានធ្វើសកម្មភាពឆក់ខ្សែកស្ត្រីម្នាក់ដែលកំពុងដើរតាមផ្លូវ យ៉ាងងាយស្រួលបំផុត ដោយគ្មានរំខានដល់អ្នកដំណើរសោះឡើយ។
ហេតុការណ៍ខាងលើនេះផងដែរ ត្រូវបានដឹងថាបានកើតឡើងកាលពីវេលាម៉ោង១០ និង៤៥ នាទី ថ្ងៃទី២៧ ខែ មករា ឆ្នាំ២០២១ ស្ថិតនៅតាមបណ្តោយផ្លូវលេខ ២ ក្នុងសង្កាត់ព្រែកឬស្សី ក្រុងតាខ្មៅ ខេត្តកណ្តាល។
តាមរយៈវីដេអូនេះផងដែរ ក៏សូមឲ្យបងប្អូនប្រជាពលរដ្ឋទាំងអស់គ្នា មិនថាទាំងការធ្វើដំណើរដោយថ្មើរជើង ឬ ជិះម៉ូតូនោះទេ គឺត្រូវតែមានការប្រុងប្រយ័ត្នខ្ពស់បំផុត ព្រោះថាករណីចោរឆក់ ពុំត្រឹមតែធ្វើឲ្យយើងបាត់បង់របស់ទ្រព្យប៉ុណ្ណោះទេ តែពេលខ្លះក៏បណ្តាលឲ្យយើងមានគ្រោះថ្នាក់ដល់អាយុជីវិតផងដែរ៕ រក្សាសិទ្ធិដោយ៖ លឹម ហុង
